Read KO E TOH TAPU KATOA TONGA HIVA ‘O E HIVA 6 Bible Online

HIVA ‘O E HIVA 6 - KO E TOH TAPU KATOA TONGA bible

HIVA ‘O E HIVA 6

¹KUO laka ki fē ho ‘ofa‘anga, Si‘i fefine hōihoifua taha? Kuo afe ki fē ho ‘ofa‘anga, Ka tau kumi ki ai fakataha mo koe?

²Kuo ‘alu hifo hoku ‘ofa‘anga ki he‘ene ngouetapu, Ki he ngaahi puke ‘akau kakala, Ke fai ‘ene tauhi sipi ‘i he ngaahi ngouetapu, Pea ke toli lile.

³Ko au ‘oku ‘o hoku ‘ofa‘anga, Pea ko hoku ‘ofa‘anga ‘oku ‘o‘oku: Ko hono fanga‘anga manu ko e potu lile‘ia.

⁴‘Oku ke faka‘ofo‘ofa, ‘alā ko hoku ‘ofa‘anga, Hangē ko Tīlisa, Matamatalelei hangē ko Selusalema, Mamalu hangē ko ha tau fuka‘ia.[8]

⁵Sio kehe ho ongo mata na, He kuo na ikuna au. Ko ho lau ‘oku hangē ha tākanga kosi ‘Oku makalava mei Kiliati.

⁶Ko ho nifo na ‘oku hangē ha tākanga lami, ‘A ia kuo ‘alu hake mei he kaukau; Ko e kau māhanga kotoa pē, ‘O ‘ikai ha ‘ulutefua ai.

⁷Hangē ha ‘io‘i pomikānite ho manifinifihanga, ‘Ene hā mei ho loto veili.

⁸‘Oku toko onongofulu ‘a e kuini, Pea valungofulu ‘a e sinifu, Pea ta‘efa‘alaua ‘a e tāupo‘ou.

⁹Ka ‘oku toko taha pē si‘eku lupe, Si‘eku ta‘emele, Ko e me‘a pē taha ‘a ‘ene fa‘ē, Ko e pele ‘a‘ana na‘e fā‘ele‘i ia, Na‘e sio kiate ia ‘a e kau ta‘ahine, ‘O nau lau monū ki ai; Mo e ngaahi kuini foki, mo e kau sinifu. ‘O nau fakahīkihiki‘i ia.

¹⁰Ko hai ‘a e fefine ‘oku fakasio mai, Hangē ko e mafoa ‘a e ata, Faka‘ofo‘ofa hangē ko e māhina, ‘Asinisini hangē ko e la‘ā, Mamalu hangē ha tau fuka‘ia?[9]

¹¹Kuo u ‘alu hifo ki he ngoue niu, Ke vakai ‘a e tupu ‘i he tele‘a; Ke vakai pe kuo muka ‘a e vaine, Pe kuo fisi ‘a e pomikānite.

¹²Te‘eki ke u fakakaukau, na‘e lele‘aki au ‘e hoku va‘e Ki he ngaahi sāliote ‘a hoku kakai hou‘eiki.[10]

¹³Foki mai, foki mai,[11] ta‘ahine Sūlemi; Foki mai, foki mai, ka mau sio kiate koe. Ko e hā ‘a e Sūlemi ‘oku mou fie sio ki ai? Hangē ko e me‘e ‘i Mehanemi.