Read KO E TOH TAPU KATOA TONGA PALŌVEPI 15 Bible Online

PALŌVEPI 15 - KO E TOH TAPU KATOA TONGA bible

PALŌVEPI 15

¹KO E tali malū ‘oku lolou ai ‘a e houhau: Ka ko e lea māsila ‘oku ne langa‘i ‘a e ‘ita.

²Ko e ‘elelo ‘o e poto ‘oku ne ‘a‘au lelei ‘a e me‘a ‘oku ne ‘ilo: Ka ko e ngutu ‘o e vale ‘oku ne huhua atu ‘ene sesele.

³Ko e ongo fo‘i fofonga ‘o Sihova ‘oku ‘i he potu kotoa pē: He taulama ‘o e lelei mo e kovi.

⁴Ko e ‘elelo lea malū ko e ‘akau ‘o e mo‘ui tofu pē: Ka ‘oka ‘i ai ha mamio, ‘oku lavea ai ‘a e laumālie.

⁵Ko e vale ia ‘oku ne ta‘etoka‘i ‘a e akonaki fakapoto ‘a ‘ene tamai: Ka ko ia ‘oku ne tokanga ki ha valoki, ‘oku ne fai fakapotopoto.

⁶Ko e fale ‘o e faitotonu ko e fu‘u feleoko: Ka ‘i he koloa hū ma‘u ‘a e angahala, ‘oku ‘i ai ha mamahi‘anga.

⁷Ko e loungutu ‘o e poto ‘oku nau laku atu ‘a e me‘a kuo ‘ilo: Ka ko e loto ‘o e vale ‘a e me‘a ‘oku ‘ikai pau.

⁸Ko e feilaulau ‘ani angahala ‘oku fakalili‘a ki ai ‘a Sihova; Ka ko e lotu ‘ani faitotonu ko hono mamana ia.

⁹‘Oku fakalili‘a ‘a Sihova ki he ‘alunga ‘o e angahala: Ka ‘oku ne ‘ofa kiate ia ‘oku ha‘ao ki he totonu.

¹⁰‘Oku ai ha tautea kovi ma‘ana ‘oku li‘aki ‘a e Hala: ‘Ilonga ‘a ia ‘oku fehi‘a ki he valoki te ne mate.

¹¹Na‘a mo Hētesi mo ‘Apatoni ka ‘oku na tekefili ‘i he ‘ao ‘o Sihova; Kae huanoa ‘a e ngaahi loto ‘o e hako‘i tangata.

¹²Ko e tama kakae ‘oku ‘ikai te ne manako ke valoki ia ‘e ha taha: ‘Oku ‘ikai te ne fafale ki he kau poto.

¹³‘Oku tupu mei he loto fiefia ‘a e fofonga malimali: Pea ‘oku ō mo e mamahi ‘a e loto ‘o e laumālie maumau.

¹⁴Ko e loto ‘o e tangata ‘atamai ‘oku ne kumi ki he poto: Ka ko e ngutu ‘o e vale ‘oku ne me‘akai ‘aki ‘a e vale pē.

¹⁵Ko e ‘aho kotoa pē ‘o si‘i ta‘ali‘ekina ‘oku kovi: Ka ko ia ‘oku fakatu‘alelei ‘oku ne kai kātoanga ma‘u pē.

¹⁶‘Oku ngutuhua ange ha ki‘i me‘a ‘oku ma‘u mo e ‘apasia kia Sihova, ‘I ha fu‘u koloa ‘oku ō mo e maveuveu.

¹⁷‘Oku lelei ha ‘umu lū ‘oku kiki ‘aki ‘a e ‘ofa, ‘I ha pulu fafanga ‘oku ‘omi mo e fehi‘a.

¹⁸‘Oku fakalanga kē ‘a e tangata loto ‘ita: Ka ko ia ‘oku fakatotoka ki he ‘ita ‘oku ne fakaleleia.

¹⁹Ko e hala ‘o e makau ‘oku hangē ‘oku felei ‘aki ‘a e ‘akau talatala: Ka ko e hala ‘o e faitotonu ko e hala tanu.

²⁰Ko e foha poto ko e fiefia‘anga ‘o ‘ene tamai: Ka ko ha‘a vale ‘oku ne va‘inga‘aki ‘ene fa‘ē.

²¹Ko e fai vale ko e me‘a fakafiefia ki he masiva ‘atamai: Ka ko e tangata poto ‘oku ne ‘alu fakatotonu atu.

²²‘Oku maumau fakakaukau ‘a e ‘ikai fai ha alea: Ka ‘oku tu‘u ‘oka tokolahi ‘a e fale‘i.

²³Ka lava ‘e ha tangata ha tali ‘oku fe‘unga, ‘oku ai ‘ene fiefia: ‘Io, ko e lea ‘oku fai ‘i hono taimi totonu, hono ‘ikai lelei.

²⁴Ko e hala ‘o e mo‘ui ki he tangata fakapotopoto ko e hala fakatahakehake: Ko ‘ene fie hao mei Hētesi mo e ‘alu hifo.

²⁵Ko e fale ‘o e fielahi ‘oku ta‘aki ‘e Sihova; Ka ‘oku ne vili hifo ‘a e kau‘ā ‘o si‘i uitou.

²⁶Ko e ngaahi fakakaukau kovi ‘oku fakalili‘a ki ai ‘a Sihova: Ka ‘oku ma‘a ‘i hono ‘ao ‘a e ngaahi lea ‘ofa.

²⁷Ko ia ‘oku fa‘ao koloa ‘oku ne fakamamahi hono fale ‘o‘ona: Ka ko ia ‘oku fehi‘a ki he totongi fufū te ne mo‘ui.

²⁸Ko e loto ‘o e faitotonu ‘oku ne fakakaukau ha tali lelei: Ka ko e ngutu ‘o e angahala ‘oku ne pu‘aki atu ‘ani kovi.

²⁹‘Oku mama‘o ‘a Sihova mei he kau angahala: Ka ko e lotu ‘o e faitotonu ‘oku ne ongo‘i.

³⁰Ko e fauloulo ‘a e mata ‘oku ne langa ‘a e fiefia ‘i he loto. Ko ‘ete ongona ha ongoongolelei ‘oku ne fakamomona ‘a e hui.

³¹Ko e telinga ‘oku tali ‘a e valoki fakamo‘ui Te ne ‘apitanga ‘i he lotolotonga ‘o e kau poto.

³²Ko ia ‘oku ne teke‘i ‘a e akonaki fakapoto ‘oku ne va‘inga‘aki hono laumālie: Ka ko ia ‘oku tali valoki, ‘oku ne ma‘u poto ai.

³³Ko e ‘apasia kia Sihova ko e fakatonutonu ‘o e poto: Pea ko e anga vaivai ko e fakamelomelo ‘o e hākeaki‘i.