Read KO E TOH TAPU KATOA TONGA PALŌVEPI 24 Bible Online

PALŌVEPI 24 - KO E TOH TAPU KATOA TONGA bible

PALŌVEPI 24

¹‘OUA na‘a meheka ki he kakai kovi, Pea ‘oua na‘a ke holi ke fafale kiate kinautolu:

²He ko e fakamālohi pē: ‘oku fakakaukau ki ai honau loto, Pea ko e pau‘u pē ‘oku lea‘aki ‘e honau loungutu.

³Ko e poto pē ‘oku langa ai ha fale; Pea ko e fai fakapotopoto ‘a ia ‘oku tu‘u ma‘u ai:

⁴Pea ko e ‘ilo ‘oku fakafonu ai ‘a e ngaahi loki ‘I he koloa kehekehe ‘oku mahu‘inga mo masani.

⁵Ko e to‘a ‘oku poto ko e mālohi mo‘oni ia; Pea ko e tangata ‘ilome‘a ‘oku toka‘i ai hono ivi;

⁶He hili ‘a e ngaahi fakakaukau lelei te ke fai ‘a e tau, Pea ‘i he lahi ‘a e fale‘i ‘oku ai ha tu‘umālie.

⁷Ko e ngaahi fa‘ahinga poto ko e ‘ū feo kula ia ki he vale: Ko hono ō ia ‘oku ‘ikai te ne mafa‘a hono ngutu ‘i he matanikolo.

⁸Ko ia ‘oku fakakaukau ke fai ha kovi, ‘Oku ui ia ko e tangata puleaki.

⁹Ko e angahala ko e fakakaukau koto vale: Pea ko e tama taukae ‘oku fakalili‘a ki ai ‘a e nofo.

¹⁰Na‘a ke vaivai koā ‘i he ‘aho ‘o e faingata‘a, Tā ‘oku fakangatangata pē ho ivi.

¹¹Fakahaofi ‘a kinautolu ‘oku ‘ave ke mate, Pea ‘oku ‘alu tetetete pē ke tāmate‘i; Tauange mo koe ke ke ta‘ofi.

¹²Kapau te ke lea mai, “Sī, na‘e ‘ikai te mau ‘ilo ‘oku pehē:” ‘Ā, ko ia ‘oku ne fua ‘a e ngaahi loto ‘Ikai ‘e mahino kiate ia? Pea ko ia ‘oku ne tauhi ho laumālie ‘Ikai ‘oku ne ‘ilo pē? Pea ‘ikai te ne fakafoki ki he tangata ‘a e me‘a kuo ne fai?

¹³Tama, ke ke kai honi, he ‘oku sai, Pea ‘oku melie ki ho‘o ‘ao‘ingutu ‘a e honi ‘oku tafe noa mai;

¹⁴Ke pehē ha‘o ongo‘i ‘a e poto ki ho laumālie: Ka ‘iloange ‘oku ke ma‘u ia, ‘oku ai ‘a e ‘Amui, Pea ‘e ‘ikai tu‘usi ho‘o ‘amanaki.

¹⁵Siana angahala, ‘oua ‘e tokamalumu ki he nofo‘anga ‘o e faitotonu: ‘Oua ‘e vete ‘a e potu ‘oku ne tokoto ai;

¹⁶He ‘e tu‘o fitu ‘a e tō ki lalo ‘a e faitotonu, Ka ne tu‘u pē: Ka ‘oka hoko ha tu‘utāmaki ki he kau angahala, Pea nau mafuli ai.

¹⁷‘Oua te ke fiefia ‘i he toka ho fili, Pea ‘oua na‘a tome‘e ho loto ‘i he‘ene mafuli:

¹⁸Na‘a sio ki ai ‘a Sihova, pea tau kovi ki hono finangalo, ‘O ne le‘ei hono houhau meiate ia.

¹⁹‘Oua te ke ha‘aki hoha‘a koe‘uhi ko e kau faihala: ‘Oua te ke meheka koe‘uhi ko e kau angahala:

²⁰He ‘oku ‘ikai ha ‘Amui ki he kakai kovi; Ko e maama ‘a e kau angahala ‘e me‘a mo mate.

²¹‘Apasia kia Sihova, tama, pea ki he tu‘i; ‘Oua te ke felāve‘i mo kinautolu ‘oku fe‘alu‘aki:

²²He ‘e hoko fakafokifā ‘enau tu‘utāmaki; Pea ko e fakangata honau ta‘u ‘oku ‘ilo ‘e hai?

²³Ko eni foki ‘oku ‘a e kau punake. Ko e hūmataniu ‘i he fakamaau ‘oku ‘ikai lelei.

²⁴Ko ia ‘oku ne pehē ki he hia, “Tonuhia koe,” ‘E kape‘i ia ‘e he ngaahi kakai, ‘e va‘inga‘aki ia ‘e he ngaahi fa‘ahinga.

²⁵Ka ko kinautolu ‘oku tautea ‘a e fa‘ahinga ko ē, te nau sai; Pea ‘e hoko kiate kinautolu ha tāpuaki lahi.

²⁶Ko ia ‘oku fai ha tali ‘oku tonusika, Ko e taha ia ‘oku ‘uma ki ho ngutu.

²⁷Tokonaki ho‘o ngāue ‘i tu‘a, Pea teuteu ma‘au ‘i he vao; Hili ia pea ke nofo ke langa hao fale.

²⁸‘Oua te ke hoko ko e fakamo‘oni tu‘unga‘a ki ho kaungā‘api; He te ke fai kākā koā ‘aki ho ngutu?

²⁹‘Oua te ke pehē, Hangē ko ‘ene fai kiate au, ‘e pehē ‘eku fai kiate ia; Te u fakafoki ki he tangata ‘o taau mo e me‘a na‘a ne fai.”

³⁰Ne u laka ange ‘i he vao ‘o e matāpule makau, ‘Io, ‘i he tu‘a ngoue vaine ‘a e tangata masiva loto;

³¹Pea tā kuo ‘alu hake ‘a e vao ‘o ‘osi, Kuo faliki ‘aki ‘a e talatala, Pea ko hono ‘āmaka kuo holo.

³²Pea u tu‘u ‘o sio, ‘O ‘ave ki ai hoku loto: Na‘a ku siofi, Na‘a ku ma‘u akonaki mei ai.

³³“Ka u mohe si‘i atu pē, Ka u ki‘i kemo hifo mu‘a, Ha‘aku ki‘i mohe fehulunaki.” —

³⁴Tā ‘e hoko kiate koe ha masiva hangē ha pāpani; Mo e fusimo‘omo hangē ha tangata to‘o mahafu.