Read KO E TOH TAPU KATOA TONGA PALŌVEPI 11 Bible Online

PALŌVEPI 11 - KO E TOH TAPU KATOA TONGA bible

PALŌVEPI 11

¹KO E me‘afua kākā ‘oku fakalili‘a ki ai ‘a Sihova: Ka ko e me‘a-fakamamafa ‘oku kakato, ko hono mamana ia.

²Ka kuo ha‘u ‘a Fielahi, ‘e ha‘u ai mo Mā: Ka ko e anga vaivai ‘oku ai ‘ene poto.

³Ko e totonu ‘a e anga tonu te ne fakahinohino honau hala: Ka ko e ta‘ema‘u totonu ‘a e kakai kovi ‘oku nau ‘auha ai.

⁴‘Oku ‘ikai ‘aonga ‘a e koloa ‘i he ‘aho ‘o e houhau: Ka ko e faitotonu ‘oku ne fakahaofi kita mei he mate.

⁵Ko e faitotonu ‘a e tangata lelei ‘e hangamālie ai hono hala; Ka ko e faikovi ‘a e tangata kovi ‘a ia ‘oku ne humu ai.

⁶Ko e faitotonu ‘a e anga tonu te ne hao ai: Ka ko e mānumanu ‘a e kākā ‘oku pō ai kinautolu.

⁷‘I he pekia ‘a e tangata angahala ‘oku ‘auha ai ‘ene ‘amanaki: ‘Io, neongo ko e ngū lahi, ka ‘e ‘auha pē ‘enau fakatu‘a.

⁸‘Oku fakahaofi si‘i faitotonu mei he ‘efihia: Kae ha‘u ‘a e angahala, ‘o fetongi ia.

⁹Ko e momole‘olunga ‘oku ne teu ‘aki hono ngutu ha luo ki hono kaungā‘api: Ka ko e ‘ilo‘ilo ‘a e faitotonu ‘oku ne hao ai.

¹⁰Ka tu‘umālie ‘a e faitotonu, pea fiefia ‘a e kolo: Pea ka ‘auha ‘a e angahala, ‘oku ai ha mavava.

¹¹‘Oku hākeaki‘i ha kolo ‘i he tāpuaki ‘a e faitotonu: Ka ‘oku maumau ‘i he me‘a ‘oku pu‘aki ‘e he angahala.

¹²Ko ia ‘oku manuki‘i hono kaungā‘api ko e taha masiva ‘atamai ia: Ka ko e tangata poto te ne fakalongo pē.

¹³Ko ia ‘oku ‘alu fano mo e lau, ‘oku ne tatala ai pē ‘ena alea fufū: Ka ko e laumālie tōnunga ‘oku ne fufū ai pē ‘a e me‘a.

¹⁴‘Oku tu‘utāmaki ha kakai ko e masiva ‘uta: Ka ‘oka tokolahi ‘a e kau fale‘i, ‘e ai ha tu‘umālie.

¹⁵‘E kovi — ka ko ha kovi — ‘a ia ‘oku hoko ko e talifaki ma‘a ha kehe: Ka ko ia ‘oku fehi‘a ki he ‘atu nima, ‘oku nofo nonga.

¹⁶Ko e fefine kakato ‘oku ne ma‘u tokangaekina:[11] Hangē ko e ma‘u koloa ‘e he kau fai mālohi.

¹⁷Ko e tangata ‘ofa ‘oku ‘aonga ‘ene ‘ofa kiate ia: Ka ko e tangata fakamamahi ‘oku ‘asi ‘ene fakamamahi ‘i hono kakano ‘o‘ona.

¹⁸Ko e angahala ‘oku ne ma‘u ‘i he‘ene ngāue ha ‘ata‘i totongi: Ka ko ia ‘oku tūtuu‘i ‘a e totonu te ne ma‘u ‘a e totongi mo‘oni.

¹⁹Ko e faitotonu mo‘oni ko e me‘a ‘oku iku ki he mo‘ui: Ka ko ia ‘oku toupili ki he kovi, ko hono ‘ātunga ai pē ke mate.

²⁰‘Oku fakalili‘a ‘a Sihova ki he ha‘a loto mamio: Ka ko hono mamana ‘a kinautolu ‘oku tonusika honau ‘alunga.

²¹Kuo mole ha taimi mo ha taimi kae ‘ikai ‘alu ta‘etautea ha kovi: Ka ko e hako ‘o e faitotonu ‘e hao.

²²Ko e mama koula ‘i he ihu ‘o ha puaka, Ko e fefine hōihoifua ia ‘oku ‘ikai ke ‘ilo ki he taau.

²³Ko e faka‘amu ‘a e faitotonu ‘oku ngata ‘i he me‘a ‘oku lelei: Ko e ‘amanaki ‘a e angahala, ko e koto ‘afungi.[12]

²⁴‘Oku ai ha taha ‘oku nima homo, Kae fakautuutu ai pē ‘ene koloa: Pea ‘oku ai ha taha ‘oku angakovi‘i ‘ene me‘a, Kae masiva ai.

²⁵Ko e loto fa‘a tāpuaki ‘e nga‘eke: Pea ko ia ‘oku fakaviviku ngoue kehe ‘e fakaviviku ha‘ana foki.

²⁶Ko ia ‘oku ne ta‘ofi ‘a e mahoa‘a, ‘e kape ki ai ‘a e kakai: Kae hili ‘a e tāpuaki ki he ‘ulu ‘o ia ‘oku ne fakatau atu.

²⁷Ko ia ‘oku tutui ki he lelei te ne ‘eke pe ko e hā ‘a e manako: Pea ko ia ‘oku kumi ki he kovi ‘e a‘u ia ki ai.

²⁸Ko ia ‘oku falala ki he‘ene koloa, ko ia ia ‘e tō: Ka ko e faitotonu ‘e talamuka hangē ko e va‘a.

²⁹Ko ia ‘oku ne fakamamahi hono fale ‘o‘ona, Ko e ‘inasi te ne ma‘u ko e matangi pē. Pea ko e vale ‘e tamaio‘eiki Ki he loto poto.

³⁰Ko e fua ‘a ha‘a faitotonu[13] ko e ‘akau ‘o e mo‘ui: Pea ko ia ‘oku poto,[14] ‘oku ne pō laumālie.

³¹Vakai, na‘a mo e faitotonu te ne ma‘u totongi ‘i māmani: Kae huanoa ‘a e faikovi mo e angahala.