Read KO E TOH TAPU KATOA TONGA PALŌVEPI 1 Bible Online

PALŌVEPI 1 - KO E TOH TAPU KATOA TONGA bible

PALŌVEPI 1

¹KO E ngaahi palōvepi ‘a Solomone, Ko e ‘Alo ‘o Tēvita, ko e Tu‘i ‘Isileli,

²Ko e me‘a ke ‘ilo poto ai mo e akonaki; Ke sivi ‘a e ngaahi lea ‘uhinga:

³Ko e me‘a ke ma‘u ai ‘a e akonaki fakapoto, ‘A e totonu, mo e fakakonisitūtone, mo e taau:

⁴Ko e me‘a ke ‘atu fakapotopoto kiate kinautolu ‘oku hehemangofua, ‘A e ‘ilo‘ilo mo e fakakaukau ki he talavou:

⁵Ke fanongo ‘a e poto, pea fakalahi ‘ene me‘a ‘oku ma‘u; Pea ke ma‘u ‘uta lelei mei ai ‘e he loto matala:

⁶Ko e me‘a ke faka‘uhinga ai ‘a e palōvepi mo e fakatātā; ‘A e tala ‘a e kau poto, mo ‘enau ngaahi tupu‘a.

⁷Ko e ‘apasia kia Sihova ko e ‘uluaki me‘a ia ‘i he ‘ilo:[1] Ko e poto mo e ako, ko e vale pē ‘oku ta‘etoka‘i ia.

⁸Tama, fanongo ki he akonaki ‘a ho‘o tamai, Pea ‘oua ‘e hiki mei he ngaahi tala ‘a ho‘o fa‘ē.

⁹He ko e pale faka‘ofo‘ofa ia ki ho ‘ulu, Mo e ngaahi kahoa ki ho kia.

¹⁰Tama, kapau ‘e fakaloto‘i koe ‘e ha kau angahala, ‘Oua te ke loto ki ai.

¹¹Kapau te nau pehē, Ha‘u ā ke tau kau, Tau fai ‘etau fononga tā, Tau toka malumu ki ha taha ‘Oku falala vale ki he‘ene ta‘ekau ‘i ha me‘a;

¹²Te tau folo mo‘ui kinautolu hangē ko Hētesi, ‘O folo fua, ‘o hangē ha hifo ki tanu‘anga;

¹³‘Oku mau ma‘u ‘a e koloa mahu‘inga kehekehe, Kuo mau fakafonu vete homau ngaahi fale;

¹⁴Te ke kau ‘i he talotalo, ‘o ‘inasi fakataha mo kimautolu; Te tau kato taha kotoa pē.

¹⁵Tama, ‘oua te ke fou ‘i he hala mo kinautolu; Ta‘ofi ho va‘e mei honau founga:

¹⁶He ‘oku lele honau va‘e ki he kovi, ‘O fakavave ke lilingi toto.

¹⁷Seuke, ‘oku ta‘e‘aonga ‘a e fola kupenga Ki ha manu kapakau ‘oku sio ki ai:

¹⁸Ka ko kinautolu ‘oku nau fai ha fononga taa‘i ‘onautolu, ‘Oku nau toka malumu ki ‘anautolu mo‘ui.

¹⁹Ko e nānunga[2] ia ‘o ia fua pē ‘oku fa‘ao koloa; ‘Oku ‘ave ai ‘a e mo‘ui ‘a e kakai ‘oku ma‘u.

²⁰‘Oku kalanga ‘a Poto ‘i hala: ‘Oku ne ha‘aki hono le‘o ‘i he ngaahi mala‘e;

²¹‘I he fakama‘ungatu‘u ‘o e ngaahi hala kakai, ‘I he hū‘anga ‘o e ngaahi matanikolo, ‘Io, ‘i kolo ‘oku ne fai atu ‘ene ngaahi lea:

²²‘a e kau hehemangofua, ko futu ho‘omou manako ki he anga ko ia? Pea nofo ‘a e kau manuki ki he fai manuki, Pea fehi‘a ‘a e kau sesele ke ‘ilo ha me‘a?

²³Mou tafoki, ‘o tali ‘eku akonaki atu: Eni, te u hua‘i kiate kimoutolu hoku laumālie, Te u faka‘ilo atu ‘eku ngaahi tala.

²⁴Ko e me‘a ‘i he‘eku ui atu, ka mou tekaki. Kuo u mafao atu hoku nima, Kae ‘ikai ha taha ‘e tokanga;

²⁵Pea kuo mou tuku ke teka tu‘a ‘a ‘eku fa‘a fale‘i kimoutolu, Pea ‘ikai te mou tali ‘eku akonaki atu:

²⁶Ko au foki te u kata ‘i ho‘omou tu‘utāmaki, Fakama‘ito‘a he tō mai ho‘omou manavahē;

²⁷‘I he tō mai ho‘omou manavahē hangē ha ha‘aha‘a‘i matangi, Mo e hoko mai ho‘omou tu‘utāmaki hangē ha ‘ahiohio; ‘A e tō kiate kimoutolu ‘a e faingata‘a mo e mamahi.

²⁸Te nau toki ui kiate au, Kae ‘ikai te u tali; Te nau ‘ā hengihengi hoku kumi, Kae ‘ikai te nau ma‘u au:

²⁹Ko e tuha ia ‘o ‘enau fehi‘a ke ‘ilo ha me‘a, Mo e ‘ikai te nau fili ‘a e ‘apasia kia Sihova:

³⁰Na‘e ‘ikai te nau tali ‘eku fa‘a fale‘i kinautolu; Na‘a nau ta‘etoka‘i ‘eku ngaahi akonaki na‘e fai:

³¹Ko ia ai, te nau kai ‘a e fua ‘o honau ‘alunga, Pea te nau mākona ‘i he ngaahi fakakaukau ‘anautolu.

³²He ko e foki atu ‘a e hehemangofua te ne fakapoongi kinautolu, Pea ko e falala noa ‘a e kau vale te nau ‘auha ai.

³³Ka ko ia ‘oku fakaongo kiate au Te ne nofo nonga, Pea te ne ‘atā mei he manavahē ki he kovi.