Read KO E TOH TAPU KATOA TONGA PALŌVEPI 3 Bible Online

PALŌVEPI 3 - KO E TOH TAPU KATOA TONGA bible

PALŌVEPI 3

¹TAMA, ‘oua ‘e ngalo ‘eku akonaki; Kae tauhi ‘e ho loto ‘eku ngaahi tu‘utu‘uni;

²He ‘e fakalahi ai ki he me‘a ‘oku ke ma‘u ‘Aki ‘a e nofo fuoloa, mo e ngaahi ta‘u mo‘ui, mo e tu‘umālie.

³Ke ‘oua ‘e mahu‘i meiate koe ‘a e anga‘ofa mo e fai mo‘oni: Ha‘i kinaua ki ho kia; Tohi kinaua ki he tohi‘anga ‘o ho loto:

⁴Ko ia te ke ma‘u ai ‘a e ‘ofa mo e ongoongolelei ‘I he ‘ao ‘o e ‘Otua mo e tangata.

⁵Falala ki he ‘Eiki ‘aki ‘a e kotoa ‘o ho loto, ‘O ‘oua ‘e faaki ki ho poto ‘o‘ou:

⁶Ke ke fakaongo kiate ia ‘i ho hala kotoa pē, Pea ‘e fakatonutonu ‘e ia ho ngaahi ‘alunga.

⁷‘Oua te ke lau ‘e koe ‘oku ke poto: Ke ke ‘apasia kia Sihova, pea afe mei he kovi;

⁸Ko e faito‘o leva ia ki ho pito, Mo e ngako ki ho ngaahi hui.

⁹Fai ha faka‘apa‘apa ki he ‘Eiki ‘aki ho‘o koloa, Mo e me‘a mei he polopolo ‘o ho fua kotoa pē:

¹⁰Ko ia ‘e fonu ai ho ngaahi feleoko ‘i he mahu, Pea ‘e puna ‘a e uaine fo‘ou mei ho tata‘o‘anga.

¹¹Tama, ‘oua te ke va‘inga‘aki ho ako ‘oku fai ‘e he ‘Eiki; Pea ‘oua te ke kina ‘i ho tautea ‘e ia:

¹²He ko ia ‘oku ‘ofa ki ai ‘a e ‘Eiki ‘a ia ‘oku ne kinisi; ‘Io, hangē ko e fai ‘e ha tamai ki hono foha pele.

¹³Monū‘ia ā ka ko e tangata kuo ne ‘ilo ‘a poto, Mo e tangata kuo ne ma‘u mai ‘a e mafai-ke-‘ilo;

¹⁴He ‘oku lelei ange ‘a e ‘alu holo hono fakatau ‘i he siliva, Pea ko e fua ‘oku te ma‘u ai, ‘i he koula mo‘onia.

¹⁵‘Oku ne mahu‘inga ange ‘i he makakula koloa; Pea neongo pe ko e hā ho manako ‘e ‘ikai ala fakatatau ki ai.

¹⁶‘Oku ne to‘o ‘i hono to‘omata‘u ‘a e mo‘ui fuoloa; Pea ‘i hono to‘ohema ‘a e koloa mo e ongoongo.

¹⁷Ko hono ngaahi hala ko e koto mālie, Pea ko e koto melino hono ngaahi afenga kotoa pē.

¹⁸Ko e ‘akau-‘o-e-mo‘ui ia kiate kinautolu ‘oku puke ia: Pea ‘oku monū‘ia ‘a kinautolu ‘oku kuku ki ai.

¹⁹Ko poto na‘e langa ai ‘e Sihova ‘a e fonua; Na‘a ne fokotu‘u ‘a e langi ‘aki ‘a e mafai-ke-sivi.

²⁰Ko ‘ene ‘ilo na‘e fakapā ai ‘a e ngaahi matavai ‘o e moana, Pea ‘oku tulutā hifo ai ‘a e hahau mei he ngaahi ‘ao.

²¹Tama, ‘oua na‘a puli kinaua mei ho mata; Tauhi ‘a Tokoni mo Fakakaukau;

²²Ko e mo‘ui leva ia ki ho laumālie, Mo e teunga ki ho kia.

²³Te ke toki ‘alu nonga pē ‘i ho hala, Pea ‘e ‘ikai tūkia ho va‘e.

²⁴‘Oka ke ka tokoto, ‘e ‘ikai te ke manavahē: ‘Io, te ke tokoto, pea holo ho‘o mohe.

²⁵‘Oua te ke manavahē ki ha hoko fokifā ha fakailifia, Pe ‘i he tō mai ha ha‘aha‘a‘i matangi ‘a ha kau angahala:

²⁶He ko Sihova leva ho falala‘anga, Pea te ne tauhi ho va‘e ke ‘oua na‘a mo‘ua.

²⁷‘Oua te ke ta‘ofi ha lelei meiate kinautolu ‘oku ‘onautolu ia, ‘Osi, ‘oku mafai ‘e ho nima ke fai.

²⁸‘Oua te ke pehē kiate ia ‘oku mo alea, “‘Alu, ka ke toki ha‘u, Pea ‘a pongipongi te u ‘atu;” ‘Osi, ‘oku ke lolotonga ma‘u.

²⁹‘Oua te ke fakakaukau‘i ha kovi ke fai ki ho kaungā‘api, ‘Osi, ‘oku ne nofo‘aki koe.

³⁰‘Oua te ke fakakikihi tu‘unga‘a pē mo ha tangata, ‘O kapau kuo ‘ikai te ne fai ha kovi kiate koe.

³¹‘Oua te ke faka‘amua ha tangata fai fakamālohi, Pea ‘oua te ke fili ha taha ‘o hono ngaahi founga.

³²He ko e tangata anga piko ‘oku fakalili‘a ki ai ‘a Sihova: Ka ko e kau anga tonu ‘oku nau talanoa fafale mo ia.

³³Ko e mala ‘a Sihova ‘oku ‘i he fale ‘o e kau angahala Ka ‘oku ne tāpuaki‘i ‘a e nofo‘anga ‘o e faitotonu.

³⁴Ka fai mai ‘ani kata kakae, ‘e kata kakae atu mo ia: Ka ko si‘i anga vaivai ‘oku ne tali ‘ofa ki ai.

³⁵‘E tō ki he kau poto honau tofi‘a ko e ongoongo: Ka ko e kau vale ko honau ‘inasi mu‘a ko e mā.