Read KO E TOH TAPU KATOA TONGA PALŌVEPI 4 Bible Online

PALŌVEPI 4 - KO E TOH TAPU KATOA TONGA bible

PALŌVEPI 4

¹KAU tama, fanongo ki he akonaki ‘oku ‘atu fakatamai, Pea tokanga mai ke mou ma‘u poto:

²He ko e koloa lelei ‘oku ou ‘atu; ‘Oua te mou hiki mei he‘eku fale‘i.

³He ko e taha au na‘e loto‘aki ‘e he‘eku tamai, Fakakelesi ‘e he‘eku fa‘ē ko ‘ene me‘a pē taha. Pea ne akonaki au.

⁴‘O ne pehē mai: Ke puke ma‘u ‘eku ngaahi lea ‘e he loto; Tauhi ‘eku ngaahi tu‘utu‘uni ka ke mo‘ui:

⁵Fakatau ma‘au ‘a e poto, Fakatau ma‘au ‘a e mafai-ke-‘ilo: ‘Oua ‘e ngalo, Pea ‘oua ‘e afe mei he lea ‘oku ou pu‘aki.

⁶‘Oua ‘e li‘aki ‘a e taha ko ia, pea te ne tauhi koe; Ke ke ‘ofa kiate ia, pea te ne lehilehi‘i koe.

⁷Ko e kamata ke poto ‘a‘eni: Fakatau ma‘au ‘a e poto: ‘Io, neongo ‘oku ke totongi ‘aki ‘a e me‘a kotoa kuo ke lava, Fakatau ‘a e mafai-ke-‘ilo.

⁸Fakahīkihiki‘i ia, pea te ne hiki koe ki ‘olunga: Te ne fakapale‘i koe, ‘o kapau te ke fā‘ofua kiate ia.[3]

⁹Te ne ‘ai ki ho ‘ulu ha pale te ke faka‘ofo‘ofa ai: Te ne hilifaki hao kalauni matamatalelei.

¹⁰Fanongo mai, tama, ‘o tali ‘eku ngaahi lea; Pea fakalahi ai ‘a e ngaahi ta‘u ‘o ho‘o mo‘ui.

¹¹Kuo u ako koe ‘i he hala ki he poto; Kuo u taki koe ‘i he ngaahi ‘alunga ‘o e totonu.

¹²‘Oka ke ka laka atu, ‘e ‘ikai te ke fakave‘eve‘etuia; Pea kapau te ke lele, ‘e ‘ikai te ke humu.

¹³Pukenima ‘a e akonaki; ‘Oua ‘e tukuange: Tauhi ke ma‘u; He ko ho‘o mo‘ui ia.

¹⁴‘Oua ‘e hū ki he hala ‘o e kau angahala, Pea ‘oua ‘e ‘alu ‘i he founga ‘o e kakai kovi.

¹⁵Ta‘ofi mei ai, ‘Oua ‘e tu‘u ai; Afe mei ai, Pea laka atu ki kō.

¹⁶He ko e fa‘ahinga ko ē ‘oku ‘ikai te nau mamohe, ‘Oka kuo te‘eki fai ha kovi; ‘Io, ‘oku mole ‘enau mohe, ‘Oka kuo te‘eki ke nau fakahinga ha ni‘ihi.

¹⁷He ko ‘enau me‘akai ‘oku ma‘u ‘i he fai kovi pē, Pea nau toki inu ‘a e kava ‘oku ma‘u mei he fakamālohi.

¹⁸He ko e ‘alunga ‘o ha‘a faitotonu ‘oku hangē ko e maama hengihengi, ‘A e fakautuutu ‘ene maama ‘o a‘u ki he ho‘atā mālie.

¹⁹Ko e hala ‘o e kau angahala ko e koto po‘uli lōlō: ‘Oku ‘ikai te nau ‘ilo ‘a e me‘a ‘oku nau humu ai.

²⁰Tama, tokanga ki he‘eku ngaahi lea; Fokotu‘u telinga mai ki he me‘a ‘oku ou lau.

²¹‘Oua na‘a puli ia mei ho mata; Tauhi ia ‘i ho loto‘i loto.

²²He ko e mo‘ui‘anga ia ‘o kinautolu kuo nau ma‘u ia, ‘Io, ko e me‘a faito‘o te ne fālute hoto sino kotoa.

²³‘I he me‘a kotoa ‘oku ke tauhi, mu‘omu‘a ‘a e lama ‘o ho loto, He ‘oku founga mei ai ‘a e ngaahi me‘a ‘oku ‘asi ‘i he mo‘ui.

²⁴Ko e ngutu mamio, tuku ia; Pea fakamama‘o mei he loungutu feāfeaki.

²⁵Ko e me‘a ki ho mata, ke sio fakahangatonu mu‘a, Pea fakamama‘u ho laumata ki he me‘a ‘oku ke hanga ki ai.

²⁶Fakatokalelei ‘a e hala ‘oku ‘alu ai ho va‘e, Pea fakatotonu ho ngaahi ‘alunga kotoa pē.

²⁷‘Oua ‘e afe ki he to‘omata‘u pe ko e to‘ohema: Ta‘aki ho va‘e mei he kovi.