Read KO E TOH TAPU KATOA TONGA KOHELETI 4 Bible Online

KOHELETI 4 - KO E TOH TAPU KATOA TONGA bible

KOHELETI 4

¹PEA u foki ai ‘o vakai ‘a e ngaahi fakamālohi kehekehe ‘oku fai ‘i he lalo la‘ā: pea vakai, ko e lo‘imata ē ‘o si‘i fakamālohia, kae ‘ikai ha taha ke fakafiemālie kiate kinautolu; ‘io, ‘i he feitu‘u ‘a fakamālohi na‘e ai ha fefeka, kae ‘ikai ha taha ke fai ha fakafiemālie ki he fa‘ahinga ko ē.

²Pea u fakamālie‘ia ‘a e kau pekia kuo loa ‘enau pekia, ‘o lahi ‘i he kakai mo‘ui, ‘a e fa‘ahinga ‘oku lolotonga ni;

³ka ‘oku lelei hake ‘iate kinaua ‘osi pē ‘a e toko taha kuo te‘eki ke ‘i ai, ‘a ia kuo te‘eki ke ne mamata ki he ngāue kovi ‘oku fai ‘i he lalo la‘ā.

⁴Na‘a ku vakai foki ‘a e fakafitefita‘a kehekehe, mo e me‘a kotoa pē ‘oku fai ke mafai, tā ko e koto meheka pē ia ‘a e taha ki he taha. Ko e muna mo ia foki, mo e kai matangi.

⁵Ko e vale ‘oku ne fehulunaki nima, ‘o kai hono kakano ‘o‘ona.

⁶‘Oku lelei hake ha falukunga ‘e taha mo e fiemālie ‘i ha falukunga ‘e ua ō mo e fakaongosia mo e kai matangi.

⁷Pea u foki ai ‘o vakai ‘a e muna ‘i he lalo la‘ā.

⁸Ko e taha ē ‘oku nofo toko taha, ‘oku ‘ikai foki hano foha pe tokoua; ka ‘oku ‘ikai ha ngata‘anga ‘o ‘ene ngāue kehekehe; ‘oku ‘ikai fiu foki hono mata ‘i he sio koloa- “Pe ko ‘ete fakaongosia ma‘a hai nai, mo fakamasiva lelei ‘eku mo‘o ui? “Ko e muna mo ia foki, mo e fakaongosia kovi.

⁹‘Oku ngutuhua ange ke toko ua ‘i he‘ete toko taha; he ‘oku ‘i he‘ena ngāue ha totongi lelei.

¹⁰He kapau te na tō, ‘e lava ‘e he taha ke ‘ohake hono kaume‘a: ka ‘oiauē ‘a e toko taha ‘oku tō, ka ‘oku ‘ikai ha taha mo ia ke ‘ohake!

¹¹Kae‘uma‘ā, ka fetākoto‘i ha toko ua, te na māfana: kae māfana fēfē ha toko tefua?

¹²Kae‘uma‘ā foki, kapau ‘e ‘ohofia toko taha ‘a Me‘a, ‘o lava, kuo ne matu‘u nai, ‘oka ne toko ua; pea ko e afo tu‘o tolu ‘e ‘ikai motu vave.

¹³‘Oku ngutuhua ange ha talavou ‘oku mā‘ulalo kae poto, ‘i ha tu‘i ‘oku motu‘a kae vale, ‘a ia ‘oku ‘ikai te ne kei ongo ki he fale‘i.

¹⁴He ‘oku ‘alu atu ‘a ē mei he fale pilīsone ke tu‘i, neongo na‘e fanau‘i ia ‘i hono pule‘anga ko e masiva.

¹⁵Na‘a ku sio ki he kakai mo‘ui kotoa, ‘a ia ‘oku nau ha‘ele ‘i he lalo la‘ā, ‘oku nau tu‘u mo e talavou, ‘a hono ua, ‘a ia nai te ne fetongi ‘a ē.

¹⁶Na‘e ‘ikai hano ngata‘anga ‘o e fu‘u kakai, ‘io, ‘a e kakai kotoa na‘a ne tāimu‘a ki ai: ka neongo ia ka ko e kakai ‘e hoko ‘amui ‘e ‘ikai te nau fiefia ‘iate ia. Seuke, ko e muna mo ia foki mo e kai matangi.