Read KO E TOH TAPU KATOA TONGA KO ‘AISEA 22 Bible Online

KO ‘AISEA 22 - KO E TOH TAPU KATOA TONGA bible

KO ‘AISEA 22

¹KO E kavenga mei he Ta‘ehāmai ‘a Tele‘a-Vīsone. Ko e hā tū ‘a e me‘a kuo hoko kiate koe? Kuo mou kātoa ai ki he tu‘a fale.

²‘a e fonu longoa‘a, ‘A e kolo vākē, ‘a e kolotau tome‘e? Ko ho kakai tāmatea ‘oku ‘ikai ko e tāmate‘i ‘e he heletā, Pea ‘oku ‘ikai ko e mate ‘i he tau.

³Na‘e hola fakataha ho‘o kau pule fua pē, Na‘a nau tuku ke ha‘i kinautolu ta‘eha fana; Ko ho kakai kotoa na‘e ma‘u na‘e ha‘i fakataha, Kuo nau hola mama‘o.

⁴Ko ia ‘oku ou pehē, Hanga kehe meiate au, ka u fakamamahi tangi pē; ‘o ‘oua te mou nafui hoku fakalelu‘i, ‘eku tēngihia ‘a e maumau ‘o e pele ‘o hoku kakai.

⁵He ‘oku ai ha ‘aho ‘o ‘Ātonai Sihova Sāpaoti ‘i Tele‘a-Vīsone; ko e ‘aho ‘o e longoa‘a, mo e malaki, mo e maveuveu; ko e holoki ‘o e ‘ā, mo e tangi ilifia ‘oku pā ki he ngaahi mo‘unga.

⁶Pea ko ‘Īlami e ‘oku to‘o hōfangahau, ai mo e fononga tangata heka hoosi; pea ko Kili ē kuo to‘o ‘a e kofu ‘o e pā.

⁷Pea ‘oku faifai pea fonu ‘a e lelei ‘o ho ngaahi tele‘a ‘i he tau sāliote, pea ko e kau heka hoosi kuo fakatē atu ki he matanikolo.

⁸Te ne toki tatala ‘a e pūlou ‘o Siuta; pea ‘oku ke sio ‘i he ‘aho ko ia ki he mahafu ‘i he Fale ‘o e Vao.

⁹Pea ‘oku mou vakai ‘a e ngaahi holo ‘i he ‘ā ‘o Kolo-‘o-Tēvita, tā ‘oku lahi: pea ne mou tāpuni ‘a e vai ‘o e Lepa Lalo.

¹⁰Pea na‘a mou lau ‘a e ngaahi fale ‘o Selusalema, pea na‘a mou holoki ‘a e ngaahi fale ke ngaohi ‘aki ‘a e ‘ā.

¹¹Pea na‘a mou ngaohi ha tānekinga vai ‘i he vaha‘a ‘a e ongo ‘a ki he vai ‘o e motu‘a lepa: ka na‘e ‘ikai te mou sio kiate ia na‘e ngaohi ia, pea na‘e ‘ikai te mou tokanga‘i ‘a e ‘Afio na‘a ne fai ia fuoloa atu.

¹²Pea ‘i he taimi ko ia na‘e ui ‘e ‘Ātonai Sihova Sāpaoti ki he fai ‘o ha tangi, mo e tangilāulau, mo e fusi ‘ulu, mo e ‘ai tauanga‘a.

¹³Ka vakai, ko e fakafiefia ē, mo e mavava, ko e te‘ia pulu, mo e tāmate‘i sipi, ko e kai kakano mo e inu uaine — ko e kai mo inu he ‘oku ‘apongipongi ‘etau mate.

¹⁴Pea na‘e tatala hoku telinga ‘e Sihova Sāpaoti, ‘o pehē, ‘Ilo ‘e au ‘o kapau ‘e tāmate‘i ‘a e kovi ko ena ‘amoutolu, ‘o a‘u ki ho‘omou mate. Ko e folofola ia ‘a ‘Ātonai Sihova Sāpaoti.

¹⁵Ko eni ‘a e folofola ‘a ‘Ātonai Sihova Sāpaoti, Ha‘u ange, ‘alu ki he minisitā ko ena, kia Sēpina, ‘oku pule ki he loto‘ā.

¹⁶“Ko e hā ‘au heni? Pea ko hai ‘oku ke ma‘u heni kuo ke foa ai hao faitoka heni?” Si‘ene foa ‘ene fa‘itoka ‘i ‘olunga, si‘ene tā hono toka‘anga ‘i he makatu‘u!

¹⁷Vakai, ‘oku teu fakapuna koe ‘e Sihova, ko e fakapuna ‘a ha mafi; pea te ne puke koe ke mapuke.

¹⁸Te ne mātu‘aki takai koe hangē ha fo‘i kafa, ‘o fakapuna atu hangē ha pulu ki ha fonua ‘oku ‘atā hono potu ‘osi pē; ko e potu ko ia te ke pekia ai, ko e potu ko ia ‘e ‘ave ki ai ho‘o ngaahi sāliote lāngilangi, ‘a koe ko e kula‘anga ‘o e fale ‘o ho ‘eiki.

¹⁹Pea te u fakaoma koe mei ho‘o lakanga, ‘io, te ne hae hifo koe mei ho tu‘unga.

²⁰Pea ‘e hoko ‘i he taimi ko ia, te u ui mai ‘eku sevāniti ko ‘Īlaiakimi foha ‘o Hilikaia:

²¹pea te u ‘ai ki ai ho kofu ‘o‘ou, pea te u no‘o ‘aki ho no‘o, pea te u tuku ho‘o pule ki hono nima: pea te ne hoko ko e tamai ki he nofo Selusalema mo e fale ‘o Siuta.

²²Pea te u hilifaki ki hono uma ‘a e kī ‘o e fale ‘o Tēvita; pea ka to‘o ‘e ia, ‘e ‘ikai tāpuni ‘e ha taha; pea ka tāpuni ‘e ia, ‘e ‘ikai to‘o ‘e ha taha.

²³Pea te u tuki ia ko e fa‘o ‘i ha potu ma‘u; pea te ne hoko ko e nofo‘anga lāngilangi ki he fale ‘o ‘ene ‘Eiki.

²⁴‘Io, ‘e fuhi ‘iate ia ‘a e fu‘u tu‘unga kotoa ‘o e fale ‘o hono tupu‘anga, ‘a e akaaka mo e ngaahi lito, ‘a e fanga ki‘i ipu mo e ngaahi ipu pēsoni ki he ngaahi ipu ‘utuvai.

²⁵‘I he taimi ko ia — ko e folofola ia mei he Ta‘ehāmai ‘a Sihova Sāpaoti — ‘e homo ‘a e fa‘o na‘e tuki ki he potu ma‘u; ‘io, ‘e mapaki pea tō; pea ‘e tu‘usi ‘a e me‘a na‘e tāupe ai: he kuo folofola ‘a Sihova.