Read KO E TOH TAPU KATOA TONGA KO ‘AISEA 10 Bible Online

KO ‘AISEA 10 - KO E TOH TAPU KATOA TONGA bible

KO ‘AISEA 10

¹‘OIAUĒ ‘a kinautolu ‘oku fokotu‘u tu‘utu‘uni kovi, Mo e kau sikalaipe ‘oku sila‘i me‘a fakamamahi:

²Ke ta‘ofi ‘a e masiva mei he tangi ki he‘enau totongi, pea ke fa‘ao ‘a e totonu meiate kinautolu ‘i hoku kakai ‘oku tu‘utāmaki; ke hoko ‘a e kau uitou ko ‘enau vete, mo folofua ‘a e tamai mate!

³Pea ko e hā te mou fai ‘i he ‘aho ‘o e ‘eke, Pea ‘i he taufa ‘oku ha‘u mei he mama‘o? Ko hai te mou hola ki ai ke ma‘u tokoni? Pea te mou tuku ‘i fē ‘a e lāngilangi kuo mou ma‘u ka mou ‘alu?

⁴‘Oku toe pē ‘a e mapelu ‘i he potu ‘o e pōpula, pea te nau tō ‘i he potu ‘o e mate he tau. Ka neongo ia kotoa, Ka ‘oku ‘ikai lolou hono houhau, Pea ‘oku kei mafao atu hono nima!

⁵‘Oiauē ‘a ‘Āsilia, ko e ‘akau ‘oku fakaai ‘aki ‘eku matalili; ‘io, ko e mātā ‘oku nau to‘o ko ‘eku tautea!

⁶Toki ai ha pule‘anga mālualoi pea u fekau ia ki ai, pe ha kakai ‘oku ou houhau ki ai te u fai hono tu‘utu‘uni, ke vete mai ha vete, mo fa‘ao mai ha fa‘ao, ‘o tuku ia ko e me‘a ke malakekina hangē ko e pelepela ‘i he ngaahi hala.

⁷Ka tala‘ehai ‘oku pehē ‘ene fakakaukau ‘a‘ana, pea tala‘ehai ‘oku hā pehē ki hono loto; ka ko e me‘a ‘oku ‘i hono loto ke faka‘auha mo tu‘usi ‘ani kakai — hono ta‘inga?

⁸He ‘oku ne pehē, Ko e hou‘eiki ‘o ‘eku tau, ‘ikai koni tu‘i fua pē?

⁹‘Ikai ‘oku tatau ‘a Kālino mo Kalikimisi? ‘ikai na‘e tatau ‘a Hēmati mo ‘Āpati! ‘ikai na‘e tatau ‘a Samēlia mo Tāmasikusi?

¹⁰Hangē ko e a‘u hoku nima ki he ngaahi pule‘anga ‘otua noa na, (pea na‘e lahi honau ‘aitoli ‘onautolu ‘i Selusalema mo Samēlia),

¹¹pea hangē ko ‘eku fai ki Samēlia mo hono ngaahi ‘otua noa, ‘ikai ‘e pehē mo ‘eku fai ki Selusalema mo hono ngaahi tamapua?

¹²Ko ia, ka faifai pea ‘osiki ‘e ‘Ātonai ‘ene ngāue kotoa ‘i Mo‘unga Saione, pea ‘i Selusalema, te u toki fai ha ‘eke ki he fua ‘o e loto pupula ‘o e Tu‘i ‘Āsilia, mo ‘ene fongofonga hihiki mai.

¹³He kuo ne pehē, Ko e ngū ‘o hoku nima ni kuo u fai‘aki ia, mo e poto ‘o‘oku — he ko e tama fakakaukau au — pea u hikihiki ‘a e kau‘ā ‘o e ngaahi kakai, pea u fa‘ao ‘enau koloa, pea u lī ki lalo ‘a e nofo taloni, ‘o taau mo e Pulu:

¹⁴pea na‘e a‘usia ‘e hoku nima ‘a e koloa, ‘a e ngaahi kakai, hangē ko e a‘usia ha pununga; pea hangē ko e tufi ‘a e ngaahi fo‘i manu ‘oku li‘aki, pehē kuo u tufi ‘e au ‘a māmani kātoa: pea koloto ke ai ha taha ke kapakapa, pe fakamanga, pe taukete mai.

¹⁵‘O pole koā ‘a e toki kiate ia ‘oku ne apo ia? pe fakapupula ‘a e kili kiate ia ‘oku ne kilisi ‘aki? Tā ko e tākalo ia ‘e he tokotoko ‘a kinautolu ‘oku hiki ia: tā ko e hiki ‘e he mātā ‘a ia ‘oku ‘ikai ko e ‘akau.

