Read KO E TOH TAPU KATOA TONGA PALŌVEPI 22 Bible Online

PALŌVEPI 22 - KO E TOH TAPU KATOA TONGA bible

PALŌVEPI 22

¹KO E ongoongolelei ko e me‘a ia ke fili mu‘a ki ai ‘i he koloa lahi: Pea ‘oku ngutuhua ange ke te ‘ofeina ‘i ha siliva mo ha koula.

²‘Oku femili ‘a e koloa‘ia mo e masiva: Ko Sihova ai pē na‘a ne ngaohi honau kotoa.

³Ko e fakapotopoto ‘oku ne sio ki he kovi, ‘o ne toi: Ka ko e hehemangofua ‘oku nau laka atu pē, ‘o mo‘ua ai.

⁴‘Oku tata‘o mai ki he anga malū ‘a e ‘apasia kia Sihova: Ha‘u ai mo e koloa mo e ongoongo mo e mo‘ui.

⁵Koni talatala, koni tauhele, ‘Oku felei ‘aki ‘a e hala ‘o e mamio: Ko ia ‘oku ne tokanga ki hono laumālie te ne fakamama‘o mei ai.

⁶‘Atu ako ki ha tamasi‘i, ‘o taau mo hono ‘alunga, Tala atu, ‘oka ne ka motu‘a ‘e ‘ikai te ne hiki mei ai.

⁷Ko e koloa‘ia ‘oku ne pule ki he masiva; Pea ko ia kuo ne fai ha nō, ‘oku ne tamaio‘eiki ki he tangata kuo tali ‘a e nō.

⁸Ko ia ‘oku ne tūtuu‘i ‘a e kākā ‘oku ne utu ‘a e kovi: Pea ko e tokotoko na‘a ne pehē ‘e fakaai ‘aki ‘ene ‘ita, ‘e mole.

⁹Ko e fofonga ‘ofa, ko eni ia ‘e fai tāpuekina; He ‘oku ne foaki mei he‘ene me‘akai ki he masiva.

¹⁰Kapusi ‘a e tama kakae, pea ‘e hū mo ia ki tu‘a ‘a e kē: Pea ‘e ngata ‘a e fakakikihi mo e fakamā.

¹¹Ko ia ‘oku mamahi‘i ‘a e loto ma‘a, mo e lea lelei, ‘e kaume‘a ‘aki ia ‘e he tu‘i.

¹²Ko e fofonga ‘o Sihova ‘oku ne tauhi ‘a e ‘ilo; Ka ne fulihi ‘a e lea ‘a e kākā.

¹³Ko e lea ‘a e makau ‘oku pehē, “Tokua ‘oku takatu‘a ha laione!” “Ā, ‘e fakapoongi au ‘i ha hala ‘o e kolo!”

¹⁴Ko e ngutu ‘o e kau fefine muli ko e luotō loloto: ‘Ilonga ha mala‘ia meia Sihova te ne tō ki ai.

¹⁵‘Oku tāvani ‘a e vale ‘i he loto ‘o ha tamasi‘i: Ko e ‘akau ako te ne vaea ke mavahe.

¹⁶Ko ia ‘oku ne fakamālohia ‘a e masiva Ke fakalahi ki he‘ene koloa, Mo ia ‘oku foaki ki he koloa‘ia, ‘Oku ne fai pē hono fakamasiva.

¹⁷Fokotu‘u telinga mai ‘o ongo‘i e lea ‘ani punake, ‘O fakatokoto ho loto ki he me‘a kuo u ‘ilo;

¹⁸He te nau melie ‘o kapau te ke tauhi ‘i loto, Kapau te nau nofo ai pē ‘i ho ngutu foki.

¹⁹Koe‘uhi ā ke tu‘u ho‘o falala kia Sihova; Ko ia ai, kuo u faka‘ilo ‘a e ngaahi me‘a ni kiate koe he ‘aho ni: ‘Io, kiate koe.

²⁰Hono ‘ikai kuo u tohi ma‘au ha ngaahi me‘a fungani, Ko e koto fale‘i mo e poto?

²¹Ke u faka‘ilo kiate koe ‘a e me‘a ‘oku fua ‘aki ‘a e ngaahi lea ‘o e mo‘ui; Ka ke foki mo koe kiate kinautolu na‘e fekau atu koe ‘a e ngaahi lea ‘a ia ko e mo‘oni ‘atā.

²²‘Oua te ke fakamālohia ha masiva koe‘uhi ko e masiva, Pea ‘oua te ke laiki ‘a e vaivai ‘i he matanikolo;

²³He ko Sihova te ne tu‘u ma‘anau taukapo, Pea te ne fa‘ao me‘a meiate kinautolu ‘oku fa‘ao mei he fa‘ahinga ko ē, ‘O kanoni ‘aki ‘enau mo‘ui.

²⁴‘Oua te ke kaume‘a mo ia ‘oku fa‘a ‘ita; Pea ‘oua ‘e ō mo e tangata tafulu:

²⁵Na‘a ‘iloange te ke ako hono ngaahi ‘alunga, ‘O ke ma‘u ai ha hele ki ho laumālie.

²⁶‘Oua te ke ului ki he fa‘ahinga ‘oku ‘atu nima, ‘A kinautolu ‘oku hoko ko e talifaki ‘o e ngaahi mo‘ua:

²⁷Koe‘uma‘ā ke nau ‘ave ‘a e mohenga ‘oku ke lolotonga tokoto ai, Ko e ‘ikai ha‘o me‘a ke totongi ‘aki.

²⁸‘Oua te ke hiki ‘a e kau‘ā tupu‘a, ‘A ia na‘e fokotu‘u ‘e ho tupu‘anga.

²⁹‘Oku ke vakai ha tangata ‘oku nimenima he fai hono lakanga? Te ne taka he ‘ao ‘o e ngaahi tu‘i; ‘E ‘ikai te ne taka he ‘ao ‘o e kakai ta‘e‘iloa.