Read KO E TOH TAPU KATOA TONGA KO ‘AISEA 19 Bible Online

KO ‘AISEA 19 - KO E TOH TAPU KATOA TONGA bible

KO ‘AISEA 19

¹KO E kavenga ‘a ‘Isipite mei he Ta‘ehāmai. Vakai, ‘oku heka ‘a Sihova ki ha ‘ao ifilele, ‘o ne hā‘ele ki ‘Isipite: pea ‘oku tete ‘a e ngaahi ‘aitoli ‘o ‘Isipite ‘i he‘ene fotu mai, pea ‘oku vai ‘a e loto‘i loto ‘o e kau ‘Isipite.

²Pea te u kinisi ‘a ‘Isipite ke fai mo ‘Isipite: pea te nau tau, ‘a e tangata mo hono kāinga, ‘a e tangata mo hono kaungā‘api; ‘a e kolo mo e kolo, ‘a e pule‘anga mo e pule‘anga.

³Pea ‘oku maha ‘a e laumālie ‘i he loto ‘o ‘Isipite; pea ko ‘enau fakakaukau ‘oku ou folofua: pea ‘oku nau huhū ki he ngaahi ‘aitoli, pea ki he fa‘ahinga fakalou‘akau, pea ki he kau fakahā‘ele fa‘ahikehe, pea ki he kau tuki fakatēvolo.

⁴Pea te u loki ‘a ‘Isipite ke fa‘iteliha ai ha pule fefeka; pea ‘e pule kiate kinautolu ha tu‘i kaukaua — ko e folofola ia mei he Ta‘ehāmai ‘a ‘Ātonai Sihova Sāpaoti.

⁵Pea ‘e fakamātu‘u ‘a e vai mei he tahi na, pea ‘e mōmoa mo pakukā ‘a e vaitafe.

⁶Pea ‘e taufa mei hono ngaahi manga ha namukū; ‘oku mamaha mo mōmoa ‘a e ngaahi vaitaki ‘o e ‘Isipite ‘e taha: ‘oku pakukā ‘a e kaho mo e limu.

⁷Ko e ngaahi potu tafangafanga ‘oku tu‘u ki Naila ‘i hono ve‘e vai, pea mo hono ngaahi toutu‘u koane, ‘oku mōmoa, ‘oku mo‘ui hopohopo pē, pea mole.

⁸Pea ‘oku to‘e ‘a e kau toutai ika, pea ‘oku tangilāulau ‘a kinautolu ‘oku lafo māta‘u ki Naila, pea ko kinautolu ‘oku ‘a‘au kupenga ki he fukahi vai kuo nau faka‘au hifo.

⁹Pea ‘oku puputu‘u ‘a e kakai ‘oku ngāue ki he helu falakesi, mo e kau lalanga kalekō.

¹⁰Pea ‘e momosi hono ngaahi pou; ‘oku loto puputu‘u ‘a kinautolu fua pē ‘oku ngāue totongi.

¹¹‘Ā, kuo koto vale pē ‘a e hou‘eiki ‘o Soani, ‘a e kau poto ‘oku fale‘i ‘a Felo; ko e poto ‘a e fakataha tokoni ko e koto vale. Fēfē ho‘omou lau kia Felo, “Ko e foha au ‘o ha‘a poto, ko e hako ‘o e ngaahi tu‘i mu‘a?”

¹²Pea nau ‘i fē koā, ho‘o kau poto? ‘Io, ke nau fakahā mu‘a kiate koe; pea ke nau ‘ilo ‘a e me‘a ‘oku fakakaukau‘i ‘e Sihova Sāpaoti ke fai ki ‘Isipite.

¹³Kuo vale ‘a e hou‘eiki Soani, kuo fiemua‘i ‘a e hou‘eiki ‘o Mēfisi; pea kuo takihee‘i ‘a ‘Isipite ‘e kinautolu ko e makatuliki ‘o hono ngaahi matakali.

