Read KO E TOH TAPU KATOA TONGA KO ‘AISEA 32 Bible Online

KO ‘AISEA 32 - KO E TOH TAPU KATOA TONGA bible

KO ‘AISEA 32

¹VAKAI ‘e pule mā‘oni‘oni ha tu‘i; pea ko e me‘a ki he hou‘eiki, te nau fai ‘enau pule ‘o taau mo e konisitūtone.

²Pea ‘ilonga ha ‘eiki, te ne hangē ha fakaū mei he matangi, mo e toitoi‘anga mei he ‘alotāmaki; hangē ko e ngaahi manga‘i vai ‘i ha potu mōmoa, hangē ko e malu ‘o ha makatu‘u kāfakafa ‘i ha fonua puhengia.

³‘E ‘ikai kei pulusi ‘a e mata ‘o e sio, pea ‘e tokanga mai ‘a e telinga ‘o e fanongo.

⁴Pea ko e loto ‘o e kakai ‘oho ‘e mahino ki ai ‘a e poto, pea ko e ‘elelo ‘o e kau le‘o vale ‘e vave ‘ene lea mahino.

⁵‘E ‘ikai kei ui ‘a e vale ko e ‘eiki, pea ‘e ‘ikai lau ‘a e nima ma‘u ko e koloa‘ia.

⁶He ko e vale ‘e vale ‘ene lea, pea ko hono loto ‘e ngāue ki he kovi, ke fai ‘a e angahala fufū, pea ke lau kia Sihova ‘a e me‘a ‘oku hala, ke tuku nge‘esi pē ‘a e holi ‘a e fiekaia, pea ke ta‘ofi ‘a e inu mei he fie inu.

⁷Pea ko e ouau ‘o e nima ma‘u ‘oku kovi: ‘oku fa‘u hele ha taha pehē ke maumau ‘a e kau tu‘utāmaki ‘aki ‘a e ngaahi lea loi, neongo ‘oku fakahā ‘a e totonu ‘e si‘i masiva.

⁸He ko e ‘eiki ‘oku ne fakakaukau me‘a faka‘ei‘eiki; pea ko e me‘a faka‘ei‘eiki ‘e tu‘u ma‘u ai ha taha pehē.

⁹‘a e kau fefine nofo hamumu noa, mou tu‘u, fanongo ki he‘eku lea; ‘a e kau finemui falala noa, mou fokotu‘u telinga mai ki he me‘a ‘oku ou lau.

¹⁰Hili ha ta‘u mo ha ngaahi ‘aho te mou tete, ‘a e kau falala noa na: he kuo ‘osi‘osingamālie ‘a e ta‘u kālepi, ‘e ikunoa ‘a e to‘ukai.

¹¹Ngaue, ‘a e kau fefine hamumu noa; tete, ‘a e kau fefine falala kovi: vete kofu, ‘ai ke mou telefua, pea ‘ai ‘a e tauanga‘a ki homou kongaloto.

¹²Te mou sī huhu koe‘uhi ko e ngaahi ngoue‘anga mamana, koe‘uhi ko e vaine ngafuhifuhi.

¹³‘E ‘alu hake ‘a e vao talatala ‘i he kelekele ‘o hoku kakai; ‘io, ‘i he fale kotoa na‘e fiefia ‘i he kolo na‘e tome‘e.

¹⁴He ko e palasi kuo li‘aki; ko e uōuōtu‘u ‘o e kolo kuo tuku: ko ‘Ōfeli mo e fale le‘o ko e ngaahi ‘ana pē, ‘o talu ai, ko e fiefia‘anga ‘o e ‘asi vao, ko e kaikai‘anga ‘o e ngaahi tākanga.

¹⁵Kae‘oua ke mahua mai ‘a e Laumālie mei ‘olunga, pea hoko ‘a e fonua maomaonganoa ko e tokanga ngoue, kae lau ‘a e tokanga ngoue ko e vao pē.

¹⁶Pea ‘e ‘apitanga ‘a e fakalao ‘i he fonua maomaonganoa, pea ‘e nofo‘anga ‘a e faitotonu ‘i he tokanga ngoue.

¹⁷Pea ‘e hoko ‘a e ngāue ‘a e faitotonu ko e melino; pea ko e fua ‘a e faitotonu ko e nonga mo e falala ‘o ta‘engata.

¹⁸Pea ‘e nofo ‘a hoku kakai ‘i ha nofo‘anga fiemālie, pea ‘i ha ngaahi ‘apitanga falala‘anga, pea ki he ngaahi mālōlō‘anga ‘oku lava ai ke hamumu noa.

¹⁹Ka ‘e ō ha ‘uha maka mo e hinga ‘a e vao; pea ‘e mātu‘aki tō ki lalo ‘a e kolo.

²⁰Monū‘ia ā ka ko kimoutolu ‘oku tō ta‘u ‘i he ngaahi ve‘e vai kotoa pē, ‘oku veteange ‘a e va‘e ‘o e pulu mo e ‘asi.