Read KO E TOH TAPU KATOA TONGA PALŌVEPI 8 Bible Online

PALŌVEPI 8 - KO E TOH TAPU KATOA TONGA bible

PALŌVEPI 8

¹‘IKAI ‘oku kalanga ‘a Poto, Pea tuku hake ‘e ‘Atamai hono le‘o?

²‘I he funga ‘o e ngaahi malele ki hala lahi, ‘I he loto hala kehekehe, Kuo ne tu‘u atu;

³‘I he tafa‘aki matanikolo, ‘I he potu ‘oku ‘alu ai ki tua‘ā, Pea ‘i he hū‘anga mai ki kolo, ‘Oku fai ‘ene fanongonongo.

⁴‘Oku ou ui kiate kimoutolu, hou‘eiki: Pea ‘oku fai ‘eku lea ki he kainanga ‘o e fonua.

⁵‘a e kau hehemangofua, mou ‘ilo pe ko e hā ‘a e fakapotopoto; Pea ko e kau sesele, ke mou ‘ilo ‘a e anga ‘o e ‘atamai.

⁶Fanongo, he te u ‘a‘au ‘a e ngaahi me‘a faka‘ei‘eiki; Pea ko e mafa‘a hoku ngutu ko e koto totonu ia.

⁷He ko e me‘a ‘oku tōtō mai mei hoku ‘ao‘ingutu ko e mo‘oni pē; Pea ‘oku fakalili‘a ‘e hoku loungutu ki he me‘a hala.

⁸‘Oku fou ‘i totonu ‘a e ngaahi lea ‘oku ou pu‘aki; ‘Oku ‘ikai ha me‘a ‘i ai ‘oku mio‘i pe fakakehe;

⁹Ko e koto ‘au‘autotonu ‘i he vakai ‘a e kau poto, Pea toka totonu ki he kakai kuo a‘usia ‘a e ‘ilo.

¹⁰To‘o ‘eku akonaki, kae tuku ‘a e siliva; ‘Io, to‘o mu‘a ‘a e ‘ilo ‘i he koula kuo sivi.

¹¹He ‘oku lelei hake ‘a e poto ‘i he makakula koloa; Pea neongo pe ko e hā ho manako ‘e ‘ikai ala fakatatau ki ai.

¹²Ko au Poto ‘oku ou fale ‘aki ‘a e fakapotopoto, Pea ko e ‘ilo fakakaukau ko hoku faiva ia.

¹³Ko e ‘apasia kia Sihova ko e fehi‘a ki he kovi; Ko e lotohiki mo e fie‘eiki, Mo e ‘alunga kovi, Pea mo e ngutu mamio ‘oku ou fehi‘a ki ai.

¹⁴‘Oku ‘a‘aku ‘a e fale‘i, Mo e tu‘utu‘uni poto; Ko ‘Ilo au, ‘Oku ‘a‘aku ‘a Ivi.

¹⁵‘Oku tu‘i ‘a e ngaahi tu‘i ko au, Pea fai ‘e he ngaahi kōvana ‘enau pule totonu;

¹⁶‘Oku pule ‘a e kau pule mo e hou‘eiki ko au, ‘A e kau fakamaau kotoa pē ‘o māmani.

¹⁷‘Oku ou ‘ofa kiate kinautolu ‘oku ‘ofa kiate au; Pea ko kinautolu ‘oku kumi hengihengi kiate au te nau ma‘u au.

¹⁸Ko e koloa mo e ongoongo ‘oku fe‘ao mo au, Ko e koloa tukufakaholo mo e ‘atu hono taau;

¹⁹‘Oku lelei ‘eku fua ‘i he koula kuo sivi mo fakama‘a; Mo e foha hoku ta‘u ‘i he siliva fungani.

²⁰Ko e hala ‘o e faitotonu ‘oku ou ha‘ele ai, Ko e loto hala ‘o e fakakonisitūtone;

²¹Ke ‘ange ha tofi‘a mo‘oni kiate kinautolu ‘oku ‘ofa kiate au, Pea ke fakafonu ‘enau fale koloa.

²²Na‘e ma‘u au ‘e Sihova ko e kamata ‘o ‘ene fai atu, Ko e mu‘aki ‘o ‘ene ngaahi ngāue talu mei tuai.

²³Na‘e fokotu‘u au talu ‘ītāniti, Talu ‘a e kamata‘anga, Talu e ngaahi mu‘aki taimi ‘o māmani.

²⁴‘I he te‘eki ai ha ngaahi loloto, na‘e fanau‘i au, ‘I he te‘eki ai ha ngaahi fauniteni fonu vai,

²⁵Te‘eki ke tanu ‘uhu‘i ‘a e ngaahi mo‘unga, Ki mu‘a atu ‘i he ngaahi mā‘olunga na‘e fanau‘i au:

²⁶Kuo ‘ikai te ne ngaohi ‘a e fonua, Mo e ngaahi feitu‘u ‘i tu‘a, Mo e ‘uluaki ‘o e ngaahi funga ‘o māmani.

²⁷‘I he‘ene teu ‘a e ngaahi langi na‘a ku ‘i ai: ‘I he‘ene ‘ai ha aku ki he funga ‘o e loloto;

²⁸‘I he‘ene ‘ai ke ma‘u ‘a e ‘atānoa mei ‘olunga; He taimi na‘e fai mālohi ai ‘a e ngaahi fauniteni ‘o e loloto:

²⁹‘I he‘ene ‘ai ki he ‘ōseni ‘ene tu‘utu‘uni, Pea ki he tahi, ke ‘oua te nau laka ‘i he me‘a kuo ne fekau. ‘I he‘ene ‘ange ‘a e ngaahi tu‘unga ‘o māmani,

³⁰Ko e taimi ko ia na‘a ku ‘i hono tafa‘aki, Ko e tufunga lahi,[7] ‘O u hākailangitau he ‘aho kotoa pē; ‘O u fiefia ‘i hono ‘ao he taimi kotoa pē;

³¹‘O u lata ki he ngaahi potu ‘o hono māmani na‘e nofo‘anga kakai; ‘Io, ko ‘eku neka na‘e ‘i he hako ‘o ‘Ātama.

³²Pea ko ‘eni, kau tama, mou fanongo kiate au: He monū‘ia ā ka ko kinautolu ‘oku tauhi hoku ngaahi ‘alunga.

³³Tali ‘a e akonaki, ka mou poto; Pea ‘oua ‘e hiki mei ai.

³⁴Monū‘ia ā ka ko e tangata ‘oku fanongo kiate au, He le‘o hoku ngaahi matapā he ‘aho hokohoko, Nofo‘aki tali ‘i he ngaahi pou ‘o hoku matafale.

³⁵He ka ta‘imālie ha taha, ‘o ma‘u au, ‘Oku ne ma‘u mo‘ui Pea kuo ne lavengamālie ‘i he ‘ofa meia Sihova;

³⁶Ka ko ia ‘oku ne tovale mo au, Ko e tamakitangata ‘oku ne fai; Ko ia fua pē ‘oku fehi‘a kiate au ‘Oku ne ‘ofa ki he mate.