Read KO E TOH TAPU KATOA TONGA KOHELETI 9 Bible Online

KOHELETI 9 - KO E TOH TAPU KATOA TONGA bible

KOHELETI 9

¹SEUKE, ko e me‘a ko ia kotoa ne u ‘ai ki hoku ‘atamai koe‘uhi ke u sivi ‘a e fu‘u me‘a ko ē — ‘a e fa‘iteliha ‘a ‘Elohimi ki he kau mā‘oni‘oni mo e kau poto pea mo ‘enau ngāue; mo e ‘ikai ‘ilo ‘a e kakai pe ko e ‘ofa, pe ko e ‘ita, ‘a e me‘a kehekehe ‘oku ‘i honau ‘ao.

²‘Oku hoko tatau ‘a e me‘a kotoa ki he kakai fuli pē:[18] ‘oku hoko ‘a e me‘a pē taha ki he mā‘oni‘oni mo e angakovi, ki he lelei, mo e ma‘a, mo e ta‘ema‘a; ki he kakai foki ‘oku ‘atu feilaulau, pea kiate kinautolu ‘oku ‘ikai ke ‘atu feilaulau. Hangē ko ‘ene hoko ki he lelei, ‘oku pehē ‘ene hoko ki he angahala; tatau ‘a ia ‘oku fuakava mo ia ‘oku manavahē ke fuakava.

³Ko eni pē ha kovi ‘i he me‘a kehekehe ‘oku fai ‘i he lalo la‘ā, ‘a e hoko ‘a e me‘a pē taha ki he kakai kotoa. Kae‘uma‘ā foki ‘a e fonu kovi ‘a e loto ‘o e hako‘i tangata, pea ‘oku ai ha vale ‘u‘ua ‘i honau loto lolotonga ‘enau mo‘ui, pea hili ia pea nau ‘alu ki he kau pekia.

⁴He ‘ilonga ha taha kuo fakahoko ki he kau mo‘ui ‘oku ai ‘ene ‘amanaki,[19] — seuke, ‘oku lelei hake ha kulī mo‘ui ‘i ha laione mate

⁵— he ko e kau mo‘ui ‘oku nau ‘ilo ai pe te nau pekia: ka ko e kau pekia ‘oku ‘ikai te nau ‘ilo ha momo‘i me‘a, pea ‘oku ‘ikai te nau kei sio totongi; he kuo mole ‘a e manatu kiate kinautolu.

⁶Ko ‘enau ngaahi ‘ofa foki, mo ‘enau ngaahi fehi‘a, mo ‘enau ngaahi meheka, kuo loa pē ‘enau mole; pea ‘oku ‘ikai hanau kei kaunga ‘o ta‘engata ‘i he me‘a kehekehe ‘oku fai ‘i he lalo la‘ā.

⁷‘Alu ā; kai ho‘o me‘akai mo e fiefia, pea inu ho‘o uaine mo e loto fiemālie; he kuo loa ‘a e fiemālie ‘a ‘Elohimi ki ho‘o ngaahi ngāue na.

⁸Ke hinehina ho ngaahi kofu ‘i he taimi kotoa pē; pea ke ‘oua na‘a masiva pani ho ‘ulu.

⁹Fai atu ho‘o nofo mo ho uaifi ‘oku ke ‘ofa ki ai ‘i he ngaahi ‘aho kotoa pē ‘o ho‘o mo‘ui muna, ‘a ia kuo ‘atu mo‘ou ‘i he lalo la‘ā, ‘io, ‘a e ‘aho kotoa ‘o ho muna; he ko ho ‘inasi ia ‘i he mo‘ui, pea ‘i he ngāue ‘oku ke fakafitefita‘a ai ‘i he lalo la‘ā.

¹⁰Ko ia kotoa ‘oku ‘ilo ‘e ho nima te ne mafai, fai‘aki ho ivi; he ‘oku ‘ikai ha ngāue, pe ha fakakaukau, pe ha ‘ilo, pe ha poto ‘i Lolofonua, ‘a e feitu‘u ‘oku ke fononga ki ai.

¹¹Foki au, ‘o u vakai ‘i he lalo la‘ā, tā ko e pue ‘oku ‘ikai ko e me‘a ‘a e ve‘e vave pē, pea ko e tau ‘oku ‘ikai ko e me‘a ‘a e kau mafi pē; pehē foki ko e me‘akai ‘oku ‘ikai ko e me‘a ‘a e poto pē, mo e koloa ‘oku ‘ikai ko e me‘a ‘a e ma‘u ‘atamai pē, kae‘uma‘ā ‘a e tokangaekina, ‘oku ‘ikai ko e me‘a ‘a e kakai ‘ilome‘a pē; he ‘oku hokonoa ki he fa‘ahinga kotoa pē ‘a e faingamālie mo e tu‘utāmaki.

¹²He na‘a mo e tangata ‘oku ‘ikai te ne ‘ilo hono faingamālie; hangē ko ha ika ‘oku mo‘ua ‘i ha kupenga matatonu, pea hangē ko e fanga misi ‘oku mo‘ua ‘i he hele — hangē ko e fa‘ahinga ko ia ‘oku ma‘u puke ‘a e hako ‘o e tangata ‘i ha faingatāmaki ‘oka hoko fakafokifā pē ia kiate kinautolu.

¹³Ko e me‘a ko eni foki kuo u sio ki ai, ‘o kau ki he poto ‘i he lalo la‘ā, pea matamata lahi ia kiate au.

¹⁴Ko e ki‘i kolo, pea toko si‘i ‘a e kakai ‘i ai; pea ha‘u ki ai ha tu‘i lahi, ‘o ne ‘ākolo‘i, ‘o ne langa ha ngaahi taua lalahi mōno tau‘i.

¹⁵Pea na‘e ‘ilo ai ha tangata tu‘a na‘e poto, pea fai‘aki ‘e ia ‘ene poto, ‘o ne fakahaofi ‘a e kolo; kae ‘ikai ha taha ‘e manatu ki he tangata tu‘a ko ē.[20]

¹⁶Pea u pehē ‘e au, Tā ‘oku lelei ange ‘a e poto ‘i he ngū lahi: ka ‘oku ta‘etoka‘i ‘a e poto ‘a si‘i tu‘a, pea ‘oku ‘ikai ongo ‘ene ngaahi lea.

¹⁷Ko e lea malū ‘a e poto ‘oku ongo lahi ‘I he kaila hoha‘a ‘a e angi ‘a e kau vale.

¹⁸‘Oku lelei hake ‘a e poto ‘i he mahafu tau; Ka ko e angahala ‘e toko taha ‘oku ne maumau‘i ha lelei lahi.