¹⁶Ko hono ō ia ‘e tuku atu ‘e ‘Ātonai Sihova Sāpaoti ki hono hou‘eiki nge‘enge‘e ‘a Fakalilelila; pea ‘i he loto lāngilangi ‘o‘ona ‘e tutu ha mōfia hangē ko e vela ha afi.

¹⁷Pea ‘e hoko ‘a e maama ‘o ‘Isileli ko e afi, pea ko hono Tāpuhā ko e ulo‘i afi: pea ‘oku ne tutu mo keina hono ‘akau veli mo hono talatala ‘i ha ‘aho pē taha.

¹⁸Pea ko e lāngilangi ‘o hono vao, mo hono tokanga ngoue, te ne keikeina ‘a e loto mo e kakano fakatou‘osi;

¹⁹pea te ne ‘au‘osi ai ‘o hangē ko e tangata mahaki.[32] Pea ko e toenga ‘akau ‘o hono vao ‘e ala lau; seuke, ‘e ala tohi kinautolu ‘e ha tamasi‘i.

²⁰Pea ka hoko ‘a e ‘aho ko ia, pea ko e toenga ‘o ‘Isileli, mo e hao ‘o e fale ‘o Sēkope, ‘e ‘ikai te nau kei faaki kiate ia na‘a ne taa‘i kinautolu; ka te nau faaki kia Sihova ko e Tāpuhā ‘o ‘Isileli, ‘o fai mo‘oni.

²¹‘E foki ha toenga, ‘a e toenga ‘o Sēkope, ki he Helo ‘Otua.

²²He neongo na‘e hangē ko e ‘one‘one ‘o e tahi ‘a ho kakai, ‘e ‘Isileli, ko e toenga pē ‘e foki: ko e fu‘u faka‘auha kuo tu‘utu‘uni, ‘o tafi atu mo e faitotonu.

²³He ko e ‘auha, mo e tu‘utu‘uni pau, ‘oku lolotonga fai ‘e ‘Ātonai Sihova Sāpaoti ‘i he lotolotonga ‘o e fonua kotoa.

²⁴Ko ia, ‘oku folofola mai ‘a ‘Ātonai Sihova Sāpaoti, ‘o pehē, ‘E hoku kakai, ‘a e nofo Saione, ‘oua te ke manavahē ki ‘Āsilia ‘i he‘ene taa‘i koe ‘aki ‘ene sēpita, mo ofa‘aki ‘ene mātā kia koe, ‘o hangē ko e fai ‘i ‘Isipite.

²⁵He ‘oku toe si‘i ‘aupito, pea kuo ‘osi ‘a e tautea, pea nofo ‘a ‘eku matalili ke faka‘auha ‘a kinautolu na.

²⁶Pea ‘e tākalo ‘a e uipi kiate kinautolu ‘e Sihova Sāpaoti, hangē ko e taa‘i ‘o Mitiani ‘i he Makatu‘u ‘o ‘Ōlepi; pea ko hono tokotoko ē ‘i he funga tahi; ‘io, ‘oku ne ofa ia hangē ko e fai ki ‘Isipite.

²⁷Pea ‘e hoko ‘i he ‘aho ko ia, ‘e mole ‘enau kavenga mei ho uma, mo ‘enau ‘ioke mei ho kia; ‘io, ‘e motu ‘a e ‘ioke ‘i he tekena ‘e he ngako.[33] Kuo ne a‘u ki ‘Ai![34]

²⁸‘Oku ne laka atu ‘i Mikiloni! ‘Oku ne tuku ‘i Mikimasi ‘ene ngaahi kavenga!

²⁹Kuo nau tuku ki mui ‘a e hala fakateiapa‘a! “Tau mohe ‘i Kepa,” ‘Oku tete ‘a Lama! Kipea-Saula ‘oku hola!

³⁰Foki ta‘ahine Kālimi, ‘Ai atu ha‘o fu‘u kaila! Laisi ē, fakafanongo atu mu‘a! ‘Oiauē si‘i ‘Anatoti!

³¹Kuo mātuku atu ‘a Matemena! ‘Oku fetukutuku ‘a e nofo Kēpimi!

³²Na‘a mo e ‘aho ni ‘oku ne ‘i Nopi, ‘o tu‘u! ‘Oku ne tākalo hono nima ‘I he mo‘unga ‘o e ta‘ahine ko Saione, ‘A e mo‘unga ko Selusalema!

³³Vakai, ko ‘Ātonai Sihova Sāpaoti ‘oku ne have‘i atu, ‘o tā ‘a e ‘ulu‘ulu; pea ko e ngaahi fu‘u ‘akau mā‘olunga ‘oku tā, pea ko kinautolu ‘oku māmā‘olunga ‘oku fakatoutoumoloto pē.

³⁴Pea ‘oku ne tā ‘a e ngaahi fihi ‘o e vao ‘aki ‘a e ukamea, pea ‘oku tō ‘a Lepanoni na ‘i he ngāue ‘a ha taha ‘oku hopo hake.