Read KO E TOH TAPU KATOA TONGA KO E SAAME 72 Bible Online

KO E SAAME 72 - KO E TOH TAPU KATOA TONGA bible

KO E SAAME 72

¹(Ko e me‘a ‘a Solomone.) ‘E ‘ELOHIMI, foaki ki he tu‘i ho halanga fakamaau, ‘Io, ki he ‘alo ‘o e motu‘a tu‘i, ho‘o faitotonu.

²Ke[85] ne fakatonutonu mā‘oni‘oni ‘a e ngaahi me‘a ‘a ho kakai, Mo fai fakakonisitūtone ma‘a ho kakai vaivai.

³Ke fakatupu lelei ma‘a e kakai ‘a e ngaahi mo‘unga lalahi, Pehē mo e ngaahi mo‘unga si‘i, ka ‘i he funga ‘o e mā‘oni‘oni.

⁴Ko e kakai ngaohikovia te ne taukapo‘i, Ko ha‘a masiva te ne fakahaofi, Kae laiki ‘a ia ‘oku fai fakamālohi.

⁵Ka nau ‘apasia kiate koe lolotonga ‘oku tu‘u ‘a e la‘ā, Pea ‘i he mata ‘o e māhina, ‘o laui to‘utangata.

⁶Te ne hangē ko e hifo ha ‘uha ki he musie kuo tā: Hangē ha mahua ‘a e lōvai ki he fonua.

⁷Ke to‘ulu ‘a e mā‘oni‘oni ‘i hono kuonga; Pea ke leta ‘a e melino, kae‘oua ke ngata ‘a e māhina.

⁸Ke ne pule foki mei tahi ki tahi, Pea mei he Vaitafe ki he ngata‘anga ‘o māmani.

⁹Ko e nofo toafa ‘e punou ‘i hono ‘ao; Pea ko hono ngaahi fili ‘e kai efu ‘aki honau ‘elelo.

¹⁰Ko e ngaahi tu‘i ‘o Tāsisi mo e ‘otu motu te nau tuku me‘a‘ofa: Ko e ngaahi tu‘i ‘o Sipa mo Sapa[86] te nau ‘omi koloa.

¹¹‘Io, ‘e hū kiate ia ‘a e tu‘i kotoa pē: ‘E tauhi ia ‘e he pule‘anga fuli pē.

¹²He ‘oku ne fakahaofi ‘a e masiva ‘oka tangi; Ko e vaivai foki mo ia ‘oku ‘ikai hano tokoni.

¹³Ko e tu‘utāmaki mo e masiva ‘oku ne faka‘atu‘i, Pea ko e ngaahi laumālie ‘o e masiva ‘oku ne fakamo‘ui.

¹⁴‘Oku ne huhu‘i honau laumālie mei he maumau mo e fakamālohi, Pea ‘oku mahu‘inga honau toto ‘i he‘ene vakai:

¹⁵Ko ia te nau mo‘ui, ‘o ‘ange ki ai ha koula Sipa:[87] Pea ‘e fai ma‘u pē hono hufekina; Te nau fakamālō ki ai ‘i he ‘aho kotoa.

¹⁶Ke mafola mai ‘a e koane ‘i he fonua,[88] Pea lea hangē ko Lepanoni hono fua ‘i he funga mo‘unga: Pea ke nau fisiki mai mei he kolo hangē ko e mohuku ‘o e fonua.

¹⁷Ke ta‘engata hono huafa; Ke huli hono huafa lolotonga ‘oku hanga mai ‘a e la‘ā; Ke lau ‘e he kakai ‘oku nau monū‘ia ‘iate ia; Ke tuku monū ki ai ‘a e ngaahi pule‘anga.[89]

¹⁸Mālō, Sihova ‘Elohimi, ko e ‘Otua ‘a ‘Isileli! ‘A ia toko taha ‘oku fai me‘a fakaofo lahi:

¹⁹Ke mālō‘ia ‘o ta‘engata hono huafa lāngilangi‘ia: Pea ke fonu ‘a māmani kātoa ‘i hono kolōlia! ‘Ēmeni mo ‘Ēmeni!

²⁰Ngata ‘a e ngaahi lotu ē ‘A Tēvita foha ‘o Sese. KO HONO TOLU ‘O E PUKA