Read KO E TOH TAPU KATOA TONGA KO E SAAME 68 Bible Online

KO E SAAME 68 - KO E TOH TAPU KATOA TONGA bible

KO E SAAME 68

¹(Ki he Pule ‘o e Hiva, Ko e Saame ‘a Tēvita. Ko e ta‘anga.) KE ma‘ama‘a hake ‘a ‘Elohimi, Kae movetevete hono ngaahi fili; Pea feholaki mei hono fofonga, ‘A kinautolu ‘oku fehi‘a kiate ia.

²Hangē ko e tolona ‘a e kohu Ke pehē ho‘o tolona kinautolu: Hangē ko e vai ‘a e uakisi He ofi ki ai ‘a e afi, Ke pehē ‘a e ‘auha ‘a e kau angahala ‘I he ‘ao ‘o e fotu ‘a ‘Elohimi.

³Ka ke fiefia ‘a ha‘a mā‘oni‘oni, Ke nau hākahaka he fotu mai ‘a ‘Elohimi; ‘Io, ke nau tome‘e he fiefia lahi.

⁴Hiva ki he ‘Otua, Tā ha‘ape ki hono huafa: Tanu ha hala kiate ia ‘oku me‘a mai he Sāliote ‘I he ngaahi fonua mamate.[75] Ko IAA hono huafa: Pea mou hākahaka he‘ene fotu mai na.

⁵Ko e tamai ki he tamai mate, Mo e fakamaau ‘oku tokanga ki he fefine uitou; Ko e ‘Otua ia ‘i hono ‘afio‘anga toputapu.

⁶‘Oku ‘ai ‘e he ‘Otua ‘a e teka noa ke nofo fale, ‘Oku ne tukuange ‘a e ha‘isia ke tu‘umālie; Ngata pē ‘i he angatu‘u ‘oku nau nofo ai pē ‘i he fonua mamate.

⁷‘E ‘Elohimi, ‘i ho‘o me‘a atu ‘i he ‘ao ho kakai na, ‘I ho‘o hā‘ele atu he potu lala; (Sila)

⁸Na‘e tekelili ‘a e fonua, na‘e tutulu foki ‘a e langi ‘i he ‘ao ‘o ‘Elohimi; ‘Io, ‘a Sainai na ‘i he ‘ao ‘o ‘Elohimi ko e ‘Otua ‘o ‘Isileli,[76]

⁹Na‘a ke taufu‘i ho tofi‘a ‘aki ha vai lahi, ‘Otua ē, Pea ‘i he‘ene ngaluvai na‘a ke fokotu‘u hake.

¹⁰Ko ho‘o tākanga na‘e nofo‘i ai; ‘I ho‘o angalelei, ‘Elohimi, na‘a ke teuteu ma‘a si‘i tu‘utāmaki.

¹¹‘Omai ‘a e tala ‘e ‘Ātonai — Ko e kau fefine tala ongoongo lelei ko e hōsitē lahi.

¹²“Oku hola, ‘oku hola ‘ani tu‘i hōsitē: Pea ko si‘i nofo ‘api ‘oku tufa ‘a e vete.

¹³Ko ho‘omou tākoto he ngaahi loto‘ā sipi na, Ka ko e kapakau‘i lupe ē ‘oku ‘ufi‘ufi siliva, Pea ko e fulufulu ‘oku felofelo he pani koula!”

¹⁴‘I he nuiki ‘e Sātai ‘a e ngaahi tu‘i hena Na‘e hangē kuo tō ‘a e sinou ‘i Salamona.

¹⁵Ko ha mo‘unga ‘o ‘Elohimi ‘a Mo‘unga Pēsani; Ko ha mo‘unga tumutumua ‘a Mo‘unga Pēsani.

¹⁶Ko e hā ‘oku mou mata meheka ai, ‘a e ngaahi mo‘unga tumutumua, Ki he mo‘unga[77] kuo fili ‘e ‘Elohimi mōno nofo‘anga? ‘Ā, ‘e ‘afio ai ‘a Sihova ‘o ta‘engata.

