Read KO E TOH TAPU KATOA TONGA PALŌVEPI 20 Bible Online

PALŌVEPI 20 - KO E TOH TAPU KATOA TONGA bible

PALŌVEPI 20

¹KO uaine ko e tama ta‘emālū‘ia, Ko kava mālohi ko e tama maveuveu; ‘Ilonga ha taha ‘oku holi ai ‘oku ‘ikai ko e poto.

²Ko e ngeia ‘o ha tu‘i ‘oku hangē ko e ngungulu ‘a ha laione: Ko ia ‘oku ne ue‘i ia ‘oku ne hia ki he‘ene mo‘ui ‘a‘ana.

³Ko e me‘a ngali tangata ke te faka‘ehi‘ehi mei he kē: Ka ‘ilonga ha vale pea vehi ki ai.

⁴Ko e makau ‘oku ‘ikai te ne fai ‘ene keli koe‘uhi ko e ‘alotāmaki: Ka hoko ‘a e ututa‘u, te ne fiu‘a ‘eke kae ‘ikai.

⁵Ko e tu‘utu‘uni ‘i he loto ‘o e tangata ko e vai tu‘u fufū: Ka ko e tama ‘ilo‘ilo te ne lava ke fusi hake.

⁶Ko e tokolahi ‘oku lau takitaha, ‘oku ‘ofa tokua: Ka ko e fai mo‘oni ‘e ‘ilo ‘e hai?

⁷Ko ia ‘oku ne tauhi hono ‘alunga haohaoa koe‘uhi ko e totonu, Ko e koto monū‘ia ‘ene fānau ‘amui.

⁸Ko e tu‘i ‘i he‘ene ‘afio ‘i hono taloni fakamaau, ‘Oku ne veteki ‘a e kovi kotoa ‘aki hono fōtunga.

⁹Ko hai te ne pehē, Kuo u ngaohi hoku loto ke ma‘a, Kuo u ‘atā mei he‘eku angahala?

¹⁰Ko e me‘a fakamamafa ‘oku faikehekehe, Mo e fua lolo ‘oku faikehekehe, ‘Oku fakalili‘a ki ai ‘a Sihova fakatou‘osi.

¹¹Na‘a mo e tamasi‘i, ‘oku mahino ia mei he‘ene fai anga ‘Oku ma‘a koā ‘ene ngāue? ‘Oku totonu?

¹²Ko e telinga ‘oku fanongo, Mo e mata ‘oku sio, Ko Sihova kuo ne ngaohi kinaua ‘osi pē.

¹³‘Oua ‘e ‘ofa ki he mohe, na‘a ke hoko ko e masiva; ‘Ā‘ā mu‘a, ka ke mohu me‘akai.

¹⁴“Me‘a kovi, me‘a kovi” — ko ‘ene lau ia te‘eki fakatau; Ka ‘oka mahu‘i atu, ‘oku ne toki pole.

¹⁵‘Oku ai ‘a e koula, Pea lahi ‘a e makakula koloa; Ka ko e teunga mahu‘inga ko e loungutu poto.

¹⁶To‘o hono kofu, he na‘a ne hoko ko e talifaki ‘o e kehe na; ‘Io, puke ‘a e tangata foki, ko ‘ene talifaki ha kau muli.[43]

¹⁷‘Oku vovo ki he tangata ‘a e me‘akai ma‘u kākā; Kae iku pē ki he fonu teteve hono ngutu.

¹⁸‘Oku tu‘u ‘a e ngaahi tu‘utu‘uni ko e pou ‘e he fale‘i: Pea hili fakakaukau lelei, fai ha tau.

¹⁹Ko ia ‘oku ‘alu fano mo e lau, ‘oku ne tatala ha me‘a fufū. ‘Oua na‘a femili mo ha taha ‘oku ngutu lau.

²⁰Ko ia ‘oku kape ki he‘ene tamai pe ki he‘ene fa‘ē, ‘e tāmate‘i ‘ene maama ‘i he po‘uli ‘o e tu‘uapō.

²¹Ko e tofi‘a ‘oku fakavave kovi hono ma‘u ‘i he kamata‘anga, Kae ‘ikai monū‘ia hono ngata‘anga.

²²‘Oua te ke pehē, Te u sauni ‘e au ‘a e kovi; Tatali kia Sihova pea te ne fakamo‘ui koe.

²³Ko e me‘a fakamamafa ‘oku fai kehekehe, ‘Oku fakalili‘a ki ai ‘a Sihova; Pea ko e me‘afua kākā ‘Oku ‘ikai lelei.

²⁴‘Oku meia ‘a Sihova ‘a e laka ‘a ha tangata mālohi; Pea ko e tangata noa te ne ‘ilo fēfē hono ‘alunga?

²⁵Ko e me‘a faka‘efihia ki he tangata ke ‘ioho, “Kōpano!” Pea hili ‘ene tukumo‘ui, pea toki nofo ke sivi.

²⁶Ko e tu‘i poto te ne fakamavahe ‘a e angahala, ‘O ne toe ‘omi ‘a e me‘a ‘au‘au kiate kinautolu.

²⁷Ko e laumālie ‘o e tangata ko e maama ‘a Sihova, ‘Oku ne hakule ‘a e ngaahi leke ‘i he loto‘i loto kete.

²⁸Ko e fai ‘ofa mo meesi ‘oku na le‘ohi ‘a e tu‘i; Pea ‘oku ne pou ‘aki hono taloni ‘a e ofa.

²⁹Ko e lāngilangi ‘o e fatutangata ‘a honau ivi; Pea ko e teunga ‘o ha‘a mātu‘a ko e ‘ulu hinā.

³⁰Ko e tafa ‘oku o‘o ne ‘asi ‘i he kovi: Pehē ‘a e loholoho ‘oku ‘asi ‘i he loto‘i loto.[44]