¹⁴Kuo lingi ‘e Sihova ki loto ‘Isipite ‘a e laumālie fakaninimo: ko ia kuo nau takihee‘i ‘a ‘Isipite ‘i he‘enau ngaahi ngāue kehekehe, ‘o hangē ko e sipa holo ‘a e tangata konā ‘i he‘ene lua.

¹⁵Pea ko ia ‘oku ‘ikai hā ‘i ‘Isipite ha ngāue ‘oku lava ai ha me‘a, ‘a e ‘ulu pe ko e iku, ‘a e lou paame pe ko e kutu.

¹⁶‘I he taimi ko ia ‘e hoko ‘a e kau ‘Isipite ‘o hangē ko ha kau fefine: pea te nau tete mo manavahē he tākalo ‘a e nima ‘o Sihova Sāpaoti, ‘a ia ‘oku ne apo ki ai.

¹⁷Pea ‘oku hoko ‘a e fonua ‘o Siuta ko e me‘a ke fakailifia ‘aki ‘a e kau ‘Isipite; ka ai ha‘anau lau‘i ia ki ai, pea ilifia leva, telia ‘a e tu‘utu‘uni ‘a Sihova Sāpaoti, ‘a ia ‘oku ne tātāupe ki ai.

¹⁸‘I he taimi ko ia ‘e ai ha nima‘i kolo ‘i ‘Isipite ‘oku nau lea‘aki ‘a e lea faka-Kēnani, pea ‘oku fuakava ‘ia Sihova Sāpaoti; ko honau taha ‘e ui ko Kolo-faka‘auha.[48]

¹⁹‘I he taimi ko ia ‘e tu‘u ha ‘ōlita ‘o Sihova ‘i he loto fonua ‘o ‘Isipite, pea mo e pou tapu ‘o Sihova ofi ki hono kau‘ā.

²⁰Pea ‘e hoko ia ko e faka‘ilonga mo e fakamo‘oni ma‘a Sihova Sāpaoti ‘i he fonua ‘o ‘Isipite: he te nau tautapa kia Sihova telia honau kau fakamamahi, pea te ne tuku atu ki ai ha taha fai fakamo‘ui mo ha mafi, ‘a ia te ne fakahaofi kinautolu.

²¹Pea ‘e faka‘ilo ia ‘e Sihova ki he kau ‘Isipite, pea ‘e ‘ilo ‘a Sihova ‘e he kau ‘Isipite ‘i he taimi ko ia; pea te nau ngāue kia Sihova ‘aki ‘a e feilaulau mo e me‘a‘ofa, pea te nau fai tukumo‘ui ki ai, mo fakaai.

²²Pea ‘e taa‘i ‘e Sihova ‘a ‘Isipite, ‘ene taa‘i mo faito‘o; ‘io, ka nau ka foki kia Sihova ‘oku ne tuku ke tau ‘enau hū, ‘o ne faito‘o kinautolu.

²³‘I he taimi ko ia ‘e ai ha hala tanu mei ‘Isipite ki ‘Āsilia; pea ‘e ha‘u ‘a e ‘Āsilia ki ‘Isipite, mo e ‘Isipite ki ‘Āsilia; pea ‘e tauhi ki ai ‘a e ‘Isipite fakataha mo e ‘Āsilia.

²⁴‘I he taimi ko ia ‘e toko tolu ‘aki ‘a ‘Isileli ‘a ‘Isipite mo ‘Āsilia ‘i he hoko ko e monū‘ia‘anga ‘i he lotolotonga ‘o māmani.

²⁵‘E tāpuaki‘i kinautolu ‘e Sihova Sāpaoti, ‘o pehē, Ke ke monū‘ia koe, ‘a ‘Isipite ko hoku kakai, mo ‘Āsilia ko e ngāue ‘a hoku nima, mo ‘Isileli ko hoku tofi‘a.