Read KO E TOH TAPU KATOA TONGA KO ‘AISEA 11 Bible Online

KO ‘AISEA 11 - KO E TOH TAPU KATOA TONGA bible

KO ‘AISEA 11

¹PEA ‘e fisiki mai ha lito mei he sino‘i ‘akau ‘o Sese, pea ‘e fua ha huli mei hono aka.

²Pea ‘oku nofo hifo ki ai ‘a e Laumālie ‘o Sihova, ‘a e laumālie ‘o e poto mo e ‘ilome‘a, ‘a e laumālie ‘o e fale‘i mo e mafai, ‘a e laumālie ‘o e ‘ilo‘i ‘o Sihova mo e ‘apasia ki ai.

³Pea ko e ‘apasia kia Sihova ko ‘ene fangu nanamu ia; pea ko ‘ene fai fakamaau ‘oku ‘ikai fai ki he me‘a ‘oku hā ki he mata, pea ko ‘ene faka‘osi ‘e ‘ikai fai ki he ongo ‘o e telinga.

⁴Ka ‘e fou ‘i he totonu ‘ene fakamaau ‘a e kau masiva, pea ‘e fai ki he tuha ‘ene tu‘utu‘uni me‘a ki he fa‘ahinga mā‘ulalo ‘o māmani: pea te ne taa‘i ‘a māmani ‘aki ‘a e sēpita ‘o hono fofonga, pea te ne tāmate‘i ‘a e kau angahala ‘aki ‘a e mānava ‘oku ‘alu atu mei hono loungutu.

⁵Pea ko e no‘o ‘o hono kongaloto ko e faitotonu, ‘io, ko e no‘o ‘o hono tenga ko e fai mo‘oni.

⁶Pea ‘e nonofo ‘a e ulofi mo e lami, pea ‘e tākoto ‘a e lēpati mo e ki‘i kosi, pea fakataha ‘a e kafi mo e laione mui mo e pulu sino,[35] pea ‘oku fakateka kinautolu ‘e ha momo‘i tamasi‘i.

⁷Pea ‘oku kaikai fakataha ‘a e kau mo e pea fefine; ‘oku fetākoto‘i hona ‘uhiki: pea ‘oku kai kau‘i koane ‘e he laione hangē ko e pulu.

⁸Pea ko e tamasi‘i kei huhu te ne fakavā ‘i he ngutu luo ‘o e ata, pea ko e tamasi‘i mavae te ne ala hono nima ki he tama‘imata ‘o e kēlasa.

⁹‘E ‘ikai te nau fai ha maumau, pea ‘e ‘ikai te nau fai ha faka‘auha ‘i he kotoa ‘o hoku mo‘unga tapu: he ‘e fonu ‘a māmani ‘i he ‘ilo‘i ‘o Sihova, ‘o hangē ko e mafola ‘a e vai ‘i he tahi.

¹⁰Pea ‘e hoko ‘i he taimi ko ia, ko e huli ‘o Sese, ‘a ia ‘oku tu‘u ko e fuka ki he ngaahi kakai, ‘e kumi ki ai ‘a e ngaahi pule‘anga; pea ko hono nofo‘anga ko e koto lāngilangi.

¹¹Pea ‘e hoko ‘i he taimi ko ia, ‘e toe ala ‘e ‘Ātonai hono tu‘o ua ke ma‘u mai ‘a e toenga ‘o e kakai ‘oku toe, mei ‘Āsilia, pea mei ‘Isipite, pea mei Patalosi, pea mei Kusa,[36] pea mei ‘Īlami, pea mei Saina, pea mei Hēmati, pea mei he ngaahi motu ‘o e tahi.

¹²Pea te ne hiki ki ‘olunga ha fuka ki he ngaahi pule‘anga, pea te ne tānaki mai ‘a e kau fakahee‘i ‘o ‘Isileli, pea te ne fakataha ‘a e kau Siuta na‘e fakamovetevete mei he tapatapa ‘e fā ‘o māmani.

¹³Toki ‘ave ‘a e meheka kia ‘Ifalemi, toki tu‘usi ‘a e kau fakamamahi ‘o Siuta: ko ‘Ifalemi ‘e ‘ikai te ne meheka kia Siuta, pea ko Siuta ‘e ‘ikai te ne fakamamahi ‘a ‘Ifalemi:

¹⁴pea te nau lolofa hifo ki he lauua ‘o e kau Filisitia ki hihifo; ‘oku nau fakataha ‘o vete ‘a e kakai ‘o hahake; ‘oku ala honau nima ki ‘Ītomi mo Moape;

¹⁵pea ‘e fakaongo kiate kinautolu ‘a ha‘a ‘Āmoni. Pea ‘e mōifua ‘e Sihova ‘a e ‘elelo tahi ‘o ‘Isipite; pea te ne tātākalo hono nima ki he Vaitafe mo ‘ene mānava vela, pea te ne taa‘i ia ke hoko ko e ki‘i vai ‘e fitu, kae lava ‘a e kakai ke ‘alu ai mo e sū.

¹⁶Pea ‘e ai ha hala tanu mei ‘Āsilia ki he toenga ‘o hono kakai ‘oku toe; ‘o hangē na‘e ma‘u ‘e ‘Isileli ‘i he taimi ‘o ‘ene ‘alu hake mei ‘Isipite.