Read KO E TOH TAPU KATOA TONGA KO E SAAME 86 Bible Online

KO E SAAME 86 - KO E TOH TAPU KATOA TONGA bible

KO E SAAME 86

¹(Ko e Lotu ‘a Tēvita) OFE‘I ho fofonga, ‘Eiki, ‘o tali kita; He ko e tu‘utāmaki au, mo masiva.

²Tauhi hoku laumālie, he ko ho‘o pele kita: Fakamo‘ui ho‘o tamaio‘eiki, ‘a e ‘Afiona ko hoku ‘Otua; He ko e falala au ki he ‘Afiona.

³‘Alo‘ofa mai, ‘Ātonai ē; He ko e ‘aho kotoa ‘oku ou tautapa kiate koe.

⁴Fakafiefia‘i ‘a e loto ‘o ho‘o tamaio‘eiki; He ‘oku ou hapai hake hoku laumālie kiate koe, ‘Ātonai.

⁵He ko e lelei koe, ‘Ātonai, mo e fa‘a fakamolemole, Pea ke mohu meesi ki he kakai kotoa ‘oku tautapa kiate koe.

⁶Ongo‘i, ‘Eiki, ‘eku lotu; Pea fofonga ki he le‘o ‘o ‘eku hū tōtōaki atu.

⁷‘I he ‘aho ‘o ‘eku faingata‘a‘ia te u tautapa atu; He te ke tali au.

⁸‘Oku ‘ikai ha taha ‘i ha‘a ‘Otua ‘oku tatau, ‘Ātonai, mo Koe; Pea ‘oku ‘ikai ha ngāue ‘e tatau mo ho‘o ngāue.

⁹Ko e pule‘anga kotoa kuo ke ngaohi Te nau omi ‘o punou ‘i ho ‘ao, ‘Ātonai: Pea ko ho huafa te nau fakahīkihiki‘i.

¹⁰He ko e lahi ‘a e ‘Afiona, Pea mo e fai me‘a mana; Ko koe ‘a e ‘Otua toko taha.

¹¹Huluhulu au ‘i ho hala, ‘Eiki; Ka u ha‘ele ‘i ho‘o mo‘oni. Ko hoku loto ē ke ke fā‘ūtaha Ke ‘apasia ki ho huafa.

¹²Ka u fakafeta‘i ki he ‘Afiona ‘aki hoku loto kotoa, ‘E ‘Ātonai ko hoku ‘Otua; ‘O fakahīkihiki‘i ho huafa ‘o ta‘engata.

¹³He kuo lahi kiate au ho‘o meesi Pea kuo ke hamusi hoku laumālie mei he takele ‘o Hētesi.

¹⁴Kuo tu‘u mai ha kakai pau‘u, ‘Elohimi, Pea ko e fakataha ‘a kau fakamālohi kuo nau tuli ki he‘eku mo‘ui: Pea ‘oku ‘ikai te nau fai ki he ‘Afiona ‘enau fakafeangai.

¹⁵Ka ko koe, ‘Ātonai, ko e ‘Otua ‘alo‘ofa mo angalelei, Tuai ki he houhau, pea fonu ‘i he kelesi mo e mo‘oni.

¹⁶Tafoki kiate au, pea ke ‘alo‘ofa; Foaki ho ivi ki ho‘o tamaio‘eiki ko kita, Pea fakamo‘ui ‘a e tama ‘a ho‘o kaunanga.

¹⁷Fai ma‘aku ha faka‘ilonga monū, Ke sio ki ai pea mā ‘a kinautolu ‘oku fehi‘a kiate au, He ko koe, Sihova, kuo ke tokoni mai, ‘o fai ha fakalelu.