Read KO E TOH TAPU KATOA TONGA PALŌVEPI 10 Bible Online

PALŌVEPI 10 - KO E TOH TAPU KATOA TONGA bible

PALŌVEPI 10

¹KO E foha poto ko e fiefia‘anga ‘o ‘ene tamai: Ka ko e tama vale ko e fakamamahi ‘o ‘ene fa‘ē.

²Ko ha fu‘u koloa angahala kae ‘ikai ‘aonga: Ka ko e faitotonu ‘oku ne fakahaofi mei he mate.

³‘E ‘ikai tuku ‘e Sihova ke hōngea ‘a e mo‘ui ‘a e faitotonu. Ka ko e holi ‘a e kau angahala ‘oku ne fakateka atu.

⁴‘Oku hoko ko e masiva, ‘a ia ‘oku nima fakapikopiko: Pea ko e nima tutui ‘oku fakatupu koloa.

⁵Ko ia ‘oku tānaki ‘i he fa‘ahita‘u māfana ko e tama poto ia: Ko ia ‘oku mohe fakalōle‘a ‘i he ututa‘u ko e tama fakatupu mā.

⁶Ko e ngaahi tāpuaki ‘a e faitotonu ‘oku tō pē ki ho‘ona tumu‘aki: Ka ko e ngutu ‘o e angahala ‘oku tāpuni ‘e he‘enau fakamālohi.

⁷‘Oku langa fakamālō ‘a e manatu ki ha taha faitotonu: Ka ko e hingoa ‘o e angahala ‘e ‘eho.

⁸Ko e loto poto ‘oku ne tali enginaki: Ka ko e ngutu vale te ne tō fo‘ohake.

⁹Ko ia ‘oku laka totonu ‘oku laka malu: Ka ko ia ‘oku mamio hono ngaahi ‘alunga, ‘e ‘iloa pē.

¹⁰Ko ia ‘oku talanoa kakamo ‘oku ne fakatupu ha ‘ū mamahi: Ka ko ia ‘oku valoki fakahā, ‘oku ne fakatupu melino.[9]

¹¹Ko e ngutu ‘o e faitotonu ko e matavai mo‘ui: Ka ko e me‘a ‘oku pu‘aki ‘e he angahala ko e kofu ‘o e fakamālohi.

¹²Ko e tāufehi‘a ‘oku fakatupu kē: Ka ko e ‘ofa ‘oku ne fakakofu ‘a e fa‘ahinga angahala kotoa pē.

¹³‘E ma‘u ha poto ‘i he ngutu ‘o e loto matala: Kae ma‘u ha uipi ki he tu‘a ‘o e masiva poto.

¹⁴Ko e kau poto ‘oku nau fa‘oaki ‘ilo: Ka ko e ngutu ‘o e vale, ko e tu‘utāmaki ‘oku panaki ai pē.

¹⁵Ko e koloa ‘a e koloa‘ia ko hono kolo mālohi ia: Ko e tu‘utāmaki‘anga ‘o e masiva ko ‘ene masiva.

¹⁶Ko e totongi ‘a e faitotonu ‘oku ngāue ki he mo‘ui: Ko e koloa ‘oku hū mai ki he pau‘u ‘oku ngāue ki he angahala.

¹⁷‘Oku ne ‘i he hala ki he mo‘ui ‘a ia ‘oku ne tali hapo ‘a e akonaki ‘oku fai: Ka ko ia ‘oku li‘aki ‘a e fakapoto ‘oku ne hē.

¹⁸Ko ia ‘oku ne ‘ufi‘ufi ‘ene fehi‘a ko e ngutu kākā pē: Pea ko ia te ne lau fola ha fakakovi ko e vale ia.

¹⁹Ka lahi ha lea ‘e ‘ikai hala ha angahala: Ka ko ia ‘oku fakama‘uma‘u hono loungutu ko e poto ia.

²⁰Ko e ‘elelo ‘o e faitotonu ko e siliva fungani: Ko e loto ‘o e kau angahala ko e ‘ata‘i me‘a.

²¹Ko e ngutu ‘o e faitotonu ‘oku ‘aonga ki he tokolahi: Ka ‘oku pekia ‘a e kau vale ko ‘enau masiva poto.

²²Ko e tāpuaki ‘a Sihova, ko ia ia ‘oku fakakoloa: Pea ‘oku ‘ikai te ne ‘atu mo ia ha mamahi.[10]

²³Ko e me‘a fakafiefia ki he vale ke feia ha angahala: ‘Oku pehē ‘a e poto ki he tangata ma‘u ‘atamai.

²⁴Ko e me‘a ‘oku manavahē ki ai ‘a e angahala, ko ia ‘e hoko mai: Pea ko e manako ‘a e faitotonu ‘e ‘ange ki ai.

²⁵Ka mole atu ‘a e afā kuo ‘ikai ‘a e angahala: Ka ko e faitotonu ko e fale tu‘u ma‘u ai pē.

²⁶Hangē ko e vinika ki he nifo, Pea hangē ko e ‘ahu ki he mata, ‘Oku pehē ‘a e makau kiate kinautolu na‘e fekau ia.

²⁷Ko e ‘apasia kia Sihova ko e me‘a fakalahi ‘aho: Ka ‘e kosi ‘a e ta‘u ‘o e kau angahala.

²⁸Ko e fakatu‘a ‘a e faitotonu ko e koto fiefia: Ka ko e ‘amanaki ‘a e angahala ‘e ‘auha.

²⁹Ko e ‘alunga ‘o Sihova ko e kolotau ki he haohaoa, Ka ko e tu‘utāmaki‘anga ki he kau faikovi.

³⁰‘Oku ta‘emaue‘i ‘a e faitotonu, ‘o ta‘engata: Ka ko e kau angahala ‘e ‘ikai te nau nofo ‘i he fonua.

³¹Ko e ngutu ‘o e faitotonu ‘oku talamuka mai ko e poto: Ka ko e ‘elelo mamio ‘e ta‘aki.

³²Ko e ngutu ‘o e faitotonu ‘oku ne ‘ilo ‘a e me‘a ‘e tau lelei: Ka ko e me‘a ‘oku pu‘aki ‘e he angahala ko e koto mamio.