Read KO E TOH TAPU KATOA TONGA HIVA ‘O E HIVA 4 Bible Online

HIVA ‘O E HIVA 4 - KO E TOH TAPU KATOA TONGA bible

HIVA ‘O E HIVA 4

¹SIINI, ‘oku ke faka‘ofo‘ofa, ‘alā hoku ‘ofa‘anga, ‘Io, ‘oku ke faka‘ofo‘ofa. Ko e ongo lupe tofu pē ‘a si‘o mata Mei he loto veili; Ko ho lau ‘oku hangē ha tākanga kosi ‘Oku makalava mei Mo‘unga Kiliati.

²Ko ho nifo na ‘oku hangē ha tākanga sipi kuo kosi, ‘A ia kuo hake mei he kaukau Ko e kau māhanga kotoa pē, ‘O ‘ikai ha ‘ulutefua ai.

³Ko si‘o ongo loungutu na ‘oku hangē ha filo kula ‘aho‘aho, Pea faka‘ofo‘ofa ‘a e mafa‘a ‘o ho ngutu. Hangē ha ‘io‘i pomikānite ho manifinifihanga ‘Ene hā mei he loto veili.

⁴Ko si‘o u‘a na ‘oku hangē ko e taua ‘o Tēvita, ‘Oku langa ko e ngaahi langi,[5] ‘A ia ‘oku tautau ai ‘a e afe‘i pā, Ko e mahafu kotoa ‘a e kau helo.

⁵Ko si‘o ongo huhu na ko e ua‘i manu mui tofu pē; Ko e māhanga‘i kaseli, ‘Oku kaikai he potu lile‘ia.

⁶Ka u ‘alu mu‘a au ki mo‘unga mula, Pea ki sia laipeno, Kae ‘oua ke mokomoko ‘a e ‘aho. Mo ngalo atu ‘a e ngaahi ‘ata.

⁷‘Oku ke fufuli ‘aupito, ‘alā hoku ‘ofa‘anga, Pea ‘oku ‘ikai hao mele.

⁸Si‘oku polo‘i, ta ō mo au ki he mātanga ‘o Lepanoni; ‘Io, ta tu‘u mo au, ‘o sio hifo mei Lepanoni, Mei he tumutumu ‘o ‘Āmana, Mei he tumutumu ‘o Sēnili mo Heamoni, Mei he ngaahi ‘ana laione, Mei he ngaahi mo‘unga lēpati‘ia.

⁹Sī‘oku tuofefine-uaifi, Kuo ke ‘ai ke u moalo‘oa; Kuo ke puke hoku loto ‘aki ha‘o fo‘i hila, ‘Aki ha fo‘i kahoa ‘i ho u‘a na.

¹⁰Hono ‘ikai tu‘utai ho‘o ngaahi tō‘onga ‘ofa, ‘Alā, ko si‘oku tuofefine-uaifi! Hono ‘ikai ngutuhua ange ho‘o ‘ofa ‘i he uaine, Mo e nanamu ho ngaahi pani ‘i he me‘a namu kakala fua pē!

¹¹Ko ho loungutu na ‘oku to‘i honi, Si‘oku polo‘i, Ko e honi mo e hu‘akau ‘oku ‘i ho lalo ‘elelo, Pea ko e nanamu ho ngaahi kofu ‘oku hangē ko e nanamu ‘o Lepanoni.

¹²Ko e ngouetapu kei loka‘i ‘A si‘oku tuofefine-uaifi: Ko e fauniteni kei loka‘i, Ko e matavai sila‘i.

¹³Ko ho‘o ngaahi ‘akau ko e ‘ā pomikānite, ‘O fio ai mo e ngaahi fua mahu‘inga; Koni saipālesi, fio ai ‘a e fa‘ahinga na‘ati.

¹⁴Ko e na‘ati mo e ango, Ko e kaho namu kakala mo e sinamoni, Fio ai ‘a e fa‘ahinga laipeno kehekehe: Ko e mula mo e ‘ālosi, Fio ai ‘a e ngaahi fungani ‘akau namu kakala.

¹⁵Ko e matavai fakaviviku ngoue, Ko e vaikeli ‘o e vai mo‘ui, Koni vai ‘oho mei Lepanoni.

¹⁶‘Ā mai tokelau; pea ha‘u mo e tonga; Fakahavilivili ‘a e ngouetapu ni ‘a‘aku; Fakataufa atu hono ngaahi namu kakala: Kae ha‘u ‘a hoku ‘ofa‘anga ki he‘ene ngouetapu ni, ‘O kai ‘a e ngaahi fua ‘oku ne mahu‘inga‘ia ai.

¹⁷Kuo u hū ki he‘eku ngouetapu, ‘alā, Ko si‘oku tuofefine-uaifi; Kuo u toli ‘eku mula mo e fa‘ahinga me‘a namu kakala, Kuo u kai ‘eku honi mo e nge‘esi, Kuo u inu ‘eku uaine fakataha mo ‘eku hu‘akau.

¹⁸Kai ā, ongo me‘a; Inu, ‘io, inu ‘ofa ke hulu!