Read KO E TOH TAPU KATOA TONGA PALŌVEPI 5 Bible Online

PALŌVEPI 5 - KO E TOH TAPU KATOA TONGA bible

PALŌVEPI 5

¹TAMA, tokanga ki he poto kuo u a‘u ki ai; Fokotu‘u telinga mai ki he me‘a kuo u ‘ilo:

²Koe‘uhi ā ke ke tauhi ‘a e ngaahi fakakaukau; Pea ke lama ‘e ho ngutu ke ‘atu pē ‘a e me‘a ‘oku ke ‘ilo.

³He ko e ngutu ‘o e pa‘umutu ‘oku to‘i mei ai ‘a e honi, Seuke, ko hono me‘a fakalea ‘oku momole ange ‘i he lolo;

⁴Ka ko hono fakaiku ‘oku ifo kovi hangē ko e teve, Māsila hangē ha heletā matafuhifuhi.

⁵Ko e va‘e ‘o e fefine ko ia ‘oku hifo ai pē kia Mate; Ko ‘ene taulaka ‘oku fakahangatonu ki Lolofonua.

⁶Ko e fefine ko ia — koloto ke ne hae atu ke ma‘u ‘a e hala ‘o e mo‘ui: ‘Oku fepikopikoaki ‘ene ‘alu ki he me‘a ‘oku ‘ikai te ne ‘ilo ki ai

⁷Pea ko eni, kau tama, fanongo mai; Pea ‘oua ‘e afe mei he lea ‘oku ou pu‘aki.

⁸Le‘ei ho hala ke mama‘o mei he fefine ko ia, Pea ‘oua te ke ofi ki hono matafale.

⁹Na‘a ‘iloange te ke tuku ke mole ho tangata ki ha ni‘ihi kehe, Mo e fu‘u konga ‘o ho‘o mo‘ui ki he fa‘ahinga fekai.

¹⁰Na‘a ‘iloange ‘e mo‘umo‘ua ha kau muli ‘i he koloa ‘a‘au; Pea hū ‘a e fua ‘o ho‘o ongosia ki he fale ‘o ha kehe;

¹¹Pea ‘e iku pē ki ho‘o nofo to‘e, Kuo ka‘anga ho kakano mo ho sino kotoa.

¹²Pea ke pehē, Ko e hā ai na‘a ku fehi‘a ki he akonaki, Pea fakasīkaka‘i ‘e hoku loto ‘a e fakapoto;

¹³Pea na‘e ‘ikai te u tokanga ki he le‘o ‘o e kakai na‘e ako mai, Pea na‘e ‘ikai te u fokotu‘u telinga ki hoku kau tiuta?

¹⁴Na‘e ‘ikai mei ai ha kovi te u ta‘efai[4] ‘I he lotolotonga ‘o e kakai mo e fakataha.

¹⁵Ma‘u ho vai inu mei ho lepa pē ‘o‘ou, Mo ho‘o holi vai tufu ke lahi, mei ho‘ou pē vai.

¹⁶Ke tangikafa ho fauniteni ki mala‘e, Kae ‘i ai ‘ani manga‘i vai ‘i he ngaahi hala.

¹⁷Ke ‘a‘au pē tāfataha, ‘O ‘oua ‘e kau ai hani muli.

¹⁸Ke monū‘ia ho ‘ana vai; Pea ke ma‘u fiefia mei ho uaifi fakatalavou.

¹⁹Ko si‘i tia loto‘aki! Mo si‘i kaseli hōihoifua! Ke ke topono ai pē ‘i hono ongo huhu; Ke ke to‘oa ai pē ‘i he‘ene veveho mai.

²⁰He ko e hā ai, tama, ke ke to‘oa ha fefine muli, Mo pīkitai ki he fatafata ‘o ha kehe?

²¹He ‘oku fe‘ao mo Sihova ‘a e ngaahi ‘alunga ‘o e tangata, Pea ‘oku ne hae atu ki hono ngaahi founga kotoa.

²²Ko e angahala ko ia ‘oku pō ia ‘i he ngaahi kovi ‘a‘ana, Pea te ne mo‘uha‘ia ‘i he ngaahi kafa ‘o ‘ene ngaahi angahala.

²³Ko e toko taha ko ia te ne mate ko e masiva kinisi; ‘Io, ‘i he lahi ‘o ‘ene vale te ne mo‘uhēa pē.