Read KO E TOH TAPU KATOA TONGA PALŌVEPI 7 Bible Online

PALŌVEPI 7 - KO E TOH TAPU KATOA TONGA bible

PALŌVEPI 7

¹TAMA, tauhi ‘eku ngaahi lea; Pea ko ‘eku ngaahi fekau, fa‘o ki he kānokato ke fe‘ao mo koe.

²Tauhi ‘eku ngaahi fekau, pea te ke mo‘ui; ‘Io, tauhi ‘eku lao ‘o hangē ko ho tama‘imata.

³Takai ia ki ho ngaahi tuhu; Tohi ia ‘i he tohi‘anga ‘o ho loto.

⁴Lea kia Poto, Ko hoku tokoua koe; Pea ui ‘a Mafai-ke-‘ilo, Ko si‘oku kaume‘a.

⁵Ke tauhi koe mei he fefine faka‘ulia, Mei he fefine muli ‘oku lea fakaoleole.

⁶He na‘a ku tu‘u ‘i he kātupa ‘o hoku fale, Pea u fakasio ki tu‘a ‘i he lulu vangavanga;

⁷Pea u ‘ilo ha tu‘unga hehemangofua, ‘O u vakai ‘i he kau tama ha talavou masiva ‘atamai.

⁸‘Oku ne ‘eve‘eva ‘i he hala ofi ki he tuliki ‘o e fale ‘o e fefine, ‘O ne fou ai pē ‘i he hala ki hono fale;

⁹‘I he ataata, ‘i he po‘uli mai ‘a e ‘aho, ‘I he tu‘uapō mo e kaupō‘uli.

¹⁰Pea tā ko e fefine ena ‘oku fakafetaulaki mai kiate ia, Kuo teu hangē ha pa‘umutu, pea ko e koto taulama hono loto.

¹¹Ko e anga maveu ia mo lomingata‘a; Koloto ke pā ki lalo hono va‘e ‘i hono fale ‘o‘ona:

¹²‘Iloange pē kuo ne ‘i matafale, ‘Iloange kuo ne ‘i ha taha ‘o e ngaahi hala, Pea ko e tuliki fē ‘oku ‘ikai te ne toka tata‘o ai.

¹³Pea puke ‘e ia ‘a e siana, ‘o ‘uma ki ai, ‘O ne fakamatafeka ‘o lea kiate ia:

¹⁴“Kuo ‘iate au ‘ani feilaulau faka‘osi; Ko e ‘aho ni kuo u faka‘osi ‘eku tukumo‘ui;

¹⁵Ko hono ‘uhinga ia ‘o ‘eku hū ki tu‘a ke fakafetaulaki atu, Ko ‘eku ha‘ao si‘o mata, Pea tā kuo u ma‘u koe.

¹⁶Kuo u teu hoku longa ‘aki ‘a e me‘a fakamolū, ‘A e ‘ufi‘ufi pulepule, ‘a e siti mei ‘Isipite;

¹⁷Kuo u afuhi ‘aki hoku mohenga ‘a e kaloni mula, ‘alosi, mo e sinamoni.

¹⁸Ha‘u ange, ke ta inu fakaputa ‘a ‘ofa, ‘O a‘u ki he ma‘a ‘a e ‘aho; Pea tā fai ‘ofa ke topono.

¹⁹He ‘oku ‘ikai ‘i ‘api ‘a e tangata‘eiki, ‘Oku ‘alu ‘ene fononga ki he potu mama‘o:

²⁰Kuo ‘alu mo ia ha kato pa‘anga; Te ne toki foki ki ‘api ‘oka kātoa ‘a e māhina.”

²¹Na‘a ne oloa ia ‘i he lahi ‘o ‘ene lau, ‘Oku ne fauna ia ‘aki ‘a e lau ‘a hono ngutu.

²²Ko e kemo kuo ne muimui atu, ‘O hangē ko e ‘alu ‘a ha pulu ki he fale tāmate manu, Pe hangē ha kulī ki he tautea ‘o e vale,[6]

²³Hangē ko e fakavave ‘a e manupuna ki he hele ‘O ‘ikai ‘ilo ko e me‘a ki he‘ene mo‘ui, Kae‘oua ke ‘asi ‘a e ngahau ‘i hono ‘ate.

²⁴Pea ko eni, kau tama, fanongo kiate au, Pea tokanga ki he ngaahi lea ‘oku ou pu‘aki.

²⁵‘Oua ‘e afe ho loto ki he ‘alunga ‘o e fefine ko ē, Pea ‘oua te ke hē ‘i hono ngaahi laka‘anga.

²⁶He ‘oku tokolahi ‘a e kafo he‘ene tulaki; Pea ka lau fakataha ‘a e kakai kuo ne fakapoongi ko e fu‘u hōsitē.

²⁷Ko hono fale ko e koto hala ki Vanu, ‘Oku nau hifo kotoa pē ki he ngaahi loki ‘o Mate.