Read KO E TOH TAPU KATOA TONGA PALŌVEPI 25 Bible Online

PALŌVEPI 25 - KO E TOH TAPU KATOA TONGA bible

PALŌVEPI 25

¹KO eni foki ‘ani palōvepi ‘a Solomone, ‘A ia na‘e hiki ‘e he kau tangata ‘a Hesekaia ko e Tu‘i Siuta.

²Ko e lāngilangi ‘o e ‘Otua ke fufū me‘a: Ka ko e lāngilangi ‘o e ngaahi tu‘i ke hakule me‘a.

³Ko e langi, ko ‘ene mā‘olunga. Pea ko māmani, ko ‘ene taumama‘o, Mo e finangalo ‘o e ngaahi tu‘i — ko e ta‘emahakulea ia.

⁴‘Ave ‘a e efe mei he siliva, Pea ‘e ‘alu atu mei ai ha ipu ki he tufunga:

⁵‘Ave ‘a e angahala mei he ‘ao ‘o e tu‘i, Pea ‘e tu‘u hono taloni ‘i he faitotonu.

⁶‘Oua ‘e fai hangē ko ha ‘eiki ‘i he ‘ao ‘o e tu‘i, Pea ‘oua ‘e tu‘u ‘i he potu ‘o ha‘a mā‘olunga;

⁷He ‘oku ngutuhua ange ke nau pehē mai kiate koe, “Ma‘uma‘u hake,” ‘I hao tuku ki lalo ‘i ha ‘eiki, ‘A ia na‘a ke kilo ki ai ‘anenai.[46]

⁸‘Oua ‘e ‘alu fakavave ke hopo mo ha taha, Na‘a iku ki he me‘a ni, “Ko e hā ‘au ‘e fai?” ‘oka fakamaa‘i koe ‘e he toko taha ko ē.

⁹Ka ai ha‘amo fakakikihi mo ha taha, fai pē, Kae‘oua ‘e fakahā ai ‘a e me‘a ne tala fufū ‘e ha taha kehe:

¹⁰Na‘a fakaongokovi‘i koe ‘e ia ‘oku fanongo, Pea ‘ikai toe foki mai ho ongoongolelei.

¹¹Koni ‘āpele koula ‘i he ‘ainga siliva, Ko e lea ia ‘oku tautaungamālie hono lea‘aki.

¹²Ko e hau koula, Mo e kahoa koula tongi, Ko e malanga poto ia mo e telinga ‘oku fanongo.

¹³Ko e fakamokomoko ‘aki ‘a e sinou ‘i he taimi ututa‘u, Ko e tuha ia ‘o e talafekau tōnunga ki he kakai na‘e fekau ia: He ‘oku ne fakamānava hake hono hou‘eiki.

¹⁴Ko e loa mo e matangi, kae ‘ikai ‘uha, Ko e tangata ia ‘oku pōlepole he‘ene foaki loi.

¹⁵Ko e fakama‘uma‘u ‘ete ‘ita, ‘e fakaloto‘i ai ‘a e angi; Pea ‘oku fesi hui ‘e he ‘elelo molū.

¹⁶Kuo ke ‘ilo ha honi? kai pē ke fe‘unga mo koe; Na‘a ke pāhia ai, ‘o ke lua‘aki.

¹⁷Fakasi‘isi‘i ki he tu‘u ho va‘e ki he fale ‘o ho kaume‘a; Na‘a faifai pea ne pāhia ‘iate koe, ‘o fehi‘a.

¹⁸Ha kolo mo ha heletā mo ha ngahau māsila, Ko e tangata ia ‘oka tu‘u ko e fakamo‘oni loi ki hono kaungā‘api.

¹⁹Ko e nifo kuo hele, Mo e va‘e kuo heu, Ko e falala ia ki he kākā ‘i he ‘aho ‘o e faingata‘a.

²⁰Ko e to‘o hoto kote he ‘aho momoko, Ko e lingi ‘a e vinika ki he sota, Ko e tuha ia ‘o e hiva ‘ani hiva ki he loto kovi.

²¹Kapau ‘oku fiekaia ho fili, Fafanga ia; Kapau ‘oku ne fie inua, ‘Ange hano inu:

²²He ko ho‘o fai pehē, Te ke fokotu‘u ai ‘a e ngaahi malala‘i afi ki hono ‘ulu; Pea ko Sihova te ne totongi ai kiate koe.

²³Ko e matangi tokelau ‘oku ne fakatupu ‘uha; Pehē ‘a e fofonga mamahi ‘e ha ‘elelo lau fufū.

²⁴‘Oku ngutuhua ange ‘ete nofo ‘i ha tuliki ‘o ha tu‘a fale, ‘I he‘ete ‘apitanga mo ha fefine fa‘a kē.

²⁵Ko e vai momoko ki ha taha mate he fie inu, Ko e tuha ia ‘o e ongoongolelei mei ha fonua mama‘o.

²⁶Ko e matavai kuo kele‘i, Mo e fauniteni kuo maumau, Ko e faitotonu ia kuo uesia ‘i he ‘ao ‘o e angahala.

²⁷Ko e kai honi lahi ‘oku ‘ikai lelei: pea ‘oku pehē pē mo e fiema‘u lāngilangi.[47]

²⁸Ko e kolo kuo holo, ‘o ‘ikai kei ai hano ‘ā, Ko e tangata ia ‘oku ‘ikai mapuke hono loto.