Read KO E TOH TAPU KATOA TONGA KO E SAAME 88 Bible Online

KO E SAAME 88 - KO E TOH TAPU KATOA TONGA bible

KO E SAAME 88

¹(Ko e Ta‘anga Saame ‘a ha‘a Kola. Ki he Pule ‘o e Hiva. Ke Hiva ‘aki ‘a e fasi fakaminu. Ko e hiva-ako ‘a Hēmani ko e ha‘a Sala.) ‘E Sihova ko hoku ‘Otua fakamo‘ui, ‘Oku ou fakafe‘ao kiate koe ‘aho mo e pō mo ‘eku tangi:

²Ke a‘u ‘eku lotu ki ho ‘ao na; Ofe‘i ho fofonga ki he le‘o ‘o ‘eku kalanga.

³He ‘oku fonu hoku laumālie ‘i ha koto mamahi, Pea ko ‘eku mo‘ui ‘oku fakaofiofi ki Hētesi.

⁴‘Oku lau au fakataha mo kinautolu ‘oku hifo ki vanu: ‘Oku ou tatau mo ha tangata kuo ‘osi hono ngū.[111]

⁵‘Oku ‘i he kau mate ‘oku mohe na, Hangē ko e kau tō ‘oku tokoto ‘i fa‘itoka, ‘A ia ‘oku ‘ikai te ke kei manatua; ‘Io, ko e fa‘ahinga kuo motuhi mei ho nima.

⁶Kuo ke ‘ai au ki he takele ‘o e luo, Ki he po‘uli lōlō, ki he loloto taumama‘o.

⁷‘Oku tata‘o mai ho houhau, ‘Io, ko ho‘o ngaahi peau kotoa ‘oku fakavaivai‘i ‘aki au. (Sila)

⁸Kuo ke hiki ke mama‘o hoku ngaahi kaume‘a; Kuo ke ngaohi au ko honau fakalili‘a‘anga: Kuo tapui au, kuo ‘ikai te u lava ke ‘alu ki tu‘a.

⁹Ko e me‘a ‘i he‘eku mamahi ‘oku ‘osi‘osi hoku mata: Kuo u tautapa atu he ‘aho kotoa pē, ‘e Sihova, Kuo u mafao hoku nima ki he ‘Afiona.

¹⁰Te ke fai ha mana ki he kau mate? ‘E tu‘u ‘a e kau ‘ata na, ‘o fakafeta‘i kiate koe? (Sila)

¹¹‘E tala koā ho‘o ‘ofa ‘e fa‘itoka? Ho‘o tauhi ho‘o lea ‘i loto Faka‘auha?

¹²‘E toki hā koā ‘i he po‘uli ho‘o fai fakaofo? Mo ho‘o faitotonu ‘i he fonua ‘o e fakangalo?

¹³Ka ko au ē, ‘e Sihova, ‘oku ou kaila atu, Pea ‘oku fakafetaulaki atu he pongipongi ‘eku lotu.

¹⁴Ko e hā ‘oku ke li‘aki ai hoku laumālie, ‘e Sihova? Ko e hā ‘oku ke fufū meiate au ho fofonga?

¹⁵Ko e vaivai au mo e tei mate talu ‘eku tupu hake, ‘I he fua ho‘o ngaahi fakailifia ‘oku ou mo‘umateā pē.[112]

¹⁶Kuo lōmekina au ‘e ho‘o fu‘u tuputāmaki; Kuo tu‘usi au ‘e ho‘o ngaahi fakalele mo‘ui.

¹⁷Kuo nau takai au hangē ha tahi ‘i he ‘aho kotoa; Kuo nau kāpui au fakataha.

¹⁸Kuo ke hiki ke mama‘o ‘a e ‘ofa‘anga mo e kaume‘a, Ko hoku kau fe‘iloaki ko e po‘uli lōlō na.