Read KO E TOH TAPU KATOA TONGA KO E SAAME 73 Bible Online

KO E SAAME 73 - KO E TOH TAPU KATOA TONGA bible

KO E SAAME 73

¹TĀ ko e koto lelei ‘a e tō‘onga ‘a e ‘Otua ki ‘Isileli, Kiate kinautolu ‘oku ma‘a honau ‘atamai.

²Ka ko au na‘e toe si‘i ke humu hoku va‘e; Ko ‘eku laka na‘e meimei ko e koto tatele.

³He na‘a ku meheka ki he kau fakamālohi, ‘Eku sio ki he tu‘umālie ‘a e ha‘a fai kovi.

⁴He hangē ‘oku ‘ikai ke ha‘isia kinautolu: Pea ‘oku fefeka ai pē honau ngū.

⁵‘Oku ‘ikai te nau mo‘ua ‘i he ongosia ‘o ha‘a vaivai; Pea ‘oku ‘ikai ke te‘ia kinautolu ‘o hangē ko ha‘a mālohi.

⁶Ko ia ai, ‘oku nau kahoa ‘aki ‘a e fielahi; ‘Oku nau kofu ‘aki ‘a e fakamālohi.

⁷Ko honau mata kuo poko he fu‘u sino:[90] ‘Oku pā ki tu‘a ‘a e fu‘u fakakaukau ‘a honau loto.

⁸‘Oku nau mata hihiki, ‘oku nau lea kovi, ‘Oku nau futa ‘aki ‘enau mā‘olunga he lau fakamālohi:

⁹Kuo nau ‘ai honau ngutu ‘i he langi, Pea hā‘ele atu honau ‘elelo ‘i māmani.

¹⁰Ko ia ai, ‘oku tafoki hono kakai ‘o muimui ki ai: Ko ‘enau fie inu ha vai lahi.[91]

¹¹Pea ‘oku nau lau, “‘O ‘ilo fēfē ‘a ‘Ela? Pea ko ‘Elioni, ‘oku ne mea‘i koā?

¹²Vakai, ko e kau angahala kinautolu na, Ka ‘oku nau tu‘umālie ai pē, ‘o fakalahi koloa.”

¹³Tā ko e kulanoa ‘eku toutou tafi hoku loto ke ma‘a, Mo ‘eku fanofano hoku nima ‘i he ta‘eangahala;

¹⁴He ‘oku fai hoku taa‘i ‘i he ‘aho kotoa, Pea ko e pongipongi fuli pē ‘oku fai hoku tautea.

¹⁵Ka ne u tu‘utu‘uni ke pehē ‘eku lau, Tā te u fai hala ki he to‘utangata ‘o ho‘o fānau.

¹⁶Pea ka u ka fakalaulauloto ke ‘ilo hono ‘uhinga, Ko e kavenga leva ki hoku mata.

¹⁷Kae‘oua Kuo u hū ki he ngaahi potu tapu ‘o ‘Ela, ‘O sio ki honau iku‘anga.

¹⁸Tā ‘oku ke ‘ai kinautolu ki he ngaahi potu ‘oku hekengofua: ‘Oku ke tulaki kinautolu ki he fu‘u ‘auha.

¹⁹Hono ko e kemo kuo nau hoko ko e koto lusa! Kuo kai ‘o ‘osi kinautolu ‘e he ‘ū ilifia.

²⁰Hangē ha misi ‘oka ‘ā ha taha, Pehē, ‘e ‘Ātonai, ‘i ho‘o ofo hake na, Te ke ta‘etoka‘i kinautolu, he ko e ‘ata‘i me‘a.

²¹He ko hoku loto na‘e toka konā, Pea ko hoku kofuua na‘e hangē kuo hoka:

²²‘Io, kuo pehē ‘eku vale mo masiva ‘ilo; Ne u hoko ko e manu tofu pē ‘i ho ‘ao.

²³Ka ko e “Ko au” ko ia ‘oku ta fe‘ao ma‘u: Kuo ke puke hoku to‘omata‘u.

²⁴Te ke fale‘i au, ‘o taki hala, Pea hili ia te ke tali fakahū au ki he kolōlia.

²⁵Ko hai mo koe ‘oku ou ma‘u ‘i langi? Pea ‘oku ‘ikai ha‘aku toe manako ‘i māmani.

²⁶Ko hoku kakano mo hoku loto kuo ‘autalua; Ka ko e ‘Otua ‘a e mālohinga ‘o hoku loto, Mo hoku tofi‘a ‘o ta‘engata.

²⁷He vakai ‘e mole ‘a kinautolu ‘oku fakamama‘o meiate koe: Kuo ke faka‘auha ‘a kinautolu ‘oku kumi husepāniti kehe.

²⁸Ka ‘oku lelei kiate au ke fakaofiofi ki he ‘Otua: Kuo tu‘u ‘eku hūfanga ‘ia ‘Ātonai Sihova, Ke u ‘a‘au ho‘o ngaahi ngāue kotoa.