Read KO E TOH TAPU KATOA TONGA KO E SAAME 84 Bible Online

KO E SAAME 84 - KO E TOH TAPU KATOA TONGA bible

KO E SAAME 84

¹(Ki he Pule ‘o e Hiva, Ko e Faka-Kati. Ko e Saame ‘a ha‘a Kola.) ‘E Sihova Mohu-hōsitē, hono ‘ikai faka‘ofo‘ofa ‘a ho ngaahi nofo‘anga!

²‘Oku holi hoku laumālie, ‘io, ‘oku ne pongia He fiema‘u ‘a e ngaahi loto‘ā ‘o Sihova: Ko hoku loto mo hoku kakano ni ‘oku na tangi ki he ‘Otua mo‘ui.

³Seuke, kuo ma‘u fale ai ‘e he ki‘i manupuna, Mo e pekepeka hano pununga; Pea kuo ne tuku ki ai hono fānganga, ‘O ofi ki ho ngaahi feilaulau‘anga, ‘Eiki Sāpaoti, ‘a hoku Tu‘i mo hoku ‘Otua.

⁴Monū‘ia ā ka ko ha‘a nofo ‘i ho fale: Te nau fai ai pē ‘a e fakamālō kiate koe. (Sila)

⁵Monū‘ia ā ka ko e kau tangata. ‘Oku ‘i he ‘Afiona ‘enau falala, ‘Oku nau loto‘aki ‘a e ngaahi hala.

⁶Si‘enau ‘alu ‘i he Tele‘a Tangi ‘Oku nau ngaohi ia ko e pupunga matavai; ‘Io, ‘oku ‘ufi‘ufi ia ‘e he ‘uhamu‘a ‘aki ‘a e ngaahi tāpuaki.

⁷‘Oku nau ‘alu ‘i he mālohi ki ha mālohi, ‘Oku nau hū ‘i Saione ‘i he ‘ao ‘o ‘Elohimi.

⁸Fanongo mai ki he‘eku lotu ē, ‘A Sihova, ‘Otua ‘o e ngaahi Hōsitē! Ofe‘i mai ho fofonga ē, ‘A e ‘Otua ‘o Sēkope! (Sila)

⁹‘E ‘Otua ko homau Fakaū, hanga mai, ‘O ‘afio ki he fofonga ‘o ho‘o Pani.

¹⁰He ko ha fo‘i ‘aho ‘i ho loto‘ā ‘oku lelei hake ‘I ha afe‘i ‘aho ‘i ha potu ange. Te u fili mu‘a ke u le‘o matapā ‘i he fale ‘o hoku ‘Otua, ‘I ha‘aku nofo ‘i he ngaahi tēniti ‘o e angahala.

¹¹He ko Sihova ‘Elohimi ko e la‘ā mo e fakaū ia; ‘Oku foaki ‘e Sihova ‘a e kelesi mo e kolōlia: ‘E ‘ikai te ne mamae‘i ha lelei ‘e taha Meiate kinautolu ‘oku laka haohaoa.

¹²‘E Sihova Mohu-hōsitē, Monū‘ia ā ka ko e tangata ‘oku falala kiate koe!