Read KO E TOH TAPU KATOA TONGA KO ‘AISEA 2 Bible Online

KO ‘AISEA 2 - KO E TOH TAPU KATOA TONGA bible

KO ‘AISEA 2

¹KO E folofola na‘e hā kia ‘Aisea foha ‘o ‘Āmosi, ‘o kau ki Siuta mo Selusalema.

²Pea ‘e hoko ‘o pehē ‘i he kuonga ‘amui, ‘e fokotu‘u ‘a e mo‘unga ‘o e fale ‘o Sihova ko e ‘ulu ‘o e ngaahi mo‘unga, pea ‘e mahiki hake ‘i he ngaahi fo‘i mā‘olunga; pea ‘e tafe ki ai ‘a e ngaahi kakai kotoa pē.

³‘Io, ‘e ō ange ‘a e ngaahi kakai lahi, pea te nau pehē, Ha‘u ā, ke tau ‘alu hake ki he mo‘unga ‘o Sihova,[4] ki he fale ‘o e ‘Otua ‘o Sēkope; pea te ne ako kiate kitautolu hano ngaahi ‘alunga, pea te tau fou ‘i hono ngaahi founga: he ko Saione ‘e ‘alu mei ai ‘a e fakahinohino, mo e folofola ‘a Sihova mei Selusalema.

⁴Pea te ne fakamaau ‘a e vaha‘a ‘o e ngaahi pule‘anga, pea te ne sivi ‘a e me‘a ‘a e ngaahi kakai lahi: pea te nau tuki huo ‘aki ‘enau ngaahi heletā, mo e ngaahi hele ‘auhani ‘aki honau ngaahi tao: ‘e ‘ikai ofa heletā ha pule‘anga ki ha pule‘anga, pea ‘e ‘ikai kei fai ha ako tau.

⁵Fale ‘o Sēkope ē, Ha‘u ā, ka tau laka ‘i he maama ‘a Sihova.

⁶He kuo ke li‘aki ho kakai ‘a e fale ‘o Sēkope, koe‘uhi kuo nau fonu ‘i he ngaahi me‘a ‘a Hahake, pea ‘oku nau fai sausau hangē ko e kau Filisitia,[5] pea ‘oku nau fepukenima‘aki mo e hako ‘o e muli.

⁷Pea ko honau fonua ‘oku fonu siliva mo e koula, pea ‘oku ‘ikai hano ngata‘anga ‘o ‘enau koloa: pea ‘oku fonu honau fonua ‘i he fanga hoosi, pea ‘oku ‘ikai hano ngata‘anga ‘o ‘enau sāliote.

⁸‘Oku fonu honau fonua foki ‘i he ngaahi ‘aitoli; ‘oku nau hū ki he ngāue ‘a honau nima, ‘a e me‘a kuo ngaohi ‘e he tuhu ‘onautolu.

⁹Pea ‘oku mapelu ki lalo ‘a e tangata noa, pea ‘oku fakamo‘ulaloa ‘a e tu‘unga ‘Eiki.

¹⁰Pea ‘e ‘ikai te ke fakamolemole ‘a kinautolu. Hū ki he makatu‘u, ‘o tanu koe ‘i he efu, ‘i he kite mai ‘a e fakailifia ‘a Sihova, mo e lāngilangi ‘o ‘ene fotu.

¹¹‘E fakamo‘ulaloa ‘a e mata hihiki ‘o e tangata noa, pea ‘e peluki hifo ‘a e mofuta ‘o hou‘eiki, pea ko Sihova toko taha pē ‘e fotu ‘i he ‘aho ko ia.

¹²He ‘oku ai ha ‘aho tautea ‘a Sihova Sāpaoti ki he me‘a kotoa pē ‘oku fotu mo mā‘olunga, pea ki he me‘a kotoa pē ‘oku hiki hake; pea ‘e fakamo‘ulaloa‘i;

¹³‘io, ki he ngaahi sita ‘o Lepanoni, ‘a e fa‘ahinga mā‘olunga mo tomo hake:

¹⁴pea ki he ngaahi ‘oke kotoa ‘o Pēsani; pea ki he ngaahi mo‘unga kotoa pē ‘oku mā‘olunga, pea ki he fo‘i tafungofunga kotoa ‘oku hopo hake;

¹⁵pea ki he taua kotoa ‘oku mā‘olunga, pea ki he ‘ā kotoa ‘oku ngaohi ki he tau;

¹⁶pea ki he ngaahi vaka Tāsisi, pea ki he nāunau faka‘ofo‘ofa kotoa pē.

¹⁷Pea ko e hihiki ‘a e tangata noa ‘e peluki ki lalo, pea ko e mofuta ‘a hou‘eiki ‘e fakamo‘ulaloa‘i: pea ko Sihova toko taha ‘e fotu ‘i he ‘aho ko ia.

¹⁸Pea ‘e mole ‘aupito ‘a e ngaahi ‘aitoli.

¹⁹Pea ‘e hū ‘a e kakai ki he ngaahi ‘ana‘i maka, mo e ngaahi luoki efu, ‘i he kite mai ‘a e fakailifia ‘a Sihova, mo e lāngilangi ‘o ‘ene fotu, ‘oka ‘iloange ‘oku ne tu‘u hake ke lulu‘i ‘a māmani.

²⁰‘I he ‘aho ko ia ‘e lī ‘e he tangata ki he fanga mole mo e fanga peka ‘a ‘ene ngaahi ‘aitoli siliva, mo ‘aitoli koula, ‘a ia kuo nau ngaohi ke hū ki ai:

²¹koe‘uhi ke nau hū ki he ngaahi ava‘i maka, mo e ngaahi ‘ana ‘i he ngaahi mato, ‘i he kite mai ‘a e fakailifia ‘a Sihova, mo e lāngilangi ‘o ‘ene fotu, ‘oka ‘iloange ‘oku ne tu‘u ke lulu ‘a māmani.

²²Pe‘i tuku ai pē ‘a e tangata, ‘a ia ‘oku ‘i hono ava‘i ihu ‘ene mānava mo‘ui: he ko e hā fua hono mahu‘inga?