Read KO E TOH TAPU KATOA TONGA PALŌVEPI 17 Bible Online

PALŌVEPI 17 - KO E TOH TAPU KATOA TONGA bible

PALŌVEPI 17

¹‘OKU ngutuhua ange ha konga mā ‘oku hamu, ‘O kiki melino: ‘I he fale ‘oku fonu ‘i he fei‘umu kinamanu, Kae kē.

²Ko e tamaio‘eiki poto te ne pule ki he foha fakatupu mā; Pea te ne nofo mo e fāmili he tufa ‘o e tofi‘a.

³Ko e kulo ma‘a e siliva, Pea ko e fōnise ma‘a e koula, Ka ko e sivi loto ko Sihova ia.

⁴Ko e tangata kovi ia ‘oku fokotu‘u telinga ki he ngutu lau lea kovi: Ko e koto kākā ia ‘oku fakafanongo ki he ‘elelo maumau.

⁵Ko ia ‘oku kata kakae ki he masiva, ‘Oku ne talakaa‘i ‘a e ‘Afio na‘a ne ngaohi ia: Pea ko ia ‘oku fiefia ‘i he hoko mai ha tu‘utāmaki, ‘e ‘ikai ‘alu ta‘etautea.

⁶Ko e a‘ua‘u ‘a e makapuna ko e kalauni ‘o e mātu‘a: Pea ko e lāngilangi ‘o e fānau ‘a ‘enau mātu‘a.

⁷‘Oku ‘ikai hoa mo e vale ‘a e lea fakamatāpule: Kae huanoa ‘a e ta‘ehoa mo e ‘Eiki ‘a e lea loi.

⁸Ko e me‘a‘ofa ko e maka mana he vakai ‘a e tangata ‘oku ‘a‘ana: ‘Ilonga ha potu te ne hanga ki ai te ne tu‘umālie.[35]

⁹‘Oku ‘ufi‘ufi angahala ‘e ia ‘oku ne mamahi‘i ‘a e fe‘ofo‘ofani; Ka ko ia ‘oku ne toutou langaki ha me‘a, ‘oku ne lava ke veteki ‘a e kaume‘a fetohotohoi.

¹⁰Ko e valoki ‘o ha tangata poto ‘oku o‘o. ‘O lahi ‘i ha teau‘i loholoho ki ha vale.

¹¹Ko e angatu‘u ‘oku ne kumi pē ki he kovi: Ko ia, ‘e tuku atu ki ai ha talafekau ongongata‘a.

¹²‘Oku lelei ange ke te fetaulaki mo ha pea kuo mole hono ‘uhiki, ‘I he fetaulaki mo ha vale kuo hako ‘ene vale.

¹³Ko ia ‘oku ne totongi ‘a e lelei ‘aki ‘a e kovi, ‘e ‘ikai mahu‘i ‘a e kovi mei hono fale.

¹⁴Ko e kamata ‘o ha kē ‘oku hangē ko ‘ete foa ha punupunu ‘o ha fu‘u vai, Ko ia, ke ke ‘atā mai koe ‘i he te‘eki ke a‘u ki he feina‘aki.

¹⁵Ko ia ‘oku ne fakatonuhia‘i ‘a e angahala, Mo ia ‘oku ne fakahalaia‘i ‘a e faitotonu, ‘Oku fakalili‘a ‘a Sihova kiate kinaua ‘osi pē.

¹⁶Ko e hā ‘a e pa‘anga ‘i he nima ‘o e vale, Ko ‘ene ‘alu ke fakatau ha poto ‘osi ‘oku ‘ikai hano ‘atamai?

¹⁷Ko e kaume‘a ‘oku ne ‘ofa ‘i he taimi kotoa pē; Pea ko hoto mo‘oni na‘e fanau‘i ma‘a ha faingata‘a.

¹⁸Ko e tangata masiva ‘atamai ia ‘oku ‘atu hono nima, ‘O ne hoko ko e talifaki ki ha taha kehe.

¹⁹Ko ia ‘oku ne manako ki he kē ‘oku ne manako ki he angahala: Pea ko ia ‘oku ne tangi ke matapā mā‘olunga,[36] ‘oku ne kumi ki he lusa.

²⁰Ko e loto mamio ‘oku ‘ikai te ne ma‘u ha lelei; Pea ko ia ‘oku piko‘i me‘a ‘aki hono ‘elelo, te ne tō ki he tu‘utāmaki.

²¹Ko ia ‘oku ne fakatupu ha sesele ko hono mamahi‘anga ia, Pea ‘oku ‘ikai ha fiefia ‘a e tamai ‘a ha vale.

²²Ko e loto fiefia ko e faito‘o lelei: Ka ko e laumālie maumau ‘oku ne fakamaha ‘a e ivi.

²³‘Oku tali ‘e he tangata kovi ‘a e pa‘anga ‘oku to‘o fufū mei he kona, Ke le‘ei ‘a e ngaahi ‘alunga ‘o e fakamaau.

²⁴Ko e tangata ‘atamai ‘oku ne siofi ‘a e poto: Ka ko e mata ‘o e vale ‘oku ‘i he ngata‘anga ‘o māmani.

²⁵Ko e tama vale ko e mamahi‘anga ‘o ‘ene tamai: Pea ko e koto fifisi kiate ia na‘e fā‘ele‘i ia.

²⁶Ka tautea foki ha faitotonu, ‘oku ‘ikai lelei; Ke loholoho‘i ‘a e anga faka‘ei‘eiki koe‘uhi ko e me‘a ‘oku totonu.

²⁷Ko ia ‘oku ne fakama‘uma‘u ‘ene lea ko e pōtopoto‘i ia: Pea ko ia ‘oku lotoma‘u ko e ‘atamai mo‘oni ia.

²⁸Na‘a mo e vale, ka fakalongo ‘oku lau ko e poto: Ka tāpuni hono ngutu ‘oku tuku ko e tama ‘atamai.