Read KO E TOH TAPU KATOA TONGA PALŌVEPI 2 Bible Online

PALŌVEPI 2 - KO E TOH TAPU KATOA TONGA bible

PALŌVEPI 2

¹TAMA, kapau te ke tali ‘eku ngaahi lea, ‘O tuku tauhi mo koe ‘eku ngaahi tu‘utu‘uni;

²‘O ke tuku ai ho telinga ke fanongo ki he poto, Mo ofe‘i ho loto kia Fakahinohino;

³Kae‘uma‘ā, kapau te ke ui ‘a ‘Ilome‘a, Pea ha‘aki ho le‘o kia Fakahinohino;

⁴Kapau te ke ha‘ao ia hangē ha ha‘ao siliva, Pea hakule ki ai hangē ko ho‘o fai ki ha koloa fufū:

⁵Te ke toki lave‘i ‘a e ‘apasia kia Sihova, Pea ma‘u ‘a e ‘ilo‘i ‘o e ‘Otua.

⁶He ‘oku foaki poto ‘e Sihova; ‘Oku mei hono fofonga ‘a e ‘ilo mo e fakahinohino.

⁷‘Oku ne tuku tauhi ma‘a e angatonu ha tokoni, Ha fakaū kiate kinautolu ‘oku fou totonu;

⁸Ke ne le‘ohi ‘a e ngaahi ‘alunga fakakonisitūtone, Mo tauhi ‘a e hala ‘o ‘ene kau lotu.

⁹‘E toki mahino kiate koe ‘a e totonu mo e fakakonisitūtone; ‘A e taau, ‘a e founga kotoa pē ‘oku lelei.

¹⁰He ‘e hū ‘a e poto ki ho loto, Pea felātani ‘a e ‘ilo mo ho laumālie;

¹¹‘E fai ho fakalekesi ‘e Fakakaukau, ‘e le‘ohi koe ‘e Fakahinohino:

¹²Kae fakahaofi koe mei he hala kovi Mei he kakai ‘oku mio‘i lau;

¹³‘a e kakai ‘oku li‘aki ‘a e ngaahi ‘alunga totonu, Pea foua ‘a e ngaahi hala ‘oku po‘uli;

¹⁴‘a e fa‘ahinga ‘oku fiefia ke fai kovi, Mo tome‘e ‘i he mamio ‘a e tangata kovi.

¹⁵‘A ia ‘oku piko honau ngaahi ‘alunga, Pea hanga kehe honau ngaahi laka‘anga:

¹⁶Ke fakahaofi koe mei he fefine faka‘ulia, Mei he fefine muli ‘oku lea fakaoleole;

¹⁷‘A ia ‘oku ne li‘aki hono ‘ofa‘anga mu‘a, Pea ngalo ai ‘a e kovinānite ‘o hono ‘Otua.

¹⁸He ‘oku hifo hono fale ki he mate, Mo hono ngaahi hala ki he kau tanu.

¹⁹‘Ilonga ha hū ki ai ‘oku ‘ikai te nau foki, Pea ‘oku ‘ikai te nau a‘usia ‘a e ngaahi hala ‘o e mo‘ui.

²⁰Koe‘uhi ā ke ke hā‘elea ‘a e hala ‘o e kakai lelei, ‘O ta‘ofi ki he ngaahi ‘alunga ‘o e kau mā‘oni‘oni.

²¹He ko e kau angatonu te nau nofo‘ia ‘a e fonua, Pea ko e haohaoa te ne ‘i ai ai pē.

²²Ka ko e kakai kovi ‘e tu‘usi mei he fonua, ‘Io, ko kinautolu ‘oku fai kākā ‘e ta‘aki mei ai.