Read KO E TOH TAPU KATOA TONGA PALŌVEPI 23 Bible Online

PALŌVEPI 23 - KO E TOH TAPU KATOA TONGA bible

PALŌVEPI 23

¹KAPAU ko ho‘o nofo ke keinanga mo ha pule, Ke ke mātu‘aki tokanga kiate ia ‘oku mo taumafa:

²‘Io, na‘a ke mei ‘ai ha hele ki ho kia, Kapau ko e tangata u‘akai koe.

³‘Oua te ke havala ki he‘ene ngaahi ma‘anga ngako, He ko e me‘akai kākā.

⁴‘Oua te ke fakaongosia ke ma‘u koloa; Tuku ho‘o feinga poto ko ia;

⁵He te ke lava ke kilo puna ki ai, he ‘oku ‘ikai? He ‘oku mātu‘aki ‘ai kapakau ia, Hangē ha ‘īkale ‘oku puna ki he ‘atā.

⁶‘Oua te ke kai ‘a e me‘akai ‘a ha taha sio kovi, Pea ‘oua te ke havala ki he‘ene ngaahi ma‘anga ngako;

⁷‘E hangē ha taha ‘oku fai fika ‘i hono loto. Ko hono anga ia: “Kai mo inu” — ko ‘ene lea ia kiate koe, Ka ko hono loto ‘oku ‘ikai ‘iate koe.

⁸Ko e momo‘i me‘a ne ke kai kuo ke mei lua‘aki; Pea ke maumau‘ia he ngaahi lea veveho ne ke fai.

⁹‘Oua te ke lea tonu hifo ki ha vale; He te ne manuki‘i ‘a e poto ‘o ho‘o lau.

¹⁰‘Oua te ke hiki ‘a e kau‘ā tupu‘a; Pea ‘oua ‘e hū ki he ngaahi kongavao ‘o e tamai mate:

¹¹He ko honau koeli ko e mafi; Pea ko ia ia te ne hopo mo koe ko honau taukapo.

¹²Taki mai ho loto ki he tautea, Mo ho telinga ke tali ‘a e ngaahi lea faka‘ilo.

¹³‘Oua te ke ta‘ofi ‘a e tautea mei he tamasi‘i: Kapau te ke taa‘i ia ‘aki ‘a e ‘akau, ‘e ‘ikai te ne mate.

¹⁴Ko koe te ke taa‘i ia ‘aki ‘a e ‘akau, Ka ko ho‘o fakahao ia ‘ene mo‘ui mei he Vanu.

¹⁵Tama, kapau ‘e faifai pea poto ho loto, Ko ho‘oku ni loto pē ‘e fiefia:

¹⁶Pea ‘e me‘e hopohopo hoku kofuua, ‘Oka ‘ai mai ‘e ho ngutu ‘a e ngaahi lea totonu.

¹⁷‘Oua na‘a faka‘amua ‘e ho loto ki he kau angahala: Ka ke feinga‘i ‘a e ‘apasia kia Sihova he ‘aho kotoa pē

¹⁸He ‘oku ai ‘a e ‘Amui; Pea ‘e ‘ikai tu‘usi ho‘o ‘amanaki.

¹⁹Tama, tokanga ‘e koe ke ke poto, Fakatotonu ho loto ‘i he Hala.

²⁰‘Oua te ke ului ki he kau kai kava; ‘A e fa‘ahinga ‘oku hulu ‘enau kai kanomate.

²¹‘E hoko ko e fusimo‘omo ‘a e inu mo e kai fakaputa. Pea ‘e iku ki he kofu mahaehae ‘a e fa‘a mohe.

²²Tokanga ki ho‘o tamai, he ko eni ia na‘e fakatupu koe, Pea ‘oua te ke ta‘etoka‘i ‘oka motu‘a ho‘o fa‘ē.

²³Fakatau mai ‘a e mo‘onia, Pea ‘oua ‘e fakatau atu; ‘A e poto mo e akonaki mo e ‘ilo.

²⁴‘E mātu‘aki tome‘e ‘a e tamai ‘a ha tangata faitotonu: Pea ko ia kuo ne fakatupu ha poto, te ne fiefia ‘iate ia.

²⁵‘Ofa ke fiefia ho‘o tamai mo ho‘o fa‘ē, ‘Io, ke tome‘e ‘a ia na‘a ne fā‘ele‘i koe.

²⁶Tama, tuku mai ho loto, Pea ke faka‘ofo‘ofa‘ia ‘i hoku ngaahi ‘alunga:

²⁷He ko e luotō loloto ‘a e pa‘umutu; Pea ko e fefine kehe ko e luo pokosi‘i.

²⁸Tala atu, ‘oku ne toi hangē ha kaiha‘a, Pea ‘oku ne fakatokolahi ‘a e kau kākā ‘i he nofo.

²⁹Ko hai ‘oku ‘oiauē? Ko hai ‘oku “Fakapō:” Ko hai ‘oku fa‘a kē? Ko hai ‘oku lāunga tu‘u? Ko hai ‘oku kafo tu‘unga‘a pē? Ko hai kuo kula hono mata?

³⁰‘A kinautolu ‘oku nofo fuoloa ‘o inu uaine; ‘A kinautolu ‘oku ‘alu fano ke ‘ahi‘ahi ‘a e uaine hu‘i kehekehe.

³¹‘Oua te ke sio ki he uaine He‘ene fakakulokula mai, ‘ene ho‘ata mei he ipu, Si‘ene momole hifo:

³²Ko hono iku‘anga ‘oku ne u‘u hangē ha ngata, Pea huhu hangē ha kēlasa.

³³‘E sio ho mata ki he ngaahi me‘a kehe, Pea ‘e ‘a‘au ‘e ho loto ‘a e ngaahi me‘a faka‘ulia.

³⁴Pea te ke hangē ha taha ‘oku tokoto ‘i loto tahi, Pe ha taha ‘oku tokoto he funga sila.

³⁵“Kuo nau taa‘i au, Ka na‘e ‘ikai te u lavea ai; Kuo nau tenge au, Ka na‘e ‘ikai te u ‘ilo; ‘Afē te u ‘ā. Ka u toe kumi ki ai ā.”