Read KO E TOH TAPU KATOA TONGA KO E SAAME 71 Bible Online

KO E SAAME 71 - KO E TOH TAPU KATOA TONGA bible

KO E SAAME 71

¹‘EIKI, Kuo u hūfanga ki he ‘Afiona: ‘Oua ‘e tuku au ke u mā ‘o ta‘engata.

²Ka ‘i ho‘o totonu ke ke hamusi au, mo fakahaofi: Fakaongo ho fofonga kiate au, ‘o fakamo‘ui.

³Ke ke hoko kiate au ko hoku fale toinga, Ke u hū ki ai ‘i he taimi kotoa: Kuo ke fai tu‘utu‘uni ke fakahaofi kita;[83] He ko ‘eku mo‘unga mo ‘eku kolo ‘a e ‘Afiona.

⁴‘E hoku ‘Otua, huhu‘i au mei he nima ‘o e angahala, Mei hoku puke ‘e he angakovi mo ta‘e‘ofa.

⁵Pea ko koe, ‘Ātonai Sihova, ‘oku tu‘u ai ‘eku ‘amanaki: Ko hoku falala‘anga talu ‘eku kei si‘i.

⁶Talu hoku fanau‘i mo ‘eku tu‘u ko e pou[84] ‘e he ‘Afiona pē: Ko koe ia na‘e to‘o au mei he fatu ‘o ‘eku fa‘ē; Ko ‘eku hiva ‘aki koe ‘e fai ma‘u pē.

⁷Kuo u hoko tokua ko e ofo‘anga ki he tokolahi; Ka ko koe ko hoku hūfanga mālohi.

⁸‘E puta hoku ngutu ‘i ho fakamālō. Mo ho fakalāngilangi‘i ‘o ‘osi ‘a e ‘aho.

⁹‘Oua ‘e tukuange au ‘i he taimi ‘o ‘eku luku; ‘Oua ‘e li‘aki au ‘oka ‘osi hoku ngū.

¹⁰He ‘oku lau kiate au hoku ngaahi fili, Pea ‘oku lea fakataha ‘a kinautolu ‘oku vakai‘i ‘eku mo‘ui.

¹¹He‘enau pehē, Kuo li‘aki ia ‘e ‘Elohimi: Tuli ‘o ma‘u, he ‘oku ‘ikai taha ke hamusi.

¹²‘Oua te ke fakamama‘o, ‘Elohimi; ‘E ‘Otua, vave mai mōku tokoni.

¹³Ke mā mu‘a, ‘io, ke ‘auha ‘a kinautolu ‘oku fakafili ki he‘eku mo‘ui; Ke kofu ‘aki ‘a e manuki mo e taukae ‘a kinautolu ‘oku o‘i ha‘aku kovi.

¹⁴Ka ko au te u ‘amanaki ai pē; Pea ‘e fakautuutu ‘eku fakamālō kiate koe.

¹⁵‘E ‘a‘au ‘e hoku ngutu ho‘o ngaahi fai mā‘oni‘oni, ‘E ‘osi ‘a e ‘aho mo ‘eku lau ho‘o ngaahi fakamo‘ui; He ‘oku ‘ikai te u ‘ilo hono tānaki.

¹⁶Ko e ngaahi ngāue kāfakafa ‘a ‘Ātonai Sihova te u ha‘u mo au: Ko ho‘o ngaahi fai mā‘oni‘oni ‘a‘au pē ke u lau.

¹⁷‘E ‘Otua, kuo ke ako‘i au talu ‘eku si‘i; Pea Kuo u fakahā ho‘o ngaahi ngāue fakaofo ‘o a‘u ki he taimi ni.

¹⁸Pea ‘oua foki, ‘Elohimi, te ke li‘aki kita, ‘I he tō mai ‘a e motu‘a mo e ‘uluhinā; ‘Oua ke u fakahā ki he to‘utangata ‘e taha ho‘o māfimafi, Mo ho ivi ki he fu‘u fononga ‘oku laka mai.

¹⁹Ko ho‘o mā‘oni‘oni foki, ‘e ‘Otua, ko e koto mā‘olunga; Hono kuo fai me‘a lalahi ‘e he ‘Afiona: Ko hai ‘oku taau mo koe, ‘e ‘Otua?

²⁰‘a e ‘Afiona ne ke tuku ke mau ongo‘i ‘a e ngaahi faingata‘a lahi mo kovi, Te ke toe fakamo‘ui mai kimautolu, ‘O toe ‘ohake mei Lolofonua Taupotu.

²¹Ke ke fakamā‘olunga au, Pea tafoki mai, ‘o fai ha fakalelu.

²²Ko au foki te u fai‘aki ‘a e me‘a helefilo ho fakafeta‘ia, ‘Io, ho‘o fai mo‘oni, ‘e hoku ‘Otua: Te u tā ha‘ape ko ho hiva‘i, ‘A e ‘Afiona ko e tāpuhā ‘o ‘Isileli,

²³‘E fiefia hoku loungutu ē ‘O ka u ka hiva saame kiate koe; ‘Uma‘ā ‘a e me‘a kuo ke huhu‘i, ‘a hoku laumālie.

²⁴‘E talanoa foki ho‘o faitotonu ‘e hoku ‘elelo Ke ‘osi mai ‘a e ‘aho; He kuo mā — he kuo puputu‘u ‘A kinautolu ‘oku o‘i ha kovi kiate au.