Read KO E TOH TAPU KATOA TONGA PALŌVEPI 6 Bible Online

PALŌVEPI 6 - KO E TOH TAPU KATOA TONGA bible

PALŌVEPI 6

¹TAMA, kapau kuo ke hoko ko e talifaki ma‘a ho kaungā‘api, Kuo ke ‘atu ho nima ma‘a ha kehe.

²Tā kuo ke fihia ‘i he ngaahi lea ‘a ho ngutu, Tā kuo kafai koe ‘i he ngaahi lea ‘a ho ngutu.

³Sī! fai eni, tama, ‘o fakahaofi koe, He kuo ke hū ki he ‘aofi nima ‘o ho kaungā‘api: ‘Alu fakavave, pea kole ta‘ota‘o ki ho kaungā‘api.

⁴‘Oua ‘e tuku ho mata ke mohe, Pe ko ho laumata ke tule.

⁵Fai ke ke hao; Hangē ha kaseli na‘e puke, Pe ha manupuna kuo puke ‘e he tulimanu.

⁶‘Alu ki he lō, ‘a e makau na; Siofi hono ngaahi ‘alunga, ka ke ma‘u poto:

⁷‘A ia ‘oku ‘ikai hano angi, Hano ‘ōfisa, Pe pule.

⁸Tokonaki pē ia ‘ene me‘akai ‘i he fa‘ahita‘u māfana, Pea kuo ne tānaki ‘i he taimi ututa‘u ‘ene me‘a tokoni.

⁹‘a e makau na, ‘e ngata ‘afē ho‘o tokoto na? ‘Afē te ke tu‘u mei ho‘o mohe?

¹⁰“Ka u mohe si‘i atu pē Ka u ki‘i kemo hifo mu‘a, Ha‘aku ki‘i mohe fehulunaki” —

¹¹Tā ‘e hoko kiate koe ‘a e masiva hangē ko e pāpani, Mo e fusimo‘omo hangē ha tangata to‘o mahafu!

¹²Sī! ko e tangata faka-Pileali ē, Ko e siana kovi — ‘Oku faiva ‘aki ‘a e ngutu piko‘i;

¹³‘Oku talanoa kakamo, ‘Oku talanoa tūva‘e, ‘Oku talanoa tutuhu.

¹⁴Ko e me‘a ‘i hono loto ko e makaka, ‘Oku ne nofo he taimi kotoa pē, ‘o fa‘u kovi ke fai; ‘Oku ne humaki atu ni kē.

¹⁵Ko ia, tuaiekemo kuo a‘u atu hono nunu‘a, Fokifā kuo faka‘auha, ‘o ‘ikai hano faito‘o.

¹⁶Tū ‘oku ai ha ono‘i me‘a ‘oku fehi‘a ki ai ‘a Sihova — ‘Isa! ko e fitu ‘oku fakalili‘a ki ai hono finangalo:

¹⁷Ko e matahihiki, Ko e ‘elelo loi, Mo e nima ‘oku lingi toto ta‘ehalaia;

¹⁸Ko e loto ‘oku fa‘u fakakaukau kovi, Ko e va‘e ‘oku lele fakavave ki he faikovi.

¹⁹Ko e fakamo‘oni kākā ‘oku hō‘aki loi; Mo ia ‘oku humaki kē ke maumau ‘a e vā ‘o e kāinga.

²⁰Tama, ke ke tauhi ‘a e fekau ‘a ho‘o tamai, Pea ‘oua ‘e keu‘i ‘a e lea ‘a ho‘o fa‘ē:

²¹Ha‘i kinaua ki ho loto ma‘u ai pē, Takai kinaua ‘i ho kia.

²²‘I ho‘o ‘alu fano, te ne taki tonu koe; ‘I ho‘o tokoto, te ne le‘ohi koe; Pea ‘i ho‘o ‘ā, te ne talanoa mo koe.

²³He ko e fekau ko ia ko e tūhulu; Pea ko e lea ko ia ko e maama; Pea ko e ngaahi tautea ako ko e hala ki he mo‘ui:

²⁴Ke ta‘ofi koe mei he fefine kovi, Mei he fakaoleole ‘a e ‘elelo kehe.

²⁵‘Oua ‘e holi ho loto ki hono hōihoifua; Pea ‘oua na‘a pukea koe ‘e hono laumata.

²⁶He ko e ‘ātunga ‘o e fai mo e pa‘umutu, Kuo a‘u ha tangata ki ha momo‘i pisikete: Pea ko e fefine faka‘ulia ‘Oku ne tuli ke pō ha laumālie mahu‘inga.

²⁷‘E hikofi koā ‘e ha tangata ha afi, ‘o ‘ai ki hono fatafata, ‘O ‘ikai mōfia hono kofu?

²⁸‘E lava ‘e ha tangata ke ha‘ele ‘i he funga maka ‘afu, ‘O ‘ikai vela hono va‘e?

²⁹Pehē ko e ‘alu ha taha ki he uaifi ‘o hono kaungā‘api — ‘E ‘ikai ta‘etautea ha taha ‘oku ala ki he fefine pehē.

³⁰‘Oku ‘ikai te tau lau ko e kua ha taha kaiha‘a,[5] ‘O kapau ko ‘ene fai ke fakaili ‘ene mo‘ui hōngea;

³¹Kae‘uma‘ā ka ma‘u, te ne totongi lō fitu nai; ‘Io, ‘o ‘atu ‘a e koloa kotoa ‘o hono fale.

³²Ko ia ‘oku tono‘i ha fefine ko e taha masiva ‘atamai; Ko e fakapoongi ‘o‘ota — ha taha ‘oku fai pehē.

³³Ko e me‘a ‘oku ne ma‘u ko e loholoho mo e mā; Pea ko hono lau‘i ‘e ‘ikai mate.

³⁴He ko e fua‘a ko e tatā ‘a ha mafi; Pea ‘e ‘ikai te ne faka‘atu‘i ‘i he ‘aho ‘o e sauni.

³⁵Neongo pe ko e hā ‘a e holo te ke ‘atu, ‘e ‘ikai te ne tokanga ki ai, Pea neongo ho‘o fakalahi tala me‘a‘ofa fufū, ka ‘e ‘ikai tali.