Read KO E TOH TAPU KATOA TONGA KO E SAAME 76 Bible Online

KO E SAAME 76 - KO E TOH TAPU KATOA TONGA bible

KO E SAAME 76

¹(Ki he Pule ‘o e Hiva. Ke fai mo e ngaahi me‘a helefilo. Ko e Saame ‘a ‘Ēsafe, Ko e ta‘anga.) KUO ‘iloa ‘i Siuta ‘a ‘Elohimi: ‘Oku mā‘olunga hono huafa ‘i ‘Isileli,

²Pea ‘oku ‘i Salema hono toi‘anga, Pea ‘i Saione hono ‘ana.

³Ko e potu ko ia na‘a ne laiki ai ‘a e ngaahi ngahau; ‘A e pā, mo e heletā, mo e ‘ū mahafu. (Sila)

⁴‘Oku ke hā ngingila mo tu‘utai Mei he ngaahi mo‘unga na ‘oku ke hahalu ai.

⁵Ko e kau to‘a tete‘e kuo nau tuku kinautolu ke vetea, Kuo nau fakatuletulemohea, Pea ko e fu‘u fa‘ahinga kaukaua kuo fevāleaki honau nima.

⁶Na‘a ke valoki leva, ‘e ‘Otua ‘o Sēkope, Pea ko e sāliote mo e hoosi na‘e mape‘e, ‘o mohe mate.

⁷Ko koe, ko koe pē ‘a Manavahē‘ia: Pea ko hai ‘e matu‘u ‘i ho ‘ao ‘oka ‘iloange kuo ke ‘ita?

⁸Na‘a ke tala mei langi ‘a e fakamaau ke ongona; Manavahē leva ‘a māmani ‘o mo‘ulongoa.

⁹‘I he tu‘u ke fai fakamaau ‘e ‘Elohimi, Ke taukapo‘i ‘a e kau ngaohikovia ‘o māmani. (Sila)

¹⁰He ko e ‘ita ‘a e tangata te ne fakaongolelei koe: Ka ke tau ‘a e fu‘u houhau ‘oku toe.[98]

¹¹Fai tukumo‘ui, mo fakaai foki, Kia Sihova ko homou ‘Otua: ‘A e nofo fua pē ‘i he fonua takatakai ki he‘ene ‘Afio, ‘Omi tukuhau kia Manavahē‘ia.

¹²‘Oku ne ‘auhani ‘a e finangalo ‘o e hou‘eiki; ‘Oku taau ke manavahē ki ai ‘a e ngaahi tu‘i ‘o māmani.