Read KO E TOH TAPU KATOA TONGA PALŌVEPI 26 Bible Online

PALŌVEPI 26 - KO E TOH TAPU KATOA TONGA bible

PALŌVEPI 26

¹Hangē ha sinou ‘i he fa‘ahita‘u māfana, Mo ha ‘uha ‘i he ututa‘u, Pehē ‘ene ta‘ehoa mo ha vale ke ma‘u hingoa.

²Hangē ha misi kuo sese‘e, Hangē ha pekepeka ‘oku siutaka, Pehē ko e tuki tu‘unga‘a ‘e foki kiate kita.[48]

³Ko e uipi ki he hoosi, Ko e piti ki he ‘asi, Mo e loholoho ki he tu‘a ‘o e vale.

⁴‘Oua te ke tali ha vale ‘o tatau mo ‘ene vale, Na‘a ke tatau mo ia ‘a koe foki.

⁵Tali ha vale ‘o tatau mo ‘ene vale, Na‘a ne poto ‘i he‘ene vakai ‘a‘ana.

⁶‘Oku ne tu‘usi hono va‘e, ‘Oku ne inu mamahi, Ha taha ‘oku fakafai ‘i ha vale ‘ene fekau.

⁷Hangē ‘oku tāupe ‘a e ongo va‘e ‘o e heke. ‘Oku pehē ‘a e palōvepi ‘i he ngutu ‘o e vale.

⁸Hangē ko ‘ete ‘ai ha makakoloa ‘i ha makatā, ‘Oku pehē ‘ete ‘ai ‘i ha vale ha hingoa fakanofo.[49]

⁹Ko e va‘a talatala ‘oku hiki ‘e he nima ‘o e tangata konā, Ko e tuha ia ‘o ha palōvepi ‘i he ngutu ‘o e vale.

¹⁰‘Oku hangē ha taha fana ngahau noa‘ia ha taha ‘oku ne unga ha vale pe ko ha konā.[50]

¹¹Hangē ha kulī ‘oku foki ki he‘ene lua, ‘Oku pehē ‘a e toe fai ‘e he vale ‘ene vale.

¹²Ko ho‘o ‘ilo leva ha tangata ‘oku poto ‘i he‘ene vakai ‘a‘ana, Te tau ‘amanaki ki ha vale ‘i he toko taha ko ia.

¹³Ko e lea ‘a e makau ‘oku pehē, “Tokua ‘oku ai ha manu fekai ‘i he hala; ‘Oku taka ha laione ‘i kolo!”

¹⁴Hangē ko e fefoki‘aki ‘a e matapā ‘i he hīnisi, ‘Oku pehē ‘a e makau ‘i hono mohenga.

¹⁵Kuo velo ‘e he makau na hono nima ki he tisi; ‘E taiki ‘ene toe hiki ia ki hono ngutu.

¹⁶‘Oku poto hake ‘a e makau ‘i he‘ene vakai ‘a‘ana ‘i ha toko fitu ‘oku lava ha tali mālie.

¹⁷Ko e puke ha telinga ‘o ha kulī, Ko e tuha ia ‘o ha tangata fononga ‘Oku ne hanga ‘o kaunoa ‘i ha kē.

¹⁸Hangē ha faha ‘oku lī fano ni potu‘i afi, Koni ngahau, Mo e me‘a ke mate ai;

¹⁹Ko e tatau tofu pē ia ‘o e tangata ‘oku ne kākaa‘i hono kaungā‘api, ‘O ne toki pehē, “Ikai ko ‘eku va‘inga pē?”

²⁰‘I he ‘osi ‘a e fefie ‘oku mate ‘a e afi, Pea ‘i he ‘ikai ha ‘ave lau ‘oku tuku ‘a e kē.

²¹Hangē ha makafefie ‘oku hunuaki ‘aki ha malala, Pea hangē ha va‘akau ‘oku fetolonaki mo ha potu‘i afi. ‘Oku pehē ha tangata anga kē, ‘ene tafunaki ‘a e vākovi.

²²Ko e ngaahi lea ‘a e tama ‘ave lau ‘Oku hangē ko e ngaahi ma‘anga ngako: Pea ko e fa‘ahinga ko ia ‘oku ‘alu hifo Ki he loto he loto‘i kete.

²³Ko e efe‘i siliva ‘oku pani ‘aki ‘a e ipu ‘umea,[51] Ko e ngutu māfana ia mo e loto kovi.[52]

²⁴Ko ia ‘oku fehi‘a, ‘Oku ne ha matamatakehe ‘i hono ngutu, Ka ‘i loto ‘oku ne fai hā puleaki.

²⁵Kapau te ne ‘ai hono le‘o ke ngali ‘ofa mai, ‘Oua te ke tui kiate ia; He ‘oku ai ha fitu‘i fakalielia ‘i hono loto na:

²⁶Te ne ‘ufi‘ufi nai ‘ene fehi‘a ‘aki ha fu‘u kākā. Kae tatala hono kovi ‘i he fakataha.

²⁷Ko ia te ne keli ha luo te ne tō ki ai ‘e ia; Pea ko ia ‘oku ne fakateka hake ha maka, ‘e foki pē kiate ia.

²⁸Ko e ‘elelo loi ‘oku fehi‘a kiate kinautolu ‘oku lavea ai; Pea ko e ngutu fakaheke ‘oku fakatupu tōkilalo.