Read KO E TOH TAPU KATOA TONGA KO E SAAME 64 Bible Online

KO E SAAME 64 - KO E TOH TAPU KATOA TONGA bible

KO E SAAME 64

¹(Ki he Pule ‘o e Hiva. Ko e Saame ‘a Tēvita.) ONGO‘I, ‘Elohimi, hoku le‘o ‘i he‘eku mamahi: Lehilehi‘i ‘eku mo‘ui mei he ngeia ‘o e fili.

²Fufū au mei he fakataha fakalilolilo ‘a e kau maumau lao; Mei he fononga pau‘u ‘a e kau fai me‘a pango:

³‘A ia kuo nau faka‘alo honau ‘elelo hangē ha heletā, Kuo nau faka‘ata ‘enau ngahau ko e lea kona:

⁴Ke fana mei honau toitoi‘anga ki he kakai lelei: ‘Iloange kuo nau fana, ‘o ‘ikai teki.

⁵‘Oku nau fepukenima‘aki ke tu‘u kaukaua ‘enau lea kovi; ‘Oku nau fa‘ufa‘ufono ‘a e teu fufū ‘enau hele kamosi; ‘Oku nau pehē, Ko hai tū ‘e sio mai?

⁶‘Oku nau tufi ‘a e ngaahi kovi ke ma‘u ha me‘a; Ko e fakakaukau kuo nau fakakaukau‘i ‘oku nau tātā ke haohaoa: Pea ‘oku taumama‘o honau loto mo e ‘atamai takitaha.

⁷Ka kuo fana ha ngahau kiate kinautolu ‘e he ‘Otua; ‘Iloange ne hoko mai honau lavea.

⁸Pea kuo ne fakahumu kinautolu: ko honau ‘elelo na‘a nau tu‘utāmaki ai:[72] Kalo ‘ulu kotoa ‘a e kau sio ki ai.

⁹Pea kuo manavahē ‘a e kakai kotoa; Pea kuo nau fakamatala ‘a e ngāue ‘a e ‘Otua; Pea kuo nau fakalaulauloto ki he‘ene fai anga.

¹⁰Ko si‘i mā‘oni‘oni te ne fiefia ‘ia Sihova, Pea te ne hūfanga kiate ia; Pea ‘e pōlepole ‘a e kau angatonu kotoa.