Read KO E TOH TAPU KATOA TONGA KO ‘AISEA 23 Bible Online

KO ‘AISEA 23 - KO E TOH TAPU KATOA TONGA bible

KO ‘AISEA 23

¹KO E kavenga ‘a Taia mei he Ta‘ehāmai. Mou tangi ‘oiauē, ‘a e ngaahi vaka Tāsisi: He kuo faka‘auha ia, ‘Oku ‘ikai ha fale, ‘Oku ‘ikai ha hū ki taulanga: Mei he fonua ‘o Kītimi na‘e fakahā ‘a e me‘a kiate kinautolu.

²Fakalongo, ‘a e nofo he matāfonua. Na‘e fakafonu koe ‘e he kau mesianiti ‘o Saitoni ‘Enau folau atu ‘i he tahi:

³Pea na‘e fetuku ‘a e tō ta‘u ‘a Sīhoa ‘i he ngaahi vaha folau; Ko e ta‘u ‘o Naila ko ‘ene tānaki ia, Pea ne hoko ko e fakatau ki he ngaahi pule‘anga.

⁴Ke ke mā pē koe, Saitoni: He kuo lea mai ‘a e tahi, ‘a e kolotau ‘o e tahi: “Kuo ‘ikai te u langā, pea kuo ‘ikai te u fā‘ele, Pea kuo ‘ikai te u tauhi talavou, pe fakaili kau finemui.”

⁵‘I he a‘u ‘a e ongoongo ki ‘Isipite, ‘oku nau ‘āmio ‘i he talanoa ki Taia! Mou hiki ki Tāsisi:

⁶Tangi ‘oiauē, ‘a e nofo he matāfonua!

⁷Ko eni koā homou iku‘anga, ‘a e kolo fa‘a sō, ‘A ia ko hono tupu‘anga ‘oku mei ono‘aho, ‘A ia na‘e lele ‘aki ‘e hono va‘e ki he ngaahi potu mama‘o ke nofo ai?

⁸Ko hai na‘e fakakaukau ‘a e me‘a ni ke hoko ki Taia, ‘A e kolo tufa kalauni, ‘A ia ko hono kau mesianiti ko e ha‘a pilinisi tofu pē, Ko ‘ene kau fakatau ko e hou‘eiki ‘o māmani?

⁹Ko Sihova Sāpaoti na‘a ne tu‘utu‘uni ia, Ke fakalielia‘i ‘a e lāngilangi ‘o e teunga fua pē, Ke fakame‘avale‘i kotoa pē ‘a e hou‘eiki ‘o māmani.

¹⁰Ta‘ahine Tāsisi, mahua atu ‘i ho fonua ‘o hangē ko Naila: ‘Oku ‘ikai kei ha no‘o.[51]

¹¹Kuo ne mafao atu hono nima ki he tahi, Ke fakangaueue ‘a e ngaahi pule‘anga: Kuo fai tu‘utu‘uni ‘e Sihova ki Finisia, Ke maumau hono ngaahi kolotau.

¹²Pea ne folofola mai, ‘E ‘ikai te ke toe tome‘e, Si‘i tohotoho‘i, ta‘ahine Saitoni na‘e tāupo‘ou: Ko Kītimi ē, tu‘u ‘o hiki ki ai; Na‘a mo ia ‘e ‘ikai te ke ma‘u ai ha‘o nonga.

¹³Vakai, ko e fonua ‘o e kau Kalitia — ‘a e kakai ni na‘e ‘ikai: Na‘e tu‘utu‘uni ‘e ‘Āsilia Ko e feitu‘u ki he manu ‘o e lala — [52] Kuo nau fokotu‘u ‘enau taua tau, Kuo nau fakatelefua hono ngaahi palasi, Kuo ne ngaohi ia ko e koto maka holo.

¹⁴Mou tangi ‘oiauē, ‘a e ngaahi vaka Tāsisi: He kuo ‘auha homou kolotau!

¹⁵Pea ‘e hoko ‘i he taimi ko ia, ‘e ngalo ‘a Taia ‘o fitungofulu ta‘u, ‘o hangē ko e ta‘u ‘o ha tu‘i pē taha: ‘i he ‘osi ‘a e fitungofulu‘i ta‘u, ‘e hoko ki Taia ‘o hangē ko e ta‘anga ‘a e pa‘umutu.

¹⁶“To‘o ‘a e ha‘ape, Foli ‘a e kolo, Si‘i pa‘umutu kuo ngalo: Tā ke mālie, Hiva ke lahi, Koe‘uhi ke manatua koe.”

¹⁷‘Io, ‘i he ‘osi ‘a e fitungofulu‘i ta‘u, ‘e ‘a‘ahi ‘a Sihova ki Taia, pea ‘e toe foki ia ki he‘ene tali tō‘onga pō, pea te ne fe‘auaki mo e ngaahi pule‘anga kotoa ‘o māmani ‘oku ‘i he funga kelekele.

¹⁸Ka ko ‘ene fakatupu, mo e tō‘onga pō ‘oku ne ma‘u, ‘e tapu kia Sihova: ‘e ‘ikai tauhi, pea ‘e ‘ikai tānaki; ka ko e koloa ma‘u ‘i he‘ene fakatau ‘e ma‘a e kakai ‘oku fakafeangai kia Sihova, ke nau kai ke mākona, pea ke nau ‘ai kofu masani.