Read KO E TOH TAPU KATOA TONGA PALŌVEPI 19 Bible Online

PALŌVEPI 19 - KO E TOH TAPU KATOA TONGA bible

PALŌVEPI 19

¹‘OKU ngutuhua ‘ange ha masiva ‘oku tauhi hono ‘alunga totonu. ‘I ha matāpule ngutu mamio, pea ko e vale foki.

²Tala atu, ‘oku ‘ikai lelei ke masiva ‘ilo ‘a e finangalo; Pea ko ia ‘oku lele ‘aki ‘e hono va‘e, ‘oku fai hala.

³Ko e vale ‘a e tangata ‘oku fulihi hono hala: Ka ‘oku hanu hono loto kia Sihova.

⁴Ko e ma‘u koloa ‘oku fakalahi ai hoto ngaahi kaume‘a: Ka ko si‘i masiva, na‘a mo hono kaume‘a pē taha ‘oku fakamavahe mei ai.

⁵Ko e fakamo‘oni loi, ‘e ‘ikai ‘alu ta‘etautea: Pea ko ia ‘oku hō‘aki loi, ‘e ‘ikai hao.

⁶‘E ‘omi holo ‘e he tokolahi ki he hou‘eiki: Pea ‘oku fakaholo mai kotoa pē ki he nima homo ke kaume‘a.

⁷‘Oku fehi‘anekina ‘a e masiva ‘e hono kāinga kotoa: Kae huanoa ‘a e mavahe meiate ia kotoa hono kau fe‘iloaki.[39]

⁸Ko ia ‘oku ne ma‘u mai ‘a e poto, ‘oku ne ‘ofa ki he‘ene mo‘ui; Pea ko ia ‘oku ne tauhi ‘a e ‘ilome‘a, ko hono ‘ātunga ē ‘ene mo‘ua ha monū.

⁹Ko e fakamo‘oni loi ‘e ‘ikai ‘alu ta‘etautea; Pea ko ia ‘oku ne hō‘aki loi ‘e ‘auha.

¹⁰‘Oku ‘ikai hoa mo e vale ‘a e nofo fakausousa: Huanoa ke pule ha tamaio‘eiki ki he hou‘eiki.

¹¹Ko e fakapotopoto ‘a ha tangata ‘a ia ‘oku ne fakatotoka ai ki he ‘ita: Pea ko ‘ene lakai ha angahala ko hono lāngilangi ia.

¹²Ko e mamahi ‘a ha tu‘i ‘oku hangē ko e ngungulu ‘a ha laione: Ka ko ‘ene hāngai ‘ofa, ‘oku hangē ko e tō ‘a e hahau ki he lou‘akau.

¹³Ko e foha vale ko e lusa‘anga ‘o ‘ene tamai; Pea ko e fa‘a kē ‘a hoto uaifi, ‘oku hangē ko e patatō ma‘u pē ha matatulutulu.

¹⁴Ko e fale mo e koloa ko e me‘a tuku fakaholoholo mei he mātu‘a: Ka ko e uaifi fakapotopoto ko e me‘a meia Sihova ia.

¹⁵Ko e anga fakapikopiko ko hono ‘ātunga ai pē ‘a e mohe fakalōle‘a: Pea ko e loto makau ‘e hōngea.

¹⁶Ko ia ‘oku ne tauhi ‘a e fekau, ‘oku ne tauhi ai ‘ene mo‘ui: Ko ia ‘oku va‘inga‘aki hono ‘alunga, te ne mate.

¹⁷Ko e tali ‘a e nō ‘a Sihova ‘a ‘ete fai ‘ofa ki he masiva; Pea te ne totongi kiate ia ‘a e me‘a ‘oku ne fai.

¹⁸Ako fakapoto ho foha, he ‘oku ai ha ‘amanaki: Pea ‘oua na‘a pau ho loto ke tāmate‘i ia.[40]

¹⁹Ko e tangata ‘ita kakaha te ne fua hono tautea: He kapau te ke ala ke ta‘ofi ko hono faka‘āsili ia.[41]

²⁰Tokanga ki ho fale‘i, pea tali akonaki: Koe‘uhi ke ke poto ‘i ho ngaahi ‘aho ‘amui.

²¹‘Oku lahi ‘a e ngaahi fakakaukau ‘i he loto ‘o e tangata: Ka ko e fale‘i ‘a Sihova, ko ia ia ‘e tu‘u.

²²Ko e faka‘amu ‘a ha tangata ko ‘ene ‘ofa ia:[42] Pea ‘oku ngutuhua ange ha tangata masiva ‘i he tangata loi.

²³Ko e ‘apasia kia Sihova ‘oku ngāue ki he mo‘ui: Pea ‘oku te mohe mākona ai ta‘e‘a‘ahi mai ha kovi.

²⁴Kuo velo ‘e he makau na hono nima ki he tisi: Tala atu, ‘e ‘ikai te ne ongosia hiki ia ki hono ngutu.

²⁵Uipi‘i ‘a e tama kakae, pea ‘e loto poto ai ‘a e hehemangofua: Pea akonaki‘i ha tangata ‘atamai, pea te ne ma‘u ha poto.

²⁶Ko ia ‘oku ne fakamālohi‘i ‘ene tamai, mo kapusi ‘ene fa‘ē, Ko e tama ia ‘oku ne fakatupu ‘a e mā mo e ongoongokovi.

²⁷Tama, tuku ho‘o fanongo ako, Ko ho‘o fai pē ke afe mei he ngaahi lea fakapoto.

²⁸Ko e fakamo‘oni faka-Pileali ‘oku ne manuki‘i ‘a e me‘a fakalao: Pea ko e ngutu ‘o e angahala ‘oku ne folofua ‘a e kovi.

²⁹‘Oku teu ‘ani tautea ma‘a e kau manuki, Mo e loholoho ki he tu‘a ‘o e kau vale.