Read KO E TOH TAPU KATOA TONGA KO ‘AISEA 36 Bible Online

KO ‘AISEA 36 - KO E TOH TAPU KATOA TONGA bible

KO ‘AISEA 36

¹PEA ko eni ‘i he hongofulu mā fā ta‘u ‘o Kingi Hesekaia, na‘e ‘alu hake ‘a Senakalipe ko e Tu‘i ‘Āsilia ke tau‘i ‘a e ngaahi kolo Siuta na‘e ‘aa‘i, ‘o ne puke ia.

²Pea fekau atu ‘e he Tu‘i ‘Āsilia ‘a e Lapisake mei Lākisi ki Selusalema kia Kingi Hesekaia mo ha fu‘u tau. Pea ne tu‘u ‘i he takingavai ‘o e lepa ‘olunga, ‘i he hala tanu ‘oku ‘alu ki he ‘api ‘o e fō kofu.

³Pea ‘alu atu kiate ia ‘a ‘Īlaiakimi foha ‘o Hilikaia, ‘a ia na‘e pule ki he Loto‘ā, mo Sēpina ko e sikalaipe, mo ‘Ioa foha ‘o ‘Ēsafe na‘e ‘a‘ana ‘a e tohi Kalonikali.

⁴Pea lea kiate kinautolu ‘a e Lapisake, Mou lea mu‘a kia Hesekaia, Ko e folofola eni ‘a e Tu‘i Lahi, ‘a e Tu‘i ‘Āsilia, Ko e hā ‘a e falala ko eni ‘oku ke fai?

⁵Tala atu, ko e koto launoa pē ‘a e pehē ‘oku ai ha‘o fakakaukau mo hao ivi ki he fai ‘o e tau: ka ko hai ena ‘oku ke falala ki ai, ho‘o tu‘u kiate au?

⁶Tā ‘oku ke falala ki ho‘o tokotoko ‘aki ‘a e kaho mafesi na, ‘a ‘Isipite; ‘a ia ka falala ki ai taha, ‘e hūkia ai hono nima, ‘o ne lavea: ‘oku pehē ‘a Felo ko e Tu‘i ‘Isipite kiate kinautolu ‘oku falala kiate ia.

⁷Pea kapau te ke pehē mai, ‘Oku mau falala kia Sihova ko homau ‘Otua: ‘ikai ko ena ia kuo holoki ‘e Hesekaia hono ngaahi ‘esi mo hono ngaahi ‘ōlita, pea kuo ne pehē ki Siuta mo Selusalema, Ko e ‘ōlita pē ko eni te mou fai ai ho‘omou hū?

⁸Pea ko eni, ta fepauaki mu‘a, ‘a koe mo hoku ‘Eiki ko e Tu‘i ‘Āsilia, pea te u ‘atu ha uaafe‘i hoosi, ‘o kapau te ke lava ‘e koe ke fakatotofu hono heka‘i.

⁹Pea kapau ‘oku ‘ikai te ke lava ke teke‘i ha taha ‘o e ngaahi kapiteni si‘i ‘oku nofo ki hoku ‘Eiki, pea ‘oku ke falala koā ki ‘Isipite ke ‘omi ha uta sāliote mo ha tau hoosi?

¹⁰He ‘oku ta‘ekau ‘a Sihova ‘i he‘eku a‘u hake ke tau‘i ‘a e fonua ni, mo faka‘auha? Na‘e folofola mai ‘a Sihova kiate au, ‘Alu hake ki he fonua ko ia, ‘o faka‘auha.

¹¹Pea lea ange ki he Lapisake ‘a ‘Īlaiakimi mo Sēpina mo ‘Ioa, ‘o nau pehē, Lea mu‘a ki ho‘o kau tamaio‘eiki ko kimautolu ‘i he lea faka-‘Ālamea; he ‘oku mau ‘ilo ia: kae ‘oua na‘a ke lea kiate kimautolu ‘i he lea faka-Siu, kae fanongo ‘a e kakai ‘i he funga ‘ā.

¹²Ka ka pehē ‘a e Lapisake: He kuo fekau au ‘e hoku ‘eiki ke fai ‘eku lea ni ki ho ‘eiki pē, pe kiate koe? ‘ikai kuo ne fekau au ki he tu‘unga me‘a ‘oku nofo ‘i he funga ‘ā na, he te nau kau mo kimoutolu ‘i he kai ‘enau tu‘u mama‘o, mo inu ‘enau tu‘utata?

¹³Pea tu‘u atu ‘a e Lapisake, ‘o ne kalanga le‘o lahi ‘i he lea faka-Siu, ‘o ne lau ‘o pehē: Mou fanongo mai ki he tala ‘a e Tu‘i Lahi, ko e Tu‘i ‘Āsilia.

¹⁴Ko e folofola eni ‘a ‘ene ‘afio, ‘Oua na‘a fakahehema‘i kimoutolu ‘e Hesekaia; he tala‘ehai te ne lava ke fakahaofi kimoutolu:

¹⁵pea ke ‘oua na‘a fakafalala kimoutolu ‘e Hesekaia kia Sihova, he‘ene pehē, Kuo pau ke fakahaofi kitautolu ‘e Sihova, ‘e ‘ikai tuku ‘a e kolo ni ki he nima ‘o e Tu‘i ‘Āsilia.

¹⁶‘Oua ‘e tokanga kia Hesekaia: he ko eni ‘a e folofola ‘a e Tu‘i ‘Āsilia, ‘Omi holo kiate au, pea mou hū ki tu‘a kiate au; ka mou kai takitaha mei hono vaine pea mei hono fiki, pea mou inu takitaha mei hono lepa ‘o‘ona:

¹⁷kae‘oua ke u ha‘u, ‘o ‘ave kimoutolu ki ha fonua ‘oku hangē ko homou fonua ni, ko e fonua uite‘ia, mo kava‘ia, ko e fonua me‘akai‘ia mo ngoue vaine‘ia.

¹⁸Vakai na‘a lōtaki kimoutolu ‘e Hesekaia, ‘o pehē, ‘E fakahaofi kitautolu ‘e Sihova, He kuo fakahaofi ‘e ha taha ‘o e ngaahi ‘otua ‘o e kakai ko ē hano fonua mei he nima ‘o e Tu‘i ‘Āsilia?

¹⁹Ko e fē ‘a e ngaahi ‘otua ‘o Hēmati, mo ‘Apati? ko e fē ‘a e ngaahi ‘otua ‘o Sipalavaimi? he kuo nau fakahaofi ‘a Samēlia mei hoku nima?

²⁰Ko hai ‘o e ngaahi ‘otua ‘o e ngaahi fonua ko ē kuo fakahaofi hono fonua mei hoku nima, ke ngali lava ai ‘e Sihova ke fakahaofi ‘a Selusalema mei hoku nima?

²¹Ka ka fakalongo pē ‘a kinautolu, ‘o ‘ikai te nau tali ha momo‘i lea: he ko e tu‘utu‘uni ‘a e tu‘i ia, ‘Oua te mou tali ia.

²²Pea toki ha‘u ‘a ‘Īlaiakimi foha ‘o Hilikaia, ko e pule ‘o e Loto‘ā, mo Sēpina ko e sikalaipe, mo ‘Ioa foha ‘o ‘Ēsafe na‘e ‘a‘ana ‘a e tohi Kalonikali — na‘a nau omi kia Hesekaia kuo hae hifo honau kofu, pea na‘a nau fakahā ki ai ‘a e ngaahi lea ‘a e Lapisake.