Read KO E TOH TAPU KATOA TONGA KO ‘AISEA 16 Bible Online

KO ‘AISEA 16 - KO E TOH TAPU KATOA TONGA bible

KO ‘AISEA 16

¹MOU ‘ave ‘a e tukuhau lami mei Sela ‘i he hala toafa ki he mo‘unga ‘o e ta‘ahine ko Saione.

²Pea ‘e faifai pea hangē ‘a e puna holo ‘a e fanga manupuna kuo vetekina ‘a e pununga, ‘e pehē ‘a e kau fefine Moape ‘i ha ngaahi a‘a‘anga ‘o ‘Alanoni.

³Fale‘i kimautolu, fai ‘a e fakalalo, ‘Ai ho malu ke hangē ko e pō ‘i he ho‘atā mālie: Fufū si‘i kau fakahee‘i, ‘Oua ‘e lavaki‘i ‘a e hē fano.

⁴Ke ‘āunofo mo koe si‘i kau fakaheke‘i ‘o Moape; Ke ke hoko ko e unga‘anga ki ai telia ‘a e tangata vete. He ko e kau fakaehaua kuo ‘ikai, Ko e fakalala fonua kuo ‘osi, Kuo fakaeve mei ha fonua ‘a e kau malaki.

⁵Pea ‘oku ai ha taloni ‘oku tu‘u ‘i he fai ‘ofa, Pea ‘e ‘afio ai ha taha ‘oku tu‘u ‘i he mo‘oni; ‘Io, ‘i he tēniti ‘o Tēvita ha taha ‘oku fai fakamaau, Pea ‘oku mamahi‘i ‘a e fakakonisitūtone, Pea ‘oku ne maheni mo e totonu.

⁶Kuo mau fanongo ki ha mahiki ‘a Moape, ‘O fu‘u fakatuputupulangi; ‘Ene pupula, mo ‘ene mahiki, mo ‘ene fa‘a ‘ita; ‘A ‘ene lea‘aki ‘a e ngaahi me‘a ‘oku ‘ikai ko ia.

⁷Ko ia, ‘e tangi ‘oiauē ‘a Moape koe‘uhi ko Moape, ‘Io, ‘e tangi ‘oiauē ‘a e me‘a kotoa; Te mou hanu koe‘uhi ko e takaonga kālepi ‘o Kili-Haleseti, Kuo ka‘anga ‘aupito.

⁸He ko e ngaahi ngoue fo‘i ‘akau ‘a Hesiponi kuo tamatemate; Ko e vaine ‘o Sīpima — ko hono ‘elito na‘a mo e hou‘eiki ‘o e ngaahi pule‘anga na‘e tulaki ai — Na‘e a‘u ki Siasea, na‘e tu‘utu‘uholo ‘i he toafa; ‘Oku mafola atu hono pikilau, ‘oku laka ki he kauvai ‘o e tahi.

⁹Ko ia, ‘oku ou fai ‘a e tangi ‘a Siasea koe‘uhi ko e vaine ‘o Sīpima; ‘Oku ou fakaviviku koe ‘aki hoku lo‘imata, Si‘i Hesiponi mo ‘Eleale: He tō kovi ‘a e tau‘a‘alo He toli ‘o e to‘u kai fua‘i ‘akau mo e to‘ukai kālepi.

¹⁰Pea kuo ‘ave ‘a e fiefia mo e tome‘e mei he tokanga ngoue, Pea ‘i he ngaahi ngoue vaine ‘oku ‘ikai ha mavava, ‘oku ‘ikai ha kaila; ‘Oku ‘ikai fai ha malaki ‘i he ngaahi tata‘onga; Ko e tau‘a‘alo kuo u fakalongo ‘e au.[42]

¹¹Ko ia ‘eku tokomohū hoku fatu Hangē ha ha‘ape koe‘uhi ko Moape, Pea ko hoku loto‘i sino koe‘uhi ko Kili-Hēlesi.

¹²Pea ka faifai pea hā kuo fiu ‘a Moape he fai ‘i he sia, pea kuo ne hū ki hono faletapu ke hufekina, ‘e ‘ikai te ne lava.

¹³Ko e folofola ia na‘e fai ‘e Sihova, ‘o kau ki Moape ‘i he taimi mu‘a.

¹⁴Ka ko eni kuo folofola ‘a Sihova, ‘o pehē, ‘I he ‘osi ‘a e ta‘u ‘e tolu, ko e ta‘u ‘o e unga ngāue, pea ‘e fakapaikuiku ‘a e lāngilangi ‘o Moape, pehē mo ‘ene fu‘ufu‘unga kakai; pea neongo ‘oku ai ha toenga, ka ko e momo‘i me‘a — hono ‘uke!