Read KO E TOH TAPU KATOA TONGA PALŌVEPI 14 Bible Online

PALŌVEPI 14 - KO E TOH TAPU KATOA TONGA bible

PALŌVEPI 14

¹KO E poto ha fefine ‘oku kau ke ma‘uma‘uluta ai hono fale: Ka ko ‘ene vale ‘oku hangē ko ‘ene ala ki ai ke hae.

²Ko ia ‘oku fou ‘i hono totonu ‘o‘ona ko e taha ia ‘oku ‘apasia kia Sihova: Ka ko ia ‘oku afe mei hono ‘alunga, ‘oku ne ta‘etoka‘i ‘a ‘ene ‘Afio.

³‘Oku heke mai mei he ngutu ‘o e vale ha va‘a fielahi:[20] Ka ko e loungutu ‘o e poto ‘oku ne ta‘ofi kinautolu mei ha me‘a pehē.

⁴Ka ‘ikai ha fanga pulu ‘e ma‘a ‘a e potu fafanga: Kae lahi ‘a e me‘a ‘oku tupu mei he ivi ‘o e manu toho palau.[21]

⁵Ko e fakamo‘oni tōnunga ‘oku ‘ikai te ne loi: Ka ‘oku hō‘aki loi ‘a e fakamo‘oni kākā.

⁶Ko e kumi ‘a e kakae ki he poto ‘oku ‘ikai ke sia‘a: Ka ‘oku ma‘ungofua ‘a e ‘ilo ki he mafakakaukau.

⁷‘Alu ‘o feangai mo ha tangata vale: Kae ‘ikai ‘aupito te ke ‘ilo ha tō mei hono loungutu ha poto.[22]

⁸Ko e poto ‘a e fakapotopoto ‘a‘eni, ke ‘ai ke mahino hono hala: Ka ko e vale ‘a e kau vale ke fai fakakākā.

⁹Ko e feilaulau totongi ‘a e vale ‘oku ne tuhu kakae ki ai: Ka ko e kau faitotonu ‘oku feluteni honau vā.[23]

¹⁰Ko ‘ete mamahi ‘oku ‘ilo pē ‘e hoto loto ‘o‘ota: Pea ‘oku ‘ikai ha taha ‘e felāve‘i mo au he‘eku fiefia.

¹¹Ko e fale ‘o e angahala ‘e faka‘auha: Ka ko e tēniti ‘o e faitotonu ‘e tu‘u mo e lau.

¹²‘Oku ai ha hala ‘oku hā matamata totonu ki he tangata: Ka ‘oku tū‘ulu atu ki he ngaahi hala ‘oku fakatau ki he mate.

¹³Na‘a mo e lolotonga ‘ete kata, ka ‘oku teteve hoto loto: Pea ko e iku‘anga ‘o ē — ‘o e fiefia — ko e mamahi.

¹⁴Ko e holomui loto ‘e faifai pea ne mākona ‘i he‘ene fāliunga: Pea ‘e mākona ‘a e tangata lelei meiate ia pē.[24]

¹⁵Ko e hehemangofua ‘oku ne tui ki he lea kotoa: Ka ko e fakapotopoto ‘oku ne fakakaukau ‘ene laka.

¹⁶Ko e tangata poto ‘oku ne manavahē, ‘o afe mei he kovi: Ka ko e vale ‘oku ‘ai ‘ene faka‘ita, ‘o ‘alu ta‘etokanga.

¹⁷Ko e tangata māfanangofua ‘oku fai ‘a e me‘a ‘oku ngali vale; Ka ko e tangata puleaki ‘oku fehi‘anekina.[25]

¹⁸Ko e hehemangofua ‘e tō honau tofi‘a ko e vale: Ka ko e kau fakapotopoto ‘e ai honau kalauni ko e ‘ilome‘a.

¹⁹‘Oku tulolo ‘a e kovi ‘i he ‘ao ‘o e kakai lelei: Mo e kau angahala ‘i he matanikolo ‘o e faitotonu.

²⁰Ko si‘i masiva, na‘a mo hono kaungā‘api ‘oku ne fehi‘a ki ai: Ka ‘oku tokolahi ‘a e fafale ‘o e koloa‘ia.

²¹Ko ia ‘oku ne ta‘etoka‘i hono kaungā‘api ‘oku ne angahala: Ka ko ia ‘oku ‘ofa ki he masiva ko e koto monū‘ia pē ia.

²²‘Ikai te nau ‘alu hē ‘a kinautolu ‘oku fakakaukau ha kovi ke fai? Kae tō ha ‘ofa mo e fai mo‘oni kiate kinautolu ‘oku fakakaukau‘i ha lelei.

²³‘I he fakaongosia kotoa ‘oku ai hano fua: Ka ko e lau ‘a e ngutu, ‘oku iku pē ki he fakamasiva.

²⁴Ko e kalauni ki he kau poto ‘a ‘enau koloa: Ko e vale ‘a e kau vale ko e vale ai pē.[26]

²⁵‘Oku fakahaofi mo‘ui ‘e ha fakamo‘oni tōnunga: Ka ko ia ‘oku hō‘aki loi ko e koto kākā.

²⁶‘Oku ō mo e ‘apasia kia Sihova ‘a e falala mālohi: Pea ko e fānau ‘a ha taha pehē, ‘oku ai hanau pāletu‘a.

²⁷Ko e ‘apasia kia Sihova ko ha fauniteni ia ‘o e mo‘ui, Ke te hao ai mei he ngaahi tauhele ‘a mate.

²⁸Ko e lāngilangi ‘o e tu‘i ‘oku tu‘u ‘i he tokolahi ‘o e kakai: Pea ko e luku ‘a e kakai ko e mole hono ngeia.

²⁹Ko ia ‘oku fakatotoka ki he ‘ita ko e tama ‘atamai lahi: Ka ko ia ‘oku loto ‘oho, ko hono ‘inasi mu‘a ko e vale.

³⁰Ko e loto ‘oku toka ko e mo‘ui‘anga ‘o e sino kotoa: Ka ko e meheka, ko e popo tofu pē ‘oku totolo ‘i hoku ngaahi hui.

³¹Ko ia ‘oku ne ta‘omi si‘i masiva ‘Oku ne talakaa‘i ‘a e ‘Afio na‘e ngaohi ia: Ka ko ia ‘oku fai ‘ofa ki he fusimo‘omo ‘Oku ne fakaongolelei ‘a ‘ene ‘Afio.

³²‘I he hoko mai ‘ene tu‘utāmaki ‘oku mafuli ‘a e angahala Ka ko e faitotonu ‘oku ai ha pāletu‘a ‘i he‘ene pekia.[27]

³³Ka ma‘u ha poto ‘e ha tangata ‘atamai, ‘Oku nofo nonga ia ‘i hono loto: Ka ‘oka hū ha me‘a pehē ki ha vale, ‘Oku ne fie‘iloa leva.[28]

³⁴Ko e faitotonu ‘oku ne hākeaki‘i ha pule‘anga: Ka ko e faihala ko e mā‘anga ‘o ha kakai.

³⁵‘Oku ‘ofeina ‘e he tu‘i ha tamaio‘eiki ‘oku fai fakapotopoto: Ka ‘oku tō hono houhau kiate ia ‘oku fakatupu mā.