¹⁷Ko e tau sāliote ‘a ‘Elohimi ko e mano ‘e ua, Ko e ngaahi laui afe ia: ‘Oku ‘i honau lotolotonga ‘a ‘Ātonai: Kuo ne hā‘ele ki he potu tapu mei Sainai.[78]

¹⁸Kuo ke hā‘ele ki ‘olunga, Kuo ke taki pōpula ha koto pōpula, Kuo ke tali me‘a‘ofa mei he tangata; ‘Io, mei he angatu‘u foki mo ‘afio ai ‘a IAA ‘ELOHIMI.

¹⁹Mālō mo ‘Ātonai mu‘a ‘Oku ne fua kavenga ma‘atautolu he ‘aho kotoa; ‘Io, ‘a ‘Ela ko hotau fakamo‘ui‘anga. (Sila)

²⁰Ko e nofo ‘a ‘Ela kiate kitaua, Ko e ‘Otua mohu fakamo‘ui‘anga; Pea na‘a mo e mate ‘oku ma‘u ‘e Sihova ‘Ātonai ‘Ani hao‘anga mei ai.

²¹Ka ‘e ‘ai ‘e ‘Elohimi ki hono ngaahi fili ha fu‘u tofikulu, ‘O taa‘i ‘a e fanga ‘olunga ‘o ia ‘oku fai atu ‘ene pau‘u.

²²Folofola mai ‘a ‘Ātonai, Neongo ‘oku nau ‘i Pēsani te u ‘omai, Te u ‘omi mei he ngaahi loloto ‘o e tahi.

²³Koe‘uhi ā ke ke kaukau ho va‘e ‘i he toto: Ko ho‘o fanga kulī foki, ke ‘inasi ‘i he fili honau ‘elelo.

²⁴Kuo nau fa‘a māta‘i ho‘o hā‘ele, ‘e ‘Otua; ‘A e fa‘a hā‘ele ‘a hoku ‘Otua, ko hoku Tu‘i, ki he fale tāpuhā.

²⁵Ko e hiva ē na‘e mu‘omu‘a, Hoko ai ‘ani tā me‘alea, ‘Alu ‘i to‘ohema mo to‘omata‘u kau finemui mo e lali fangufangu.

²⁶“Mou fakamālō kia ‘Elohimi, ‘a e ngaahi fakataha kakai, ‘Io, kia ‘Ātonai, ha‘a tupu mei he matavai ko ‘Isileli.”

²⁷Ko ena ‘a ki‘i Penisimani ko honau angi; ‘A e hou‘eiki ‘o Siuta ‘ene fetu‘ani; ‘A e hou‘eiki Sepulone, ‘a e hou‘eiki Nafitalai.

²⁸“Kuo tu‘utu‘uni ‘e he ‘Otua ha ivi mo‘ou.” “Poupou, ‘e ‘Otua mei ho temipale ‘a e me‘a kuo ke fai ma‘amautolu.”

²⁹Ke ‘ohake ‘e he ngaahi tu‘i ki Selusalema ‘Ani holo ki he ‘Afiona.

³⁰Ko e manu ‘o e kaho ke ke valoki pē, Honau tākanga pulu ē, Mo e fanga kafi ko lāuvale: Ko e kau loto‘aki ‘a e siliva, ke ke malaki, Ko e ngaahi fa‘ahinga pole tau, ke ke veteki?[79]

³¹‘E ha‘u mei ‘Isipite ‘a ha‘a fangatu‘u na,[80] Ko ‘Itiopea[81] te ne vave ‘aki mai hono nima ki he ‘Otua.

³²Hiva kia ‘Elohimi ‘a e ngaahi pule‘anga ‘o māmani; Tā ha‘ape mu‘a kia ‘Ātonai.

³³‘Ene ‘Afio ‘oku sāliote ‘aki ‘a e langi ‘o e mu‘aki langi- (Sila) Uoi! ‘oku ne ha‘aki mai hono le‘o, hono ko e le‘o māfimafi!

³⁴Pe‘i tuku ‘a e māfimafi kia ‘Elohimi, ‘A ia ‘oku ‘i funga ‘Isileli hono lāngilangi, Pea ‘oku ‘i he ngaahi ‘ao hono māfimafi.

³⁵“‘Oku fakalilifu mai ho ngaahi fale tapu, ‘e ‘Elohimi, ‘A e ‘Afiona ko e ‘Otua ‘o ‘Isileli: ‘Oku ne ‘ange mālohi mo e koto ngū ki he kakai. Ke mālō‘ia ‘a ‘Elohimi.”