Read KO E TOH TAPU KATOA TONGA KOHELETI 7 Bible Online

KOHELETI 7 - KO E TOH TAPU KATOA TONGA bible

KOHELETI 7

¹‘OKU ngangatu ange ‘a e hingoa lelei ‘i he lolo tākai, Mo e ‘aho ‘o e pekia ‘i he ‘aho ‘o hoto fanau‘i.

²‘Oku lelei hake ke ‘alu ki ha fale ‘oku ‘i ai ha tangi, ‘i he ‘alu ki he fale ‘oku fai ai ha inu kava: he ko e me‘a ko ē ko e ngata‘anga ‘o e tangata kotoa pē, pea ko e tangata mo‘ui ‘oku ne ‘ai ia ki hono loto.

³‘Oku lelei hake ‘a e fakamamahi ‘i he kata: he ‘oku ō mo e fofonga mamahi ‘a e loto ‘oku taau.

⁴Ko e loto ‘o e poto ‘oku lata ki he fale ‘o e tangi, ka ko e loto ‘o e vale ‘oku lata ki he fale ‘o e fiefia.

⁵‘Oku lelei ange ‘a e fanongo ki he valoki ‘a e poto ‘i ha‘ate fanongo ki ha hiva ‘a ha kau sesele.

⁶He hangē ko e mumuhu ‘a e ‘akau talatala ‘i he lalo kulo, ‘oku pehē ‘a e kata ‘a e kau sesele. Pea ko e muna mo eni foki.

⁷Seuke, ko e fakamālohia ‘oku me‘a mo sesele ai ‘a e tangata poto; Pea ko e tali pa‘anga fufū ‘oku ne maumau‘i ‘a e loto.

⁸‘Oku lelei ange ‘a e iku‘anga ‘o ha me‘a ‘i hono kamata. ‘Oku lelei ange ‘a e anga mokomoko ‘i he anga fielahi.

⁹‘Oua na‘a ‘oho ho loto ke ‘ita: he ko e ‘ita ‘oku ne ngaohi hono nofo‘anga ‘i he fatafata ‘o e sesele.

¹⁰‘Oua te ke pehē, Ko e hā na‘e lelei ange ai ‘a e ngaahi ‘aho mu‘a‘i he ngaahi ‘aho ko eni? he ‘oku ‘ikai tupu mei he poto ho‘o fehu‘i pehē.

¹¹Ko e me‘a lelei ‘a e poto ‘oku ō mo ha tofi‘a: Pea ko e me‘a ‘aonga kiate kinautolu ‘oku mamata ki he la‘ā.

¹²He ko e poto ko e malu‘anga, ko e pa‘anga ko e malu‘anga: ka ‘oku hulu ‘a e ‘ilo, he ‘oku fakahaofi ‘e he poto ‘a e tangata ‘oku ma‘u ia.

¹³Sio lelei ki he ngāue ‘a ‘Elohimi. He ‘e lava ‘e hai ke fakatotonu ‘a e me‘a kuo ne ngaohi ke piko?

¹⁴‘I ha ‘aho lelei ke ke lelei, pea ‘i ha ‘aho kovi, sio lelei ki ai; kuo ngaohi foki ‘e ‘Elohimi ke fakatoukatea ‘a ē mo ē, koe‘uhiā ke ‘oua na‘a kitea ‘e ha tangata ha me‘a hili ‘ene pekia.[14]

¹⁵Ko e anga ‘o e me‘a kehekehe kuo u mamata ki ai ‘i hoku ngaahi ‘aho muna ni: ‘oku ai ha mā‘oni‘oni kuo mole neongo ‘ene mā‘oni‘oni; pea kuo ‘i ai ha faihala kuo tolonga neongo ‘ene faihala.

¹⁶‘Oua te ke mā‘oni‘oni fau; Pea ‘oua na‘a hulu ho‘o fakapotopoto: Koe‘uma‘ā ho‘o hoko ko e koto maumau?

¹⁷‘Oua te ke faihala fau; Pea ‘oua te ke hoko ko e vale: Koe‘uma‘ā ho‘o mate te‘eki hoko ho taimi?

¹⁸Ko hono lelei ke ke puke ki hē, kae ‘oua foki ‘e hamusi ho nima mei hē: he ko ia ‘oku ‘apasia ki he ‘Otua te ne hao mei ai kotoa.

¹⁹‘E malu‘i ha poto ‘e he‘ene poto, ‘O lahi ange ‘i ha hongofulu‘i mafi ‘oku ‘i ha kolo.

²⁰Seuke, ko e me‘a ki he tangata, ‘oku ‘ikai ha mā‘oni‘oni ‘i māmani, ‘a ia ‘oku ne fai lelei, ‘o ‘ikai angahala.

²¹Ko e me‘a foki ki he ngaahi lea ‘oku fai ‘e he kakai, ‘oua na‘a tokanga ho loto ki ai, na‘a ‘iloange te ke fanongo ki ho‘o tamaio‘eiki ‘oku ne talakaa‘i koe.

²²Seuke, ‘oku ‘ilo ‘e ho loto kuo tu‘o lahi ‘a e talakaa‘i ha kakai kehe ‘e koe foki.

²³Ko e me‘a ko ia kotoa kuo u sivi ‘aki ‘eku poto. Ne u lau te u a‘usia ‘a e poto: ka na‘e mama‘o pē ia meiate au.

²⁴‘Oku mama‘o atu ‘a e me‘a ‘oku ‘i ai, pea loloto — Loloto? ko hai te ne mahakule?

²⁵Tafoki ai au mo hoku loto ke ‘ilo mo ha‘ao mo kumi ki he poto, mo e ‘uhinga ‘o e ngaahi me‘a, pea ke u ‘ilo ko e angahala ko e fai vale, pea ko e fakasesele ko e vale ‘u‘ua.

²⁶Pea u ‘ilo ‘i he‘eku hakule ‘a e me‘a ni: ‘Oku kona ange ‘i he mate ‘a e fefine: he ‘oku ne hangē ko e ngaahi kupenga, pea ko e koto tauhele ‘a hono loto; ko hono nima ko e me‘a kii‘i; ‘ilonga ha taha ‘oku lelei‘ia ai ‘a ‘Elohimi te ne hao mei ai, ka ko e angahala te ne pō ‘e ia.

²⁷Sio mai ki he me‘a kuo u ma‘u ‘i he‘eku hakule — ko e lea ia ‘a Koheleti — ‘i he‘eku fakahoa ‘a ē mo ē ke u ‘ilo ‘a e tefito:

²⁸ko e me‘a kuo u kumi mo kumi ki ai ‘a hoku loto, ka ‘oku ‘ikai te u ma‘u, ‘a ‘eni: Kuo u ma‘u ha tangata ‘e toko taha ‘i he toko afe: ka ko ha fefine ‘i he fu‘u tokolahi pehē na‘e ‘ikai te u ma‘u.

²⁹Sio mai, ko eni pē e me‘a kuo u ma‘u: na‘e ngaohi ‘a e tangata ‘e ‘Elohimi ko e tonusika; ka kuo feinga‘i ‘e he fa‘ahinga ko ia ha fāliunga lahi.