Read KO E TOH TAPU KATOA TONGA KOHELETI 12 Bible Online

KOHELETI 12 - KO E TOH TAPU KATOA TONGA bible

KOHELETI 12

¹TAMA, ke ke fiefia ‘i ho‘o toki tupu; pea fakafiefia‘i koe ‘e ho loto ‘i ho taimi talavou, pea ke fou ‘i he ngaahi hala ‘oku sio ki ai ho loto, pea ‘i he ngaahi me‘a ‘oku sio ki ai ‘e ho mata: ka ke ‘ilo ‘e fakahopo koe ‘e ‘Elohimi ki he fakamaau koe‘uhi ko e ngaahi me‘a ko ia. Pea hu‘i ‘a e hoha‘a mei ho loto, pea ‘ave ‘a e kovi mei ho kakano: he ko e si‘i mo e fatutangata ko e muna pē.

²Pea manatu ki he ‘Āfifio na‘e ngaohi koe[24] Lolotonga ho‘o talavou: Te‘eki hoko ‘a e ngaahi ‘aho kovi, Te‘eki a‘u mai ‘a e ngaahi ta‘u, ‘A ia te ke pehē ai, ‘Oku ‘ikai vovo ha me‘a kiate au: Te‘eki ke nenefu ‘a e la‘ā, Mo e maama, Mo e māhina, Mo e ngaahi fetu‘u, Pea foki ‘a e ngaahi ‘ao hili ‘a e ‘uha.

³‘a e ‘aho ‘e tete ai ‘a e kau tauhi fale, Pea fehapekaki ‘a e tu‘unga tangata mālohi, Pea tuku ‘a e ngāue ‘a e kau momosi ko ‘enau toko si‘i, Pea nenefu ‘a e kau sio ‘i he tupa,

⁴Pea songo ‘a e ongo lau matapā ki hala, ‘I he muhumuhu pē ‘a e fale momosi: Pea te ne tu‘u hake he kio ‘a e fuleheu, Pea ko e kau ta‘ahine hiva ‘e olo lalo.

⁵‘Oku nau manavahē foki ki he me‘a ‘oku mā‘olunga, Pea ‘oku ‘i hala na ha koto fakailifia; Pea ‘oku tangitangi ‘a e alamoni, Pea ‘oku hoko ‘a e he‘e ko e kavenga, Pea ‘ikai kei mavivi ‘a e ‘akau o‘i.[25] He ‘oku fononga ‘a e tangata ki hono fale tupu‘a, Pea ‘oku fe‘alu‘aki ‘a e kau tangi ‘i hala.

⁶Te‘eki vete ‘a e filo siliva, Mo foa‘i ‘a e ipu koula, Pe maumau ‘a e siā ‘i he fauniteni, Mo laiki ‘a e sāliote fusi ‘i he vaikeli:

⁷Pea foki ‘a e efu ki he kelekele, ‘O hangē ko ‘ene ‘i ai mu‘a; Pea foki ‘a e laumālie kia ‘Elohimi ‘A ia na‘a ne tuku mai ia.

⁸Muna ‘o e muna! — ko e lea ia ‘a Koheleti — ko e muna ‘a e me‘a kotoa pē.

⁹‘Oku toe pē ke fakahā ko e poto ‘a Koheleti, ko ia na‘a ne kei fai atu ‘ene ako ‘a e kakai ‘i he ‘ilo me‘a, ‘o ne fifili mo fakatotolo me‘a. Na‘a ne fa‘u ha ngaahi paloveepi lahi.

¹⁰Na‘e ha‘ao ‘e Koheleti ke ma‘u ha ngaahi lea vovo, mo e me‘a kuo tohi totonu, ko e ngaahi lea ‘e ala falala ki ai.

¹¹Ko e ngaahi lea ‘a e kau poto ‘oku hangē ia koni tao fakateka pulu; pea ko e ngaahi me‘a pehē ‘oku kau ‘i ha kaunga ‘oku hangē koni fa‘o kuo fakama‘u — ‘oku ‘omi kotoa mei ha tauhi pē taha.[26]

¹²Pea ka ko ha me‘a atu-tama, ka u fale‘i koe: ‘oku ‘ikai hano ngata‘anga ‘o e fa‘u tohi ke lahi, pea ko e fa‘a lau tohi ko e me‘a fakaongosia kakano.

¹³Ko e ngata‘anga ‘eni ‘o e me‘a: kuo ‘a‘au hono kotoa. Ke ke ‘apasia kia ‘Elohimi, ‘o tauhi ‘ene ngaahi fekau; he ko e kotoa ‘o e tangata ia.

¹⁴He ‘e ‘omi ‘e ‘Elohimi ‘a e ngāue kotoa ki he fakamaau, kae‘uma‘ā ‘a e me‘a kotoa ‘oku fufū, pe ‘oku lelei ia, pe kovi.