Read KO E TOH TAPU KATOA TONGA KO ‘AISEA 26 Bible Online

KO ‘AISEA 26 - KO E TOH TAPU KATOA TONGA bible

KO ‘AISEA 26

¹‘I he taimi ko ia ‘e fai ‘a e hiva ko eni ‘i he fonua ko Siuta. Ko e kolo hūfanga ‘oku ta ma‘u ē, Kuo ne ‘ai ‘a e fakamo‘ui mōno ‘ā mo puke.

²Fakaava ‘a e ngaahi matapā, Kae hū ‘a e pule‘anga faitotonu na, ‘A e pule‘anga ‘oku tauhi ‘ene fai tōnunga.

³Ko e loto ‘oku puke ma‘u te ke ngaohi ke nonga ka ko ha nonga, Koe‘uhi ko ‘ene falala ki he ‘Afiona.

⁴Falala kia Sihova ‘o ta‘engata, He ko IAA SIHOVA ko e Makatu‘u Laukuonga.

⁵He kuo ne ‘ohifo ‘a e nofo ‘i he taukakapa, ‘A e kolo fu‘u mā‘olunga: Kuo ne lolo hifo ia, kuo ne lolo hifo ia ki he kelekele; Kuo ne ‘ai ke lave ki he efu.

⁶Kuo mala ‘a e va‘e ki ai; Ko e va‘e ‘o e vaivai, Ko e taulaka ‘a e kau tu‘utāmaki.

⁷Ko e hala ‘o e faitotonu ko e koto tonusika: ‘Oku ke fakatokalelei ‘a e ‘alunga ‘o e faitotonu ‘aki ‘a e fuavai.

⁸‘E Sihova kuo mau tatali atu ‘I he hala foki ‘o ho‘o fai fakamaau; Ko e holi ‘o e loto ‘oku fie fanongo ki ho huafa ‘Oku fie fanongo ki he fakamanatu ‘o ho‘o ngaahi me‘a.

⁹Ko hoku loto na‘e feinga kiate koe ‘i he pō; ‘Io, ne u kumi hakili kiate koe ‘aki ‘a e laumālie ‘o hoku loto: He ka hoko mai ‘a ho‘o ngaahi fakamaau ki he fonua, ‘E ako faitotonu ‘a e nofo maama.

¹⁰Ka fai ha ‘ofa ki he pau‘u, Molekemama‘o ha‘ane ako ke faitotonu; Ka ne nofo ‘i ha fonua mā‘oni‘oni te ne fai kovi, Pea ko e fotu ‘a Sihova ‘e ‘ikai ‘aupito te ne ‘ilo‘i.

¹¹‘E Sihova, kuo mā‘olunga ho nima, ka na‘e ‘ikai te nau sio ki ai; ka te nau sio ki ho‘o mamahi‘i ha kakai he fakamaa‘i ‘a kinautolu na; ‘ā, ko e afi kuo tuku ki ho ngaahi fili, te ne keina kinautolu.

¹²‘E Sihova, te ke fokotu‘u ha melino ma‘u ma‘amautolu: seuke, ko ‘emau ngāue kotoa foki ko ho‘o fai ia ma‘amautolu.[55]

¹³‘E Sihova ko homau ‘Otua, kuo fakaehaua kimautolu ‘e ha hou‘eiki kehe, ‘o ‘ikai ko koe pē; ka ne ta‘e‘oua ‘a e ‘Afiona ‘oku mau lava ai ke fakahīkihiki‘i ho huafa.

¹⁴Tala‘ehai ‘oku mo‘ui ‘a e kau pekia: tala‘ehai ‘oku toetu‘u ‘a e kau ‘ata: ‘āua, kuo ke ‘a‘ahi kiate kinautolu, ‘o faka‘auha; pea na‘a mo e manatu ki ai kuo ke fakangata.

¹⁵Kuo ke fakalahi ‘a e pule‘anga, ‘e Sihova, kuo ke fakalahi ‘a e pule‘anga; kuo ke fakalāngilangi‘i koe ‘e koe: kuo ke toloaki atu ‘a e ngaahi kau‘ā ‘o e fonua.

¹⁶‘E Sihova, ‘i he hoko ‘a e faingata‘a na‘a nau ‘a‘ahi ki he ‘Afiona; na‘a nau lilingi atu ‘a e lotu fanafana ‘i he falala ho‘o kinisi kiate kinautolu.[56]

¹⁷Hangē ha fefine feitama ‘oku ofi ke fā‘ele ‘oku ne mākauua holo, ‘o ‘ioho ‘i he‘ene mamahi; na‘e pehē kimautolu ‘i he ‘ao ‘o e ‘Afiona.

¹⁸Na‘a mau feitama, na‘a mau makau, na‘e hangē na‘a mau fā‘ele, ka ko e matangi pē; tala‘ehai na‘a mau fai ke mo‘ui ‘a e fonua; pea tala‘ehai kuo tō mai ha kau maama.[57]

¹⁹‘E toe mo‘ui ho‘o kau pekia: ‘e toetu‘u hoku ngaahi ‘anga‘anga, ‘Ā, ‘o mavava, ‘a e tōfā ‘i he efu: he ko ho‘o hahau ko e hahau ‘oku tō ki he mohuku kai, pea ‘e laku mai ‘e he fonua ‘a e kau ‘ata.

²⁰Ha‘u ange, si‘oku kakai, hū ki ho ngaahi loki, ‘o tāpuni ‘a e matapā kiate koe: toi ko e fo‘i kemo pē, kae‘oua ke laka atu ‘a e tautea.

²¹He vakai, ‘oku hā‘ele atu ‘a Sihova mei hono nofo‘anga ke ‘eke ‘a e kovi ‘a e nofo māmani: pea ‘oku tatala ‘e māmani ‘a e toto kuo ne ‘ufi‘ufi, ‘o ‘ikai te ne toe ‘ufi‘ufi ‘a e fakapoongi ‘oku ‘i ai.