Read KO E TOH TAPU KATOA TONGA PALŌVEPI 31 Bible Online

PALŌVEPI 31 - KO E TOH TAPU KATOA TONGA bible

PALŌVEPI 31

¹KO E ngaahi lea ‘a Lemiueli ko e Tu‘i Masa: Ko e me‘a na‘e akonekina ia ‘e he‘ene fa‘ē.

²Ko e hā ‘eku lea ‘e fai, nga‘ata? ‘Io, ko e hā, na‘i tama ‘a hoku mānava? Ko e hā fua, tama ne u tukumo‘ui ai?

³‘Oua ‘e ‘atu ho ivi ki he kau fefine, Pe le‘ei ho ngaahi founga ki he fa‘ahinga fakaka‘anga tu‘i.

⁴‘E Lemiueli, ‘oku ‘ikai ma‘a e ngaahi tu‘i — ‘Oku ‘ikai ma‘a e ngaahi tu‘i ke inu uaine; Pe ko e kau pule ke faka-kī-kava:

⁵Na‘a inu ia, ‘o ngalo ‘a e me‘a kuo tu‘utu‘uni; ‘O le‘ei ‘a e totonu ‘o si‘i ha‘a masiva.

⁶‘Atu ‘a e kava mālohi kiate ia ‘oku tei mate, Mo e uaine kiate kinautolu ‘oku kona honau loto;

⁷Ke ne inu, ‘o ngalo ai ‘ene masiva, ‘O ‘ikai kei manatu ‘ene tu‘utāmaki.

⁸To‘o ho fofonga ma‘a e fa‘ahinga ta‘emalea; Ma‘a e totonu ‘o e fānau ‘a e kakai ‘oku mole atu.

⁹To‘o ho fofonga, fakamaau totonu: Pea taukapo‘i ‘a e mā‘ulalo mo e fusimo‘omo.

¹⁰Ko e uaifi fita, ko hai te ne ma‘u? He ko hono mahu‘inga ‘oku hulu ‘i he makakula koloa.

¹¹‘Oku falala kiate ia ‘a e loto ‘o hono husepāniti, Pea ‘i he taufa‘ao ke ma‘u koloa, ‘e ‘ikai te ne masiva.

¹²Ko e lelei te ne fai ma‘ana, ‘o ‘ikai ko e kovi, ‘I he ngaahi ‘aho kotoa ‘o ‘ene mo‘ui.

¹³‘Oku ne kumi fulufulu‘i sipi, mo e falakesi; ‘O ne ngaohi ia ‘aki ha nima fie ngāue.

¹⁴Ko e vaka fakatau tofu pē ia ‘ene ‘omi ‘ene me‘akai mei he mama‘o.

¹⁵‘Oku ne tu‘u hake foki kei po‘uli, ‘O tufa me‘akai ki hono fāmili, Mo e ‘inasi ki he‘ene kau fefine.

¹⁶‘Oku ne fakakaukau ki ha konga vao, ‘o fakatau ia: Ko e pa‘anga ‘oku hū mai ‘i he ngāue ‘a hono nima ‘Oku tō ‘aki ha ngoue vaine.

¹⁷Ko hono no‘o vala ko e fai mālohi, Pea ‘oku ne fakafefeka hono nima.

¹⁸‘Oku ne sivi, tā kuo fua lelei ‘ene fakatau: Talu ai ‘oku ‘ikai mate ‘ene maama ‘i he pō.

¹⁹Ala ‘e hono nima ko ē ki he tu‘unga amo; Puke ‘e hono louhi‘i ko ē ‘a e mīsini filofilo.

²⁰Ko e louhi‘i ai pē ko ia ‘oku ne humaki atu ki he mā‘ulalo, Pea ko e nima ai pē ko ia ‘oku ne ala ‘aki ki he masiva.

²¹‘Oku ‘ikai te ne manavahē ki he sinou Telia hono fāmili; He ‘oku kofu hono fāmili kotoa ‘Aki ‘a e me‘a kulokula.

²²‘Oku ne ngaohi me‘a fakamolū ma‘ana, ‘A e tupenu hina mo e kula po‘upo‘uli moana kofu.

²³Ko e tangata ‘iloa hono husepāniti ‘i he matanikolo, ‘I he‘ene nofo mo e mātu‘a ‘o e fonua.

²⁴‘Oku ne ngaohi tupenu sote, ‘o fakatau, Pea ‘oku ne ‘atu no‘o ki he kau Finisia.

²⁵Ko hono vala takai ko e mo‘umo‘ua mo e tu‘unga mā‘olunga. Pea ‘oku ne kata ki he ‘aho ‘amui.

²⁶Ko e to‘o hono ngutu ko e koto poto; Pea na‘e nofo ‘a e lao ‘ofa ‘i hono funga ‘elelo.

²⁷‘Oku ne lama ‘a e ngaahi ‘alunga ‘o hono fāmili; Pea ‘oku ‘ikai te ne kai ‘a e me‘akai ‘a e fakapikopiko.

²⁸‘Oku tu‘u hake ‘ene fānau, ‘o nau tala monū ki ai: Ko hono husepāniti foki, ‘o ne fakamālō kiate ia, ‘o pehē.

²⁹“‘Oku tokolahi ‘a e ngaahi ‘ōfefine kuo fai fita; Ka ko koe kuo ke hulu ‘iate kinautolu kotoa.”

³⁰Ko e matamatalelei ko e me‘a ‘e ‘ikai ala falala ki ai, Pea ko e hōihoifua ko e me‘a hāmolofia: Ko e fefine ‘oku ‘apasia kia Sihova, Ko eni ia ‘e fakamālō‘ia.

³¹Tuku hano ‘inasi mei he fua ‘o hono nima, Pea ke ne ma‘u fakamālō ‘i he ngaahi matanikolo, ‘I he ngaahi me‘a kuo ne fai.