Read KO E TOH TAPU KATOA TONGA KO ‘AISEA 29 Bible Online

KO ‘AISEA 29 - KO E TOH TAPU KATOA TONGA bible

KO ‘AISEA 29

¹‘OIAUĒ ‘Alieli, ‘Alieli, si‘i kolo na‘e ‘apitanga ai ‘a Tēvita! fakahoko mai ha ta‘u mo ha ta‘u; foli ‘a e ngaahi kātoanga: pea te u toki faka‘efihi ‘a ‘Alieli,

²pea ‘e ai ha to‘e mo ha māpuhoi: kae hoko ia kiate au ko e ‘Alieli tofu pē (talikula‘anga ‘o e ‘Otua).

³Pea te u ‘apitanga takatakai kiate koe, pea te u loki koe ‘aki ha ngaahi tu‘unga le‘o, pea te u fokotu‘u kiate koe ha ngaahi taua.

⁴Pea ka fakamo‘ulaloa koe, te ke lea mei he kelekele, pea ‘e ongo mei he efu ho‘o lea, ‘o alamuhu pē: ‘io, ‘e ongo hake ho‘o lea mei he kelekele hangē ha lea ‘a ha fa‘ahikehe, ‘io, ‘e ongo mei he efu ho‘o lau, ‘o fanafana pē.

⁵Ka ko ho‘o fu‘ufu‘unga fili na ‘oku ongoonga‘a mai, te nau hoko ko e efu valevale; pea ko e fu‘ufu‘unga kau fakamālohi na ‘oku ongoonga‘a mai, te nau hangē ko e kafukafu ‘oku punakaki: pea ‘e hoko fakafokifā, fakafokifā ‘aupito.

⁶‘Oku ha‘u meia Sihova ha ‘a‘ahi, ha‘u mo e fatulisi, mo e mofuike, mo e fu‘u longoa‘a ‘a e ‘ahiohio mo e afā, mo e ulo ha afi faka‘auha.

⁷Pea ko e fu‘ufu‘unga pule‘anga ‘oku ongoonga‘a mai kuo nau fakatē mai ke tau‘i ‘a ‘Alieli, ‘io, ko kinautolu kotoa ‘oku tau‘i ia mo hono talitau‘anga, mo kinautolu ‘oku faka‘efihi ia, te nau hangē ha misi, ha vīsone po‘uli.

⁸‘Io, ‘oku hangē ko e misi ‘a e tangata fiekaia, tā ‘oku ne kai; ka ‘i he‘ene ‘ā ko e koto nge‘esi ‘ene holi: pea hangē ko e misi ha tangata fie inu, tā ‘oku ne inu; ka ‘i he‘ene ‘ā, ‘oku ne vaivai, pea ‘oku manganga ‘ene holi: ‘e pehē ‘a e fu‘ufu‘unga pule‘anga ‘oku ongoonga‘a mai, ‘a ia ‘oku nau fakatē mai ki Mo‘unga Saione.

⁹‘Io, mou tu‘u, ‘o ofo; fakakuikui kimoutolu, ‘o hoko ko e kui: ko e fa‘ahinga konā ena, ka ‘oku ‘ikai ko e uaine; ‘oku nau tāsipesipa, ka ‘oku ‘ikai ko e kava mālohi.

¹⁰He kuo lilingi kiate kimoutolu ‘e Sihova ha laumālie mohe ma‘u, pea kuo ne tāpuni homou mata — ko e kau palōfita; pea kuo ne fakapūlou homou ‘ulu — ‘a e kau matalōloa.

¹¹Ko ia ko e palofisai kotoa ‘e tatau kiate kimoutolu mo e lea ‘o e tohi kuo sila‘i, ‘a ia kuo nau ‘ange ki ha taha ‘oku poto ‘i he tohinima, mo nau pehē, Lau mu‘a eni: ka ka tali mai ‘e ia, ‘Oku ‘ikai te u lava, he kuo sila‘i.

¹²Pea ‘ange ‘a e tohi ki ha taha ‘oku ‘ikai ke poto ‘i he lau tohi, mo pehē, Lau mu‘a eni; ka ka tali ‘e ia, ‘Oku ‘ikai te u poto ‘i he lau tohi.

¹³Pea folofola mai ‘a ‘Ātonai, Ko e me‘a ‘i he ‘unu mai ‘a e kakai ni ‘aki honau ngutu, mo fakalāngilangi‘i au ‘aki honau loungutu, ka ko honau loto kuo nau fakamama‘o meiate au, pea kuo hoko ‘enau lotu kiate au ko e tu‘utu‘uni pē ‘a e tangata kuo nau ako ai:

¹⁴ko ia ko au eni te u fai atu ‘eku ngāue fakaofo ki he kakai ni, ko e fakaofo ka ko ha fakaofo: pea kuo ka‘anga ‘a e poto ‘a e kau poto, pea ko e fakakaukau ‘a honau kau ‘atamai ‘e puli.

¹⁵‘Oiauē ‘a kinautolu ‘oku uku loloto meia Sihova ke fufū ‘enau fakakaukau! ko ia, ‘oku hoko ko e koto po‘uli ‘enau me‘a ‘oku fai, pea nau lau, Ko hai ‘oku sio mai? pea ko hai ‘oku ‘ilo ‘etau me‘a?

¹⁶Te mou fakakehe me‘a koā? ‘E lau ‘a e tufunga ‘umea ko e ‘umea, kae lau ‘e he me‘a kuo ngaohi kiate ia na‘a ne ngaohi, Na‘e ‘ikai te ne ngaohi au; pe lau ‘a e me‘a na‘e fa‘u kiate ia na‘e fa‘u ia, ‘Oku ‘ikai ha‘ane poto?

¹⁷‘Ikai ‘oku toe si‘i ‘aupito pea liliu ‘a Lepanoni ko e tokanga ngoue, pea lau ‘a e tokanga ngoue ko e vao pē?

¹⁸Pea ‘i he taimi ko ia ‘e ongo‘i ‘e he tuli ‘a e lea ‘o e tohi, pea ‘e sio ‘e he mata ‘o e kui mei he nenefu mo e po‘uli ‘oku nau ‘i ai.

¹⁹Kae fakautuutu ‘a e fiefia ‘a e anga malū ‘ia Sihova, pea ko e kau masiva ‘o e kakai te nau tome‘e ‘i he Tāpuhā ‘o ‘Isileli.

²⁰He ko e tangata fakamālohi kuo ‘ikai, pea ko e tangata kakae kuo ‘osi, pea kuo tu‘usi ‘a kinautolu fua pē ‘oku hehenga ki he kovi:

²¹‘a kinautolu ‘oku fakahalaia ha tangata ‘i ha lea pē, pea ‘oku nau fanga tauhele ki ha taha ‘oku fakatonutonu me‘a ‘i mala‘e,[64] ‘o le‘ei ‘a e me‘a ‘a e faitotonu ‘aki ha me‘a noa.

²²Ko ia, ko eni ‘a e folofola ‘a Sihova ki he fale ‘o Sēkope, ‘a ‘Ene ‘Afio na‘a ne huhu‘i ‘a ‘Epalahame; Hili eni ‘e ‘ikai mā ‘a Sēkope, pea hili eni ‘e ‘ikai tea hono fofonga.

²³He ka mamata ‘e he‘ene fānau ‘a e ngāue ‘a hoku nima ‘i honau lotolotonga, ‘e tāpuhā ‘a hoku hingoa ‘iate kinautolu; ‘io, te nau tāpuhaa‘i ‘a e Tāpuhā ‘o Sēkope, pea te nau teki ki he ‘Otua ‘o ‘Isileli.

²⁴Pea ko kinautolu ‘oku laumālie hē ‘oku ‘ilo poto, pea ko e kau hanu ‘oku nau tali akonaki.