Read KO E TOH TAPU KATOA TONGA KO E SAAME 83 Bible Online

KO E SAAME 83 - KO E TOH TAPU KATOA TONGA bible

KO E SAAME 83

¹(Ko e Ta‘anga. Ko e Saame ‘a ‘Ēsafe.) ‘E ‘Elohimi, ‘oua te ke fakalongo pē; ‘Io, ‘oua te ke fakaongonoa, pea ‘oua te ke nofo pē, ‘Ela ē.

²He vakai ‘oku ‘u‘ulu ho ngaahi fili: Pea ko kinautolu ‘oku fehi‘a kiate koe ‘oku nau ‘ulu mahiki.

³‘Oku nau ‘ai fakalilolilo ‘a e tu‘utu‘uni ki ho kakai, ‘Oku nau puleaki‘i ha me‘a ki ho kau malu‘i.

⁴‘Oku nau pehē, Ha‘u ā ke tau tu‘usi kinautolu ke ‘oua na‘a toe lau ko e kakai: ‘Io, ke ‘oua na‘a kei manatua ‘a e hingoa ‘o ‘Isileli,

⁵He kuo nau alea loto taha; Kuo nau fuakava ke fai ha kovi ki he ‘Afiona.

⁶Ko e ‘ū tēniti ‘o ‘Ītomi mo e kau ‘Isime‘eli; Ko Moape mo ha‘a Heka‘ā:

⁷Ko Kīpeli, mo ‘Āmoni, mo ‘Amaleki: Ko Filisitia, fakataha mo e ha‘a nofo Taia:

⁸Ko ‘Āsilia foki ‘oku kau mo kinautolu ē; Kuo nau hoko ko e nima ‘o ha‘a Lote. (Sila)

⁹Fai kiate kinautolu ‘o hangē ko ho‘o fai ki Mitiani; ‘O hangē ko ho‘o fai kia Siselā, ‘O hangē ko ho‘o fai kia Siapini ‘i vaitafe Kīsoni:

¹⁰‘A ia na‘e faka‘auha ‘i ‘Enitoa; Na‘a nau hoko ko e kinoha‘a ki he ngoue‘anga.

¹¹Ngaohi kinautolu, ‘a honau hou‘eiki, ke hangē ko ‘Ōlepi mo Sī‘ipi; ‘Io, ke hangē ko Sipa mo Salamuna ‘a honau kau pilinisi:

¹²‘A ia na‘a nau pehē, Tau to‘o mai mu‘a ‘a e fanga‘anga manu ‘a ‘Elohimi mootau tofi‘a.

¹³‘E hoku ‘Otua, ngaohi kinautolu ke hangē ko e ‘akau ko e teka; Hangē ha kafukafu ‘oku vilingia.

¹⁴Ke hangē ha afi ‘oku ne keina ha vao tātā; ‘Io, ke hangē ha maama ‘oku ne puho he ngaahi mo‘unga;

¹⁵Ke pehē ho‘o tuli kinautolu ‘aki ho‘o taufa, Mo faka‘ohovale‘i ‘aki ho‘o afā.

¹⁶Fakafonu honau mata ‘i he mā: Ke nau kumi ki ho huafa, ‘e Sihova.

¹⁷Ke nau mā mo manavahē ‘o lauikuonga; ‘Io, ke nau puputu‘u pea ‘auha; Pea ke nau ‘ilo ko e ‘Afiona tofu pē taha —

¹⁸‘Io, ko ho huafa ko Sihova ‘oku hope atu ‘i māmani kātoa.