Read KO E TOH TAPU KATOA TONGA KO E SAAME 69 Bible Online

KO E SAAME 69 - KO E TOH TAPU KATOA TONGA bible

KO E SAAME 69

¹(Ki he Pule ‘o e hiva. Ki he fasi ko “Koni lile.” Ko e me‘a ‘a Tēvita) FAKAHAOFI au, ‘Elohimi; He kuo a‘u ‘a e vai ki he‘eku mo‘ui.

²Kuo u ngalo ‘i ha kele ‘o ha fu‘u vanu, Pea ‘oku ‘ikai ha tu‘unga kiate au: Kuo u a‘u ki ha tokanga vai lahi, Pea kuo fā ‘a e tele‘a, ‘o lōmekina mai.

³Kuo u ongosia he tautapa atu; kuo mōmoa hoku kia: Kuo ‘osi‘osi hoku mata ‘i he fakasio atu ki hoku ‘Otua.

⁴Ko kinautolu ‘oku fehi‘a tu‘unga‘a pē kiate au ‘Oku tokolahi ‘i hoku tu‘oni lou‘ulu: ‘Oku kaukaua hoku kau faka‘auha, ‘a hoku ngaahi fili lau loi: Ko ia ai, ko e me‘a na‘e ‘ikai te u kaiha‘asi kuo pau ke u fakafoki.

⁵‘Oku ke mea‘i ‘eku vale, ‘e ‘Otua; Pea ko ‘eku halaia ‘oku ‘ikai ke puli ki he ‘Afiona.

⁶Ke ‘oua ‘e mā ‘iate au ‘a kinautolu ‘oku tatali atu, ‘E ‘Ātonai Sihova Sāpaoti: Ke ‘oua na‘a puputu‘u koe‘uhi ko au Ha‘a kumi ki ke ‘Afiona, ko e ‘Otua ‘o ‘Isileli,

⁷Na‘a ku kātaki ‘a e taukae koe‘uhi ko e ‘Afiona; Na‘e pulonga hoku mata ‘i he mā.

⁸‘Oku lau au ‘e hoku ngaahi tokoua ko e kehe; Kuo u hoko ko e muli ki he fānau ‘a ‘eku fa‘ē.

⁹He ko e mamahi‘i ‘o ho fale kuo kai ‘o ‘osi au; Ko e ngaahi manuki ‘a e kakai ‘oku manuki koe kuo tō kiate au.

¹⁰Pea u tangi[82] — ‘aukai hoku laumālie — Kae hoko ia mōku manuki pē.

¹¹Pea na‘a ku ‘ai ki hoku kakano ‘a e tauanga‘a, Ka u hoko pē ko honau fainga kananga.

¹²Ko e talanoa ‘a e nofo he matanikolo ‘oku kau kia kita; Mo e ngaahi ta‘anga ‘a e kau inu kava.

¹³Ka ko au ‘oku fai atu ‘eku hū, Sihova ē, ‘I ha taimi tu‘utu‘umālie: ‘E ‘Otua, ‘i he lahi ‘o ho‘o meesi, Ke ke tali au ‘aki ‘a e mo‘oni ‘o ho‘o fakamo‘ui.

¹⁴Hāmusi au mei he pelepela, ke ‘oua na‘a ku ngalo ai: Ke fai hoku fakahaofi meiate kinautolu ‘oku fehi‘a mai, Pea mei he ngaahi tokanga vai.

¹⁵‘Oua ‘e tuku ‘a e vaifā ke lōmaki‘i au, Pea ke ‘oua ‘e fōngia au ‘e he vanu; Pea ke ‘oua na‘a tāpuni mai ‘e he luo hono ngutu.

¹⁶Tali au, ‘Eiki; he ‘oku angalelei ho‘o meesi: Hanga mai ‘o taau mo e lahi ‘o ho‘o faka‘atu‘i.

¹⁷‘Io, ‘oua ‘e hanga kehe mei ho‘o tamaio‘eiki; He ‘oku ou ‘efihia: vave mai hoku tali.

¹⁸Fakaofi mai ki hoku laumālie; huhu‘i: Vete ange au telia hoku ngaahi fili.

¹⁹‘Oku ke ‘ilo pē hoku manuki, mo fakamā, mo taukae: ‘Oku fe‘ao mo e ‘Afiona hoku fili fua pē.

²⁰Kuo havehave hoku loto ‘i he manuki; pea u vaivai: Pea na‘a ku ‘amanaki ki ha fakalelu, kae ‘ikai; Pea ki ‘ani fakafiemālie, kae ‘ikai ‘iloa mai.

²¹Na‘a nau ‘omi ‘ahu ma‘aku me‘akai; Pea he‘eku fie inu ko e vinika na‘a nau fakainu ‘aki.

²²‘Ā, ke hoko honau keinanga‘anga ko e hele puna, lolotonga ‘oku nau kei nofo ai; Pea ka ai ha‘anau fu‘u nonga kae tauhele ‘aki.

²³Ke fakapo‘uli honau mata ‘o ‘oua ‘e sio; Pea ‘ai ke fevāleaki ma‘u pē honau kongaloto.

²⁴Ke hua‘i kiate kinautolu ho‘o tautea, Pea ke tuli ‘o ma‘u kinautolu ‘e he kakaha ‘o ho‘o ‘ita.

²⁵Ke hoko honau ‘apitanga ko e koto li‘aki: Ke ‘oua na‘a nofo ha taha ‘i honau tēniti.

²⁶He ko ia kuo ke taa‘i ‘oku nau toe ha‘ao; Pea ‘oku nau lau fakalāutelau ‘a e mamahi ‘o ho‘o kau kafo.

²⁷Tuku ke fakalahi ‘enau kovi: Pea ke ‘oua te nau a‘usia ‘ao mā‘oni‘oni.

²⁸Ke tāmate‘i kinautolu mei he tohi ‘o e mo‘ui, ‘O ‘oua ‘e tohi kinautolu ‘i he kau mā‘oni‘oni.

²⁹Ka ko au ‘oku ou vaivai mo mamahi: Kae tuku, ‘Elohimi, ke hākeaki‘i au ‘e ho‘o fakamo‘ui.

³⁰Te u fakamālō‘ia ‘a e huafa ‘o ‘Elohimi ‘aki ha hiva, Pea ko e fakafeta‘i te u hākeaki‘i ai ia.

³¹‘E ‘ange‘ange kia Sihova ha pulumokau ‘i ha me‘a pehē, Ha pulu ‘oku nifo‘ia mo va‘e mavahevahe.

³²Kuo mamata ki ai ‘a si‘i ta‘aliekina, ‘o nau fiefia: Ke mo‘ui homou loto, ha‘a kumi ki he ‘Otua.

³³He ‘oku ongo‘i ‘e Sihova ‘a e kau masiva, Pea ‘oku ‘ikai te ne ta‘etoka‘i ‘ene kau pōpula.

³⁴Fakamālō kiate ia ‘a langi mo māmani, ‘A e ngaahi tahi mo e me‘a kotoa ‘oku ngaue ai.

³⁵He fakamo‘ui ‘a Saione ‘e he ‘Otua, ‘O langa ‘a e ngaahi kolo ‘o Siuta; Pea te nau nofo ai, ‘o ma‘u moonau tofi‘a.

³⁶Pea ‘e ma‘u ia ‘e he hako ‘o ‘ene kau tamaio‘eiki; Pea ko e kau ‘ofa ki hono huafa te nau nofo ki ai.