Read KO E TOH TAPU KATOA TONGA KOHELETI 5 Bible Online

KOHELETI 5 - KO E TOH TAPU KATOA TONGA bible

KOHELETI 5

¹LAMA ho va‘e ‘i ho‘o ‘alu ki he fale ‘a ‘Elohimi: he ko e ‘unu‘unu ke fanongo pē, ‘oku lelei hake ‘i ha ‘atu feilaulau ‘a ha kau vale. Seuke, ko ‘enau ta‘e‘ilo ‘oku nau fai kovi ai.[8]

²‘Oua na‘a ‘oho ho ngutu, pea ‘oua na‘a vave ho loto ke laku lea ki tu‘a ‘i he ‘ao ‘o ‘Elohimi; he ‘oku ‘i langi ‘a ‘Elohimi, kae ‘i māmani pē koe: ko ia, ‘ai ke si‘i ho‘o lea.

³He ‘oku tupu ‘a e fa‘a misi ‘i he lahi ‘o e me‘a ‘oku mo‘ua ai ‘a e loto; pehē ‘oku tupu mei ha fu‘ufu‘unga lau ha lea vale.

⁴Kapau kuo ke fai ha tukumo‘ui ki he ‘Otua, ‘oua te ke fakatuai ke fai: he ‘oku ‘ikai ha hōifua ‘i he kau sesele: ko e tukumo‘ui kuo ke tala, fai.

⁵‘Oku ngutuhua ange ha‘o ta‘efai ha tukumo‘ui, ‘i ha‘o fai kae ‘ikai fakaai.

⁶‘Oua na‘a tuku ho ngutu ke fakaangahala‘i ho sino; pea ‘oua te ke lea ‘i he ‘ao ‘o e ‘āngelo, ‘o pehē, Ko ‘eku fai vale: koe‘uma‘ā ke houhau ‘a ‘Elohimi ‘i ho le‘o na, ‘o ne hae‘i ‘a e ngāue ‘a ho nima?

⁷He ‘oku ō mo e fa‘a misi ha koto muna; pea pehē ka lahi ha lau: ka ke ‘apasia koe kia ‘Elohimi.

⁸Kapau ‘oku ke sio ‘i ha vahefonua ki he fakamālohia ‘o e masiva, mo e maumau‘i ‘o e konisitūtone mo e totonu, ‘oua te ke tumu ‘i he me‘a ko ia: seuke, ‘oku lama ‘a e mā‘olunga ‘e ha taha ‘oku mā‘olunga hake; pea ‘oku ai mo ha ni‘ihi ‘oku toe mā‘olunga hake.

⁹Ka ko e fonua ‘oku hulu ‘i he me‘a kotoa pē ‘a ‘eni; ko e fonua ‘oku tu‘u ai ‘a e fatongia ki he tu‘i ‘i he ‘api.[9]

¹⁰Ko ia ‘oku manako siliva, ‘oku ‘ikai te ne mākona ‘i he siliva; pea ko ia ‘oku manako ki he fu‘ufu‘unga me‘a, ‘oku ‘ikai hano fua: ko e muna mo ia foki.

¹¹Ka tupu ke lahi ‘ete me‘a, ‘oku tokolahi ‘a e fa‘ahinga ke kai ia: pea ‘oku ‘amo atu ‘i he hā ‘a e tangata ‘oku ‘a‘ana? ngata pē ‘i he sio ki ai ‘aki hono mata.

¹²‘Oku melie ‘a e mohe ‘a e tangata ngāue, pe ‘oku si‘i ‘ene kai pe ‘oku lahi: ka ko e topono fau ‘a e koloa‘ia ‘a ia ‘oku ‘ikai te ne mamohe ai.

¹³‘Oku ai ha kovi ta‘ehano faito‘o kuo u mamata ki ai ‘i he lalo la‘ā, ko e koloa kuo tauhi ma‘ana ‘oku ‘a‘ana, kae iku ko hono kovi‘anga pē.[10]

¹⁴Pea mole ‘a e koloa ko ia ‘i ha fakakaukau kovi, pea ‘oku ne ma‘u ha foha, pea ‘oku ‘ikai ma‘u ‘e ia ha momo‘i me‘a.

¹⁵Hangē ko ‘ene hū mai mei he fatu ‘o ‘ene fa‘ē, pehē te ne foki telefua, ‘o ‘alu hangē ko ‘ene ha‘u, ‘o ‘ikai te ne ma‘u ha momo‘i me‘a ‘i he‘ene ngāue, ‘a ia te ne lava ke to‘o ‘o ‘alu mo ia.

¹⁶‘Āua ko e kovi ta‘ehano faito‘o eni: ko e tatau mātē ‘a ‘ene ha‘u pea mo ‘ene ‘alu: pea ko e hā ‘a e fua kiate ia ‘o ‘ene fakaongosia ma‘a e matangi?

¹⁷Kae‘uma‘ā ‘i hono ‘aho kotoa pē, ‘oku ne kai ‘i he po‘uli pē,[11] pea ‘oku lahi ‘ene fakahoha‘a: pea ‘oiau ‘ene mamahi mo ‘ene ‘ite‘ita!

¹⁸Siini ko e anga ‘o ‘eku sio ‘aku: ko eni pē ‘a e lelei, ko eni pē ‘a e faka‘ofo‘ofa: ke te kai mo inu, mo ‘ilo lelei ‘i he ngāue kehekehe ‘oku te fakafitefita‘a ai he lalo la‘ā, kae‘oua ke kakato ‘a e ngaahi ‘aho ‘o ‘ete mo‘ui, ‘a ia kuo tuku mai ‘e ‘Elohimi: he ko e ‘inasi ia ‘o e tangata.

¹⁹Ko eni foki; ‘ilonga ha tangata kuo foaki kiate ia ‘e ‘Elohimi ‘a e koloa mo e me‘a hulu, pea ‘oku ne fakamafai ke ne kai mei ai, pea ke tali hono ‘inasi, pea ke ma‘u fiefia ‘i he‘ene ngāue: tala atu, ko e me‘a foaki ‘a e ‘Otua ia.

²⁰He ‘oku ‘ikai te ne ongosia manatu ai ki he ngaahi ‘aho ‘o ‘ene mo‘ui; he kuo fakaai ‘e ‘Elohimi ‘aki ‘a e fiefia ‘i hono